मत्ति 19

सोळचिटिता विरोदते येसुना करहाना

(मर १०:१-१२)

1येसु इव पोल्लोंग वळकस गलीलताल हतुर, अनि यरदन नदिता होदपाकाळ यहुदिया प्रदेशवनाह हतुर। 2असके पकाय भीळ येसुना परके वातु, अनि ओर अगा बिमार लोकुरकुन सुदरे कितुर।

3असके परीसि लोकुरक ओना परिक्षा कियान साटि हेरे वास, “बोरायि आपुना मुत्तेन बोदायि कारणते सोळचिटि हियान साटि बाताल मूसाना नियम परवांगि हिन्ता बहे?” इन्जोर येसुन परिक्षा किस पुच्चेमातुरक। 4अदेन ओर, “दुनियातुन उपजेह केवाल परमेस्वर पहले ओरकुन मानेय अनि आळ इदाम बनेकितुर#उत्प १:२७; ५:२, 5अनि ‘इद कारणते मानेय आपुनोर अवाल-बाबोताल अलग आस आपुना मुतेनसंग उन्दि आस मन्दानुर अनि ओरक इवुरास उन्दि मेन्दुल आयनुर#उत्प २:२४’ इन्जोर बाताल निमाट पवित्र पुस्तकतिगा वाचे केविट? 6इन्जोर ओरक इदेक रन्ड आयो, मति उन्दि मेन्दुल मन्तोरक। इन्जोर बोन परमेस्वर जोळे कितोर अदेन बोरे मानेय अलग केमाकिर” इदाम उत्तर हितुर। 7ओरक येसुन, “पजा सोळचिटि हिस मुत्तेन तासिविर इन्जोर मूसाल इद बाक्या आग्या हितुर” इन्जोर पुच्चेमातुर#व्यव २४:१-४; मत्ति ५:३१ । 8येसु ओरकुन, “मिया मन्दा कठोरताता कारणते मिकुन आप-आपुना मुतेहकुन तासियाना आग्या मूसा हितुर, मति मानेय अनि आळदुन बनेहकितोर ओद काळताले इदाम हिले आसि, 9मति नना मिकुन इन्तोना ते बोरायि व्यभिचारतुन तासिस दुसरो बोदे कारणते आपुना मुत्तेना त्यागकिस दुसरो आळदासंग मरमिंग केविर ते ओर व्यभिचार किन्तोर; अनि तासियातुन बोरे मानेय मरमिंग केविर ते ओर वने व्यभिचार किन्तोर#मत्ति ५:३२; १ कुरि ७:१०-११।”

10येसुना चेला लोकुरक येसुन, “मुत्ते इवुरता संबन्द इदाम मन्ता ते मरमिंग कियाना बेस आयो” इन्जोर इतुर। 11येसु ओरकुन “वरदान पुटतोरक ओरकुन तासिस सबोय लोकुरक इद पोल्लो समजेमाय परोर। 12आपुना अवाहारिना गर्भताल नपुसक आस जनम आतोर मन्तोरक अनि मानेयक नपुसक बनेहकितोरक नपुसक मन्तोरक; अनि स्वरग राज्यता कारण आपुनतुन नपुसक बनेहकितोरक नपुसक वने मन्तोरक। नना वेहता इद पोल्लो बोर येतिला परान्तोर ओर इद पोल्लो येतिर” इन्जोर इतुर।

येसु बालकिन आशिरवाद हिन्तोर

(मर १०:१३-१६; लूका १८:१५-१७)

13असके येसु ओरिगा कय इरस प्रार्थना केविर इन्जोर लोकुरक बालकिन ओना हेरे ततुर मति चेलालोकुरक ओरकुन रांगतुर। 14येसु इतुर, “बालकिन नावा हेरे वायिला हिम्ट, ओरकुन रोके केमाट, बाक्याकि स्वरग राज्य इदामलोराय मन्ता।” 15अनि येसु ओरिगा कय इरतुर असके अगडाल हतुर।

अनन्त जिवनता इच्चा केवाल धनि लयोरता पिटो

(मर १०:१७-३१; लूका १८:१८-३०)

16असके पजा वरोर धनि मानेय येसुना हेरे वातुर ओर येसुन, “हे गुरु, अनन्त जिवन पुटान साटि नना बोद भलायिता बुतो कियाला पहाजे?” इन्जोर पुच्चेमातुर। 17येसु ओन इतुर, “निमा नाकुन सोबायिता बारेते बाक्या पुच्चेमान्तोन? केवल परमेस्वर वरोरे सोबाय मन्तोर, निमा अनन्त जिवनतिगा हन्दाना इच्चा किन्तोन ते परमेस्वरना आग्यातुन मानेमासोर हन” इन्जोर इतुर। 18ओर येसुन, “बोव आग्यांग?” इन्जोर ओर पुच्चेमातुर ते येसु इतुर, “हव्काना आयो, व्यभिचार कियाना आयो, कलाना बुतो कियाना आयो, खोटाल गवाहि हियाना आयो#निर २०:१३; व्यव ५:१७; निर २०:१४; व्यव ५:१८; निर २०:१५; व्यव ५:१९; निर २०:१६; व्यव ५:२०, 19आपुनोर बाबो अनि आपुना अवहारिना आदर कियाना, अनि आपुना हेरेटोरकुन आपुना लेहका मया इराना इव आग्यांगेय” इन्जोर वेहतुर#निर २०:१२; व्यव ५:१६; लेव्य १९:१८।

20ओर लयोर येसुन, “इव सबोय पोल्लोतुन नना मानेमातोना, इदेक असा नावागा बोद पोल्लोता कमि मन्ता?” इदाम पुच्चेमातुर। 21येसु ओन, “निमा परिपूर्ण आयाना इच्चा किन्तोन ते हन्जुन आपुना धनसंपतितुन मोमस गरिबकुन हिम अनि वास नावा चेला आम अनि निकुन स्वरगतिगा निया धन जमा आयार” इन्जोर इतुर। 22मति ओर लयोर पकाय धनि मतोर इन्जोर इद पोल्लो केन्जुन दुःखि आस हतुर।

23असके येसु आपुनोर चेलालोरकुन इतुर, “दनवान स्वरग राज्यतिगा हन्दाना पकाय कटिन मन्ता इन्जोर नना मिकुन खरोय इन्तोना। 24धनि मानेय परमेस्वरना राज्यतिगा हन्दानाताल हुट सुयिता बुकाताल पसियस हन्दाना सुदोय मन्ता इन्जोर नना मिकुन इन्तोना।” 25इद केन्जुन चेलालोकुरक पकाय चकेमास, “पजा बोना पिसिहला आय परान्ता?” इन्जोर पुच्चेमातुरक। 26येसु ओराके हुळस, “मानेयनिकेडाल इद आय परो, मति परमेस्वरताल सबोय आय परान्ता” इन्जोर इतुर। 27असके पतरस ओन, “हुळा, माक ते सबोय तासिस निया परके वातोम ते माकुन बाताल पुटार?” इन्जोर पुच्चेमातुर। 28येसु ओन इतुर, “नावा परके वातोर निमाट असा जिवेमास पुनाल काळतिगा नना मानेयतोर मरि राजाना महिमातासंग सिंहासनतिगा उदानुर असके निमाट वने बारा सिंहासनतिगा उदस इस्रायेलना बारा गोत्रता न्याय कियाकिट इन्जोर नना मिकुन खरोय इन्तोना#मत्ति २५:३१; लूका २२:३०। 29अनि नावा पोरोय साटि बोरायि लोन या तमोलोरक या हेलाळक या बाबो या अवहारि या बालक या डन्डतुन तासितोर ओन नुर पट पुटार अनि ओर अनन्त जिवनता वने वारिसदार आयनुर। 30मति पकाय मुने मन्तोरक पकायि लोकुरक आकरितोर आयनुरक अनि आकरि मन्तोरक पकाय लोकुरक मुनेटोर आयनुरक#मत्ति २०:१६; लूका १३:३०।”

Obecnie wybrane:

मत्ति 19: fmu

Podkreślenie

Udostępnij

Porównaj

Kopiuj