प्रेरितून का काम 27
27
पौलुस की रोम-यात्रा क्रेते तक
1जब फेस्तुस राज्यपालाक द्वारा यो तय हो ग्यो कि हम समुन्द्री जहाज में इटली प्रदेश जूला, तब उले पौलुस और थ्वाड़ा कैदीन ले यूलियुस नामोको औगुसस्तुसा पलटनाक एक सुबदारस सौंप दीछ। 2अद्रमुतियमु शैहरा का एक समुन्द्री जहाज में जो आसिया प्रदेशा का समुन्द्राक किनार क नगरून भटे होभेरन जान खिन तैयार छ्या। त हमूले उ जहाज में बैठाभेरन सफर खिन न्हैग्या। और उ सफर में जानवालो अरिस्तर्खुस नामोको एक आदिमी ले हमार दगाड़ छ्यो, जो मकिदुनिया प्रदेश को थिस्सलुनीके शैहर भटे आईना को छ्यो। 3दुसारा दिन हम सब सिदोन शैहर में पुजियाँ, और यूलियुस सुबदार ले पौलुस में दया करभेरन ऊस उक दगड़ियान क पास जान दीछ की उनूनथैं जरूरी चीज ली अ। 4क्याखिनकि जो दिशा में हम जान मरैछ्या उक उलटी दिशा खिन हवा चलून मरैछी, हमूले जहाज स साइप्रस टापू का किनार-किनार लीभेरन गया। 5जब हम समुद्र में सफर करभेरन किलिकिया और पंफूलिया प्रदेशून का किनार होभेरन लूसिया का मूरा शैहर में पुज्या। 6वाँ सुबदारस सिकन्दरिया शैहर को एक समुन्द्री जहाज मिलछ्य, जो इटली प्रदेश जानवालो छ्यो, और उले हमून उ जहाज में बैठाछ दीछ। 7हमून धीरे-धीरे सफर करना ले भौत दिन हो ग्या, हमोरो क्नीदुस नगर पुजून भौत मुश्किल होग्यो किलैकी हवा उलटी दिशा में चलून मरैछी। येक कारण हम सलमोने का सामुनि भटे गुजर भेरन क्रेते टापू का पास भटे होभेरन अघिल बढ़ गयाँ। 8और उक किनार-किनार मुश्किल ले जाभेरन उ बन्दरगाह में पुजियाँ जैथैं शुभ बन्दरगाह कुछ्या, जाँ भटे लसया शैहर नजिक छ्यो।
9जब भौत दिन बीत ग्या, और समुन्द्री सफर में जोखिम येक कारण हुछ्या किलैकी पश्चातापो दीनो को त्यार खतम ग्योछ और यो उई मौसम छै जब समुंद्र में भौत तूफान हो जाछो। येक कारण, पौलुसले उन सबूनथैं क्योछ, 10“हे भाईयो, मैंस लागून मरेछ्य कि हमोरो सफर भौत परेशानी वालो होलो, हमून नै केवल अपून माल और जहाज की परेशानी उठून पड़ोलो बल्कि हमार प्राणून को ले खतरा छै।” 11लेकिन सुबदार ले पौलुस की बात का बदला कप्तान और जहाजा का और मालिका क बातुन में ज्यादा ध्यान दीछ। 12उ शुभ नामाकी बन्दरगाह में जाड़ा का दिन बितून खिन भौत मुशकील छ्या, येक कारण ज्यादातर लोग वाँ भटे अघिल जान चाँछ्या। जेले कि उन फीनिक्स शैहर में पुजभेरन जाड़ा को मौसम वाँ काट सकां। यो क्रेते टापू को एक बन्दरगाह छै, जैको द्वार दक्षिण-पश्चिम और उत्तर-पश्चिमाक तरफ खुल छ्यो।
समुद्र में तूफान
13जब थ्वाड़ा-थ्वाड़ा दक्षिण भटे हवा चलून लागछ्य, उनूनले सोचछ्य कि उन करून सक्षम हो ज्यूला, जो उनूनले करना को फैसला करछ्य। येक कारण उनूनले लंगर उठाभेरन और क्रेते टापू का किनार-किनार जहाज चलूना की कोशिश करछ्य। 14लेकिन थ्वाड़ा देर में जमीना का तरफ भटे उत्तर पूर्वी तूफान उठछ्य, जो “यूरकुलीन” कैहलूछो। 15जब जहाज तूफान का चपेट में आछ, तब जहाज तूफान का सामुनि बेबस हो ग्यो, येक कारण हमूनले जहाज स तूफान का बहवा में छोड़ दीछ, और इसीकैं बगूनै न्हैग्यो। 16तब कौदा नामाका एक नान टापू का आड़ में बगनै-बगनै हम मुश्किल ले जीवन रक्षक नाव स बश में नै कर पाया। 17फिर जहाज का कर्मचारीन ले बचाव वाली नाव स जहाज में मलिकैं खींचभेरन जहाज को बचाव करून खिन तलि भटे लीभेरन मलि तक ज्योड़ान ले कसभेरन बाँदि दीछ। और सुरतिस का खाड़ी में कम पानिक कारण रेत में जहाज फँस जानाक डरले उनूले लंगर स पानि में डाल दीछ और ऊस पानिक दगाड़ बगून दीछ।
18दुसारा दिन ले तूफान हमून जोरले झकजोरेनै रैछ, यो कारण ले हम जहाज को माल समुन्दर में खितून लाग्यान। 19तीसारा दिन उनूनले अपून हातून ले जहाज का उपकरणून तलि खित दीछ। 20और जब भौत दिनून तलक नै सूरज, नै कोई तारा देखीन मरेछ्या, और अब तूफान और ले तैज है भेरन चलून लागछो, त आखिर में हमरि बचना की पुरी आश लै खतम है गै।
21जब उनोरो भौत दिनून तक चिन्ता कारण खानो खाना को ले मन नी छ्यो। तब पौलुसले उनार बीच में ठाँड़ होभेरन क्योछ, “भाईयो, निको त यो हुनो कि तुम मेरि बात मानभेरन क्रेते टापू भटे अघिल नी बढ़ना और नै यो मुसीबत उनी और नै यो नुकशान हुनो। 22लेकिन मैं तुमून समझूछूँ कि तुम हिम्मत राँखा, किलैकी तुमून में भटे कैको ले प्राणै के नुकशान नै हो, केवल जहाज को नुकशान का अलावा। 23किलैकी परमेश्वर जैको मैं छूँ, और जैकी सेवा करछूँ, उक स्वर्गदूत ले आज रात म्यार पास आभेरन क्योछ, 24हे पौलुस, तैं जन डर! तैंस महाराजा का सामुनि ठाँड़ हुन छै। और देख, परमेश्वर ले सबून जो त्यारा दगाड़ सफर करनान, उन सब बच जाला। 25येक कारण, हे भाईयो, तुम हिम्मत राँखा, क्याखिनकि मैं परमेश्वर में विश्वास करछूँ, कि जसो मैंथैं कई ग्योछ, ऊसो होलो। 26हम जरूर कोई टापू में पुजून होलो।”
जहाजो को टूटुनो
27चौदवाँ दिन रात में, जब हम अद्रिया समुन्द्राक लहरून का थपेड़ून का बीच में अघिल बढ़ून मरैछ्या, अधरात में जहाज चलूनवालान यो अहसास भ्योछ कि उन जमीन पास पुजून मर्यान। 28जब उनूनले समुन्दर की पानि कि गहराई नापछ्य जो सैतीस मीटर छी और थ्वाड़ा अघिल जाभेरन फिर गहराई नापछ्य तो सत्ताईस मीटर निकलछ्य। 29उनुस डर लागून मरेछी कि काँई हम चट्टान में नै टकरै जू, येक कारण उनूनले जहाज रोकून खिन उक पछिल भटे चार लंगर पानि में खित दीयान और बेशबरीले उज्यालो हुना को इंतजार करून लाग्यान। 30लेकिन जब नाव चलूनवाला जहाज भटे भाजून चाँनमरेछ्या, और उनूनले जहाज का अघिल वाला हिस्सा में लंगर खितनाक बहाना ले जीवन रक्षक नाव स समुन्द्र में उतारी दीछ। 31त यो देखिभेरन पौलुसले सुबदार और सिपाईन थैं क्योछ, “अगर यो जहाज में नै रौला, तो तुम लोग नै बचि सकना।” 32तब सिपाईनले जियोड़ा काटिभेरन जीवन रक्षक नाव स खित दीछ।
33जब रात्तै हुन लागछी, त पौलुसले यो कैभेरन, सबून खानो खान खिन विनती करछ्य, “आज चौदा दिन हो ग्यान तुमूनले चिन्ता का कारण के नै खा राख्यो। 34येक कारण मैं तुमून समझूछूँ कि के खा ली, जेले तुमोरो बचाव हौ; किलैकी तुमून में भटे कैको एक बाल ले नै खितीलो।” 35और यो कैभेरन उले रवाटा लीभेरन सबून का सामुनि परमेश्वरो को धन्यबाद करछय और टोड़िभेरन खानो लाग्यान। 36तब सबून हौंसला आछ और उनूनले खानो खाछ। 37जहाज में हम सब मिलाभेरन द्वी सौ छिहत्तर लोग छ्या। 38जब सबून ले पेट भरभेरन खा लीछ, तब उनूनले ग्यूँका बोरिन समुन्द्र में खितभेरन जहाज स हल्को करून लाग्यान।
39जब दिन निकलछ्य, त तब उनूनले उ देश स नै पछ्याणियो, लेकिन उनेरि नजर एक सुखी जमीन में पड़छ्य, जैक किनार रेतीला छ्या। और सोचछै की अगर हो सकों त यो किनार में जहाज ठाँड़ कर दीनू। 40तब उनूनले लंगर स खोलभेरन समुन्द्र में छोड़ दीछ, और उई बखत पतवारून का ज्योड़ो खोल दीयान। फिर उनूनले जहाजा का सामुनि वाला पाल उठाछ ताकि हवा जहाज अघिलकैं बढ़ौ और हम किनाराक तरफ जा सका। 41जहाज पानि तलि रेत का टिला में टकराभेरन उको अघिलो हिस्सा फस ग्यो। और उ हिल नै सक्यो। और उक पछिलो को हिस्सा लहरून ले टुटून लागछ्य।
42तब सिपाईनले इसो सोचछ्य कि काँई इसो नै हो कि कैदी बौं काटिभेरन भाजि जौ, येक कारण ले उन उनून मार दिन चाँछ्या। 43लेकिन सुबदार युलियुस ले पौलुस स बचूनाकि इच्छाले उनुस इसो करून है रोक छै, और यो क्योछ, की जो तैर सकनान, उन पैलि फाटंग मारभेरन किनार में जून। 44और बाकि लोग टूटिना का जहाजा का तखतान या मलवा में न्हैग्या। येक कारण सब लोग सुरक्षित बच ग्या।
Obecnie wybrane:
प्रेरितून का काम 27: SORNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
