प्रेरितून का काम 25
25
फेस्तुस का सामुनि
1अपून प्रदेश में पुजिनाक तिसर दिन बाद फेस्तुस राज्यपाल कैसरिया शैहर भटे यरूशलम शैहर में आछ। 2तब प्रधान याजकून ले, और यहूदी अगुवान ले, उ राज्यपाल का सामुनि पौलुसाक खिलाफ दोष लाग्यान। 3उनूनले फेस्तुस थैं बिनती करभेरन क्योछ, “तुम पौलुस स यरूशलम शैहर बुलूनाकी किरपा करा।” क्याखिनकि उन ऊस बॉट में मारनाक विचार में छ्या। 4लेकिन फेस्तुस राज्यपाल ले जबाब दीछ, “पौलुस कैसरिया क जेल में बन्द छै, और खुद मैंले वाँ जल्दी जान छै।” 5फिर क्योछ, “तुमूनमें भटे जो अधिकार राखनान, उन म्यारा दगाड़ हिटा, और अगर यो आदिमी ले के गलत काम करि रैछ, त उमें दोष लगा।”
6तब फेस्तुस राज्यपाल यरूशलम शैहर में आठ-दस दिन रैभेरन कैसरिया शैहर खिन न्हैग्यो; और दुसारा दिन न्याय आसन में बैठभेरन उले पौलुस स सभाक सामुनि ल्यूनाको हुकुम दीछ। 7जब पौलुस आछ, त जो यहूदी अगुवा यरूशलम शैहर भटे आईनाक छ्या, चारों तरफ ठाड़ है भेरन उमें भौत दोष लगायान, जिनोरो उनार पास के सबूत नै छ्यो। 8लेकिन पौलुसले अपून बचाव में क्योछ, “मैले नै त यहूदीन को नियम-कानून स टोड़छै, और नै मन्दिरा, और नै महाराजा का खिलाफ कोई अपराध करछ्य।” 9यहूदी अगुवान खुश करना का इच्छाले तब फेस्तुस राज्यपाल ले पौलुसथैं पुछ्छै, “तैं की चाँछै की मैं यरूशलम शैहर में जाँ; और वाँ म्यारा सामुनि तेरो मुकरदमा तय करि जौ।” 10पर पौलुसले क्योछ, “मैं महाराजा की अदालत का सामुनि ठाड़ छूँ, और योई जाग छै जाँ मेरो फैसला करि जान चैंछो। तुम ले निकीकैं जाणछा, कि मैले यहूदीन का खिलाफ केले अपराध नै कर्यो। 11अगर मैंले मौतेकी सजाक लायक के कसूर कर रैछ, तब मैं मरून खिन तैय्यार छूँ। लेकिन इनारा लगाई दोष एक लै सच्ची नाहातिन, त कोई ले मैंस इनारा हात में नै सौंप सकनो। मैं महाराजा थैं अपील करछूँ!” 12तब फेस्तुस राज्यपाल ले मंत्रीन का सभाक दगाड़ विचार करभेरन जबाब दीछ, “तैंले महाराजा का द्वारा न्याय करि जाना की माँग कर रैछ, त अब तैं उक पास जालै।”
राजा अग्रिप्पा क सामुनि पौलुस
13थ्वाड़ा दिन हुना का बाद राजा अग्रिप्पा और उकी नानि बैनि बिरनीके फेस्तुस राज्यपाल थैं मुलाकात करून खिन कैसरिया शैहर में आयान। 14उनारा भौत दिन वाँ रूना का बाद, फेस्तुसल राज्यपाल ले पौलुसो को मुकदमा राजा का सामुनि पेश करभेरन क्योछ, “याँ एक आदिमी छै, जैस फेलिक्स राज्यपाल कैद भटे छोड़ी ग्योछ।” 15और जब मैं यरूशलम शैहर में छूँ, तब वाँ प्रधान याजकून का और यहूदी अगुवान ले उक खिलाफ दोष लगाभेरन बिनती करछ्य कि ऊस मौत सजा कि हुकुम दी जौ। 16मैंले उनुस जबाब दीछ, “रोमीन को यो नियम-कानून छै कि जब तलक दोषीस उमें आरोप लगून वालाक सामुनि अपून बचाव में बोलना को मौक नै मिल जौ, तब तलक ऊस सजा खिन नै सौंपी जा सकूनो।” 17येक कारण जब यहूदी अगुवा म्यारा दगाड़ याँ कैसरिया शैहर में आयान, तो मैले के देर नै करि, लेकिन दुसारा दिन अदालत में बैठाभेरन, मैंले हुकुम दीछ की पौलुस अदालत में ल्याई जौ। 18जब उमें दोष लगूनवाला ठाड़ भ्यान, त उनूनले इसी बुरी बातुन को दोष नै लगा सक्या, जसो मैंले सोचि राखछ्यो। 19लेकिन उनार मन-मुटाव उक दगाड़ अपून धर्माक थ्वाड़ा बाता का कारण छ्यो और यीशु नामोको एक आदिमी का बारिमें ले जो मरि ग्योछ, लेकिन पौलुस उक ज्यून हुना को दावा करछो। 20म्यारा समझ में यो नै उन, कि यो बात की पुछ-ताछ कसीकैं करि जौ। येक कारण मैले उथै पुछ्छै, “क्या तैं यरूशलम शैहर खिन जालै, की वाँ इन बातुन को मुकदमा हो?” 21“लेकिन जब पौलुसले यो विनती करछ्य, कि उकी सुणवाई महाराजा का याँ हो; येक कारण मैले हुकुम दीछ कि जब तलक मैं ऊस महाराजा का पास नै भेजून, तब तलक उ कैद में रौलो।” 22तब राजा अग्रिप्पा ले फेस्तुस राज्यपाल थैं क्योछ, “मैले पौलुस की बात सुणून चाँछू,” तब राज्यपाल ले क्योछ, “तुम भोल सुण लिया।”
23लेकिन दुसारा दिन, राजा अग्रिप्पा और उकी नानि बैनि बिरनीके भौत धूम-धामले आभेरन सेनापतिन और शैहरा का खास लोगून का दगाड़ अदालत में आयान, तब फेस्तुस राज्यपाल ले हुकुम दीछ, की पौलुस स ल्याई जौ। 24फिर फेस्तुस राज्यपाल ले क्योछ, “हे राजा अग्रिप्पा, और याँ आईनाक सब लोगों, यो आदिमी स देखा, जैक बारिमें सब यहूदीन ले यरूशलम शैहर में और याँ ले जोर-जोरले मैंथैं विनती करछ्य, कि यो ज्यून रूना को लायक नाहातिन।” 25लेकिन मैं समझ गयूँ कि यैले मौतेकी सजा का लायक कोई कसूर नै कर रैछ; और जब उले अपूनास कैसरा थैं फैसला करना की विनती करछय, तो मैंले ऊस रोम शैहर खिन भेजना को फैसला करछय। 26हमारा सम्राट कैसर स उक बारिमें लिखून खिन कोई खास बात नै मिली; येक कारण मैं यैस तुमार सामुनि और खास करभेरन हे राजा अग्रिप्पा, तुमार सामुनि ल्या रयूँ, कि तुमार सामुनि पुछ-ताछ करना का बाद मैंस लिखून खिन कोई कारण मिल जौ। 27क्याखिनकि कोई ले कैदी स जेल भेजून और जो आरोप उमें लगाई ग्या, उनून नै बतून, मैंस निको नै लाग्यो।
Obecnie wybrane:
प्रेरितून का काम 25: SORNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
