མཱར་ཀུ་ལེའུ་ 3

ཡེ་ཤུ་གིས་མི་ལགཔ་ཞར་མི་ལུ་དྲགཔ་མཛད་པའི་སྐོར།

1ད་རུང་ཁོ་ལོག་སྟེ་ སི་ན་གོག་ནང་འབྱོནམ་ད་ འདི་ཁར་མི་ལགཔ་ཞབོ་གཅིག་ཡོདཔ་ཨིན་མས། 2ཡེ་ཤུ་ལུ་སྐྱོན་བཏག་ནི་གི་དོན་དག་འཚོལ་མི་དེ་ཚུ་གིས་ ངལ་འཚོ་བའི་ཉིནམ་ལུ་ཁོ་གིས་ཞབོ་དེ་ལུ་ དྲགཔ་བཟོ་འོང་ག་མི་བཟོ་ག་ཟེར་མནོ་སྟེ་ ཁོ་གི་སྦོ་ལོགས་ཁར་འོངས་ཏེ་བལྟ་སྡོད་ནུག 3ཡེ་ཤུ་གིས་ལགཔ་ཞར་མི་དེ་ལུ་ ལོང་སྟེ་ཡར་གདོང་ཁར་ཤོག་ཟེར་གསུངས་ནུག 4ད་རུང་ཡེ་ཤུ་གིས་འདི་ཁར་ཡོད་མི་ཚུ་ལུ་ བཀའ་ཁྲིམས་དང་བསྟུན་ཏེ་ ངལ་འཚོ་བའི་ཉིན་མ་ལེགས་ཤོམ་འབད་ཆོག་ག་ ཟོགཔོ་འབད་ཆོག་ག་ སྲོག་སྐྱབས་འབད་ཆོག་ག་ བསད་ཆོག་ག་ ཟེར་དྲིཝ་ད་ ཁོང་གིས་ལན་ག་ནི་ཡང་མ་ཞུ་བས། 5ཡེ་ཤུ་དགོངསམ་ཁྲེལ་ཏེ་ ཕར་དང་ཚུར་གཟིགསཔ་ད་ མི་ཚུ་གི་སེམས་སྲ་ཀྲག་ལུ་ཐུགས་ཕམ་ནུག་ དེ་ལས་མི་དེ་ལུ་ ཁྱོད་ཀྱི་ལགཔ་ཕར་བརྐྱང་ཤིག་ཟེར་གསུངསམ་ད་ ཁོ་གིས་ལགཔ་ཕར་བརྐྱང་པའི་བསྒང་ལས་དྲག་སོང་ནུག 6དེ་ལས་ ཕ་རུ་ཤི་པ་ཚུ་དེ་འཕྲོ་ལས་དེ་ཁར་ལས་ཐོན་སོང་སྟེ་ ཁོ་ག་དེ་སྦེ་བསདཔ་དྲག་ག་ཟེར་གྱོས་ངན་བརྩམ་སྟེ་ དཔོན་ ཧེ་རཱོད་དང་ཁ་ཅིག་འབད་མི་ཚུ་སྡོད་སར་བསྟུན་གྲོས་བརྐྱབས་པ་སོང་ནུག།

མི་དམངས་ཀྱིས་ཡེ་ཤུ་གི་རྟིང་བདའ་བའི་སྐོར།

7ཡེ་ཤུ་ཁོ་རང་གི་སློབ་མ་ཚུ་དང་གཅིག་ཁར་ མཚོའི་ཁ་ཐུག་ལུ་འབྱོནམ་ད་ མི་དམངས་ཀྱིས་ཁོ་གི་རྟིང་བདའ་འོངས་ནུག 8དེ་ལས་ཡེ་ཤུ་གིས་མཛད་མིའི་ ཧ་ལས་པའི་ཕྱག་ལཱ་གི་ཁྱབ་བསྒྲགས་དེ་ཚུ་ ག་ལི་ལི་ལུང་ཕྱོགས་དང་ ཡུ་དེ་ཡ་ལུང་ཕྱོགས་དང་ རྒྱལ་ས་ ཡེ་རུ་ཤ་ལེམ་དང་ ལུང་ཕྱོགས་ ཨི་དུ་མེ་ཡ་དང་ གཙང་ཆུ་ ཡཱོར་དཱན་གྱི་ཕ་ཁར་ ཁྲོམ་ ཏའིར་དང་ ཁྲོམ་ སི་དཱོན་གྱི་སྦོ་ལོགས་ཁའི་གཡུས་ཚན་ཚུ་ནང་ སྡོད་མི་ཚུ་གིས་རྣ་བ་གོ་སྟེ་ ག་ར་ཁོ་གི་སྐུ་མདུན་ལུ་བཅར་ནུག 9མི་དམངས་ཀྱིས་ཁོ་ལུ་ཨེབ་ཐག་རྐྱབ་མ་འོང་ནིའི་དོན་ལུ་ གྲུ་གཅིག་གྲ་སྒྲིག་རྐྱབས་ཟེར་ ཡེ་ཤུ་གིས་སློབ་མ་ཚུ་ལུ་གསུངས་ནུག 10ག་ཅི་སྨོ་ཟེར་བ་ཅིན་ ཁོ་གིས་མི་ལེ་ཤ་དྲགཔ་མཛད་ནི་དེ་གིས་ ནདཔ་དེ་ཚུ་ག་ར་གིས་ ཁོང་རང་དྲག་ནི་གི་དོན་ལུ་ ཕར་འཕུལ་ཚུར་འཕུལ་བརྐྱབས་ཏེ་ ཡེ་ཤུ་གུ་འདོགས་ནི་སྦེ་འོངམ་ཨིན་མས། 11ནམ་རང་འབད་རུང་འདྲེ་གདོན་འཛུལ་མི་ཚུ་ ཁོ་དང་མཇལཝ་ཙམ་གྱིས་ ཁོ་གི་སྐུ་མདུན་ལུ་ཕྱག་འཚལ་ སྐད་ཤོར་ཏེ་ ཁྱོད་དཀོན་མཆོག་གི་སྲས་ཨིན་མས་ཟེར་ཞུ་ནུག 12དེ་འབདཝ་ད་ ཁོ་གིས་འདྲེ་གདོན་འདི་ཚུ་ལུ་ ང་ག་ཨིན་ན་ག་ལུ་ཡང་མ་སླབ་ཟེར་བཀའ་དམ་དམ་སྦེ་གནང་ནུག།

ཡེ་ཤུ་གིས་སློབ་མ་བཅུ་གཉིས་ལུ་འགན་ཁུར་གནང་བའི་སྐོར།

13དེ་ལས་ཡེ་ཤུ་ཡར་སྒང་གུ་བྱོན་ཏེ་ ཁོ་གིས་ཐུགས་དགྱེས་མི་ཚུ་ལུ་ ཁོ་གི་སྐུ་མདུན་ལུ་འབོ་ཞིནམ་ད་ ཁོང་ཆ་ཁྱབ་སོང་ནུག 14དེ་ལས་ཁོ་གིས་མི་བཅུ་གཉིསཔ་འདི་ ཁོ་དང་གཅིག་ཁར་སྡོད་ནི་དང་ ཆོས་བཤད་པ་གཏང་ནི་གི་དོན་ལུ་ སྐུ་ཚབ་ཀྱི་འགན་ཁུར་གནང་ནུག 15དེ་ལས་འདྲེ་གདོན་ཚུ་ལུ་ བཏོན་བདའ་ཚུགས་ནི་གི་དབང་ཚད་ཡང་གནང་ནུག 16དེ་ལས་ ཁོ་གིས་འགན་ཁུར་གནང་མིའི་བཅུ་གཉིསཔ་ རིམ་པ་བཞིན་དུ་སླབ་པ་ཅིན་ དང་པ་རང་།

པེ་ཏྲོ་ཟེར་མིང་བཏགས་མི་ སི་མཱོན་དང་། 17ཟེ་བེ་དི་གི་བུ་ ཡ་ཀོབ་དང་ ཡ་ཀོབ་ཀྱི་ནུ་གཅུང་ ཡོ་ཧ་ནཱན་ ཡེ་ཤུ་གིས་ཁོང་གཉིས་ལུ་ བོ་ཨ་ནེར་གཱེས་ཟེར་མིང་བཏགས་གནང་ནུག་ འདི་རྫོང་ཁ་ནང་ལུ་འབད་བ་ཅིན་ གནམ་ལྕགས་ཀྱི་བུ་ཟེར་སླབ་ཨིན་མས། 18ཨཱན་དྲུ་དང་ ཕི་ལིབ་དང་ བཱར་ཐོ་ལོ་མིའུ་དང་ མེ་ཐིའུ་དང་ ཐོ་མཱས་དང་ ཨཱལ་ཕེ་ཨུས་ཀྱི་བུ་ ཡ་ཀོབ་དང་ ཐཱད་དེ་ཨུས་དང་ སྲིད་བྱུས་ཀྱི་སྡེ་ཚན་ལས་ཨིན་མི་ སི་མཱོན་དང་། 19དེ་ལས་ཁོ་ལུ་ངོ་ལོག་རྐྱབ་མི་ ཡུ་དཱས་ ཨཱིས་ཀ་རི་ཨཱོད་ཀྱི་བརྩིས་ཏེ་ སློབ་མ་གཉིསཔ་འདི་ཨིན་མས།།

བཀའ་ཁྲིམས་ཀྱི་སློབ་དཔོན་ཚུ་གིས་ཡེ་ཤུ་ལུ་འདྲེ་འཛུལ་ནུག་ཟེར་སླབ་པའི་སྐོར།

20དེ་ལས་ཡེ་ཤུ་ཁོ་རང་བཞུགས་སའི་གཟིམ་ཅུང་ནང་འབྱོནམ་ད་ ད་རུང་མི་དམངས་སྤུངས་འོངས་ཏེ་ ཡེ་ཤུ་དང་ཁོ་གི་སློབ་མ་ཆ་ཁྱབ་ གསོལཝ་བཞེས་ནི་གི་དུས་སྐབས་རང་མ་ཐོབ་ཨིན་མས། 21མི་ཚུ་གིས་ཁོ་འཆོལ་ལོང་ཡར་སོང་ནུག་ཟེར་སླབ་ད་ གཏམ་འདི་ཁོ་གི་ཡུམ་དང་སྐུ་མཆེད་ཚུ་གིས་གསན་ཏེ་ ཡེ་ཤུ་ཞུ་བ་བྱོན་ནུག 22ཡེ་རུ་ཤ་ལེམ་ལས་འོང་མིའི་བཀའ་ཁྲིམས་ཀྱི་སློབ་དཔོན་ལ་ལུ་གིས་ ཁོ་ནང་ལུ་འདྲེ་ བཱེལ་ཟེ་བུལ་འཛུལ་ནུག་ཟེར་སླབ་ནུག་ འདི་འདྲེ་གདོན་གྱི་རྒྱལཔོ་འབད་ནི་འདི་གིས་ ཁོ་གི་དབང་ཤུགས་ཀྱིས་འདྲེ་གདོན་འདི་ཚུ་བཏོན་བདའཝ་མས་ཟེར་སླབ་ནུག 23དེ་ལས་ཡེ་ཤུ་གིས་མི་དེ་ཚུ་ཁོ་གི་སྐུ་མདུན་འབོ་སྟེ་ ཁོང་ལུ་དཔེ་གཏམ་གྱི་ཐོག་ལས་ཆོས་གསུངས་ནུག་ བདུད་ སེ་ཏཱན་གྱིས་ཁོ་རང་གིས་ཁོ་རང་ལུ་ ག་དེ་སྦེ་བདའ་ཚུགས་ནི་སྨོ། 24རྒྱལ་ཁབ་གཅིག་ནང་མ་མཐུནམ་འབྱུང་པ་ཅིན་ རྒྱལ་ཁབ་འདི་ཡུན་མ་རིང་བར་མེདཔ་ཐལ་འོང་། 25ཁྱིམ་གཅིག་ནང་བཟའ་ཚང་མ་མཐུནམ་འབྱུང་པ་ཅིན་ ཁྱིམ་ནང་གི་བཟའ་ཚང་འདི་ནམ་ཡང་ ཡུན་རིངམ་སྦེ་སྒྲིང་སྒྲིང་སྡོད་མི་ཚུགས། 26བདུད་ སེ་ཏཱན་གྱིས་ཁོ་རང་གི་ནང་འཁོད་ནང་ལུ་དགྲ་ལོང་སྟེ་ མ་མཐུནམ་འབྱུང་པ་ཅིན་ མེདཔ་ཐལ་བའི་དུས་ཚོད་རནམ་ཨིན། 27དཔེ་གཅིག་འབད་བ་ཅིན་ མི་སྟོབས་ཅན་གྱི་ཁྱིམ་ནང་ལུ་ཨརཝ་རྐྱབ་པ་འགྱོཝ་ད་ ཧེ་མ་མི་སྟོབས་ཅན་འདི་བཅིངས་མ་བཞག་པ་ཅིན་ ཁོ་གི་ཁྱིམ་བཅོམ་མི་ཚུགས་ དང་པ་ཁོ་བཅིངས་ཞིན་ན་ དེ་ལས་རྐྱངམ་ཅིག་ཁྱིམ་བཅོམ་ཚུགས།#༣:༢༧། མི་སྟོབས་ཅན་ཟེར་མི་འདི་ བདུད་ སེ་ཏཱན་གྱི་དཔེ་ཨིན།

28ང་གིས་ཁྱེད་ལུ་དོན་དག་རང་སླབ་དོ་ མི་ཚུ་གིས་དཀོན་མཆོག་ལུ་དབུ་འཕང་སྨད་མི་དང་ སྡིག་པ་གཞན་ག་ར་དཀོན་མཆོག་གིས་བཀའ་དྲིན་བསྐྱང་འོང་། 29དེ་འབདཝ་ད་ དམ་པའི་ཐུགས་ཉིད་ལུ་ དབུ་འཕང་སྨད་མིའི་སྡིག་པ་འདི་ ཐད་རི་བ་རི་བཀའ་དྲིན་མི་བསྐྱང་ ད་རུང་འདི་གི་གུ་ རྒྱུན་ཆད་མེད་པའི་ ཆདཔ་ཕོག་ནི་ཨིན་ཟེར་གསུངས་ནུག 30ག་ཅི་སྨོ་ཟེར་བ་ཅིན་ མི་ཚུ་གིས་ཡེ་ཤུ་གི་ནང་ན་འདྲེ་འདུག་ཟེར་ སླབ་ནི་དེ་གིས་ ཡེ་ཤུ་གིས་དཔེ་གཏམ་འདི་ཚུ་གསུངས་གསུངསམ་ཨིན་མས།།

ཐུགས་དགོངས་དང་བསྟུན་ཏེ་འབད་མི་སྐོར།

31ཡེ་ཤུ་གིས་དཔེ་གཏམ་འདི་ཚུ་གསུངས་བཞུགསཔ་ད་ ཁོ་གི་ཡུམ་དང་སྐུ་མཆེད་དེ་ཚུ་ ཁོ་བཞུགས་སའི་སྒོ་ཁར་བྱོན་ཏེ་ ཕྱི་ཁར་ལུ་ཡར་བཞེངས་བཞུགས་སྦེ་ ཡེ་ཤུ་ལུ་ཞུ་བ་གཏང་ནུག 32མི་དམངས་ཁོ་བསྐོར་རི་རྐྱབ་སྡོད་མི་ཚུ་གིས་ ཁོ་ལུ་ཞུ་ནུག་ གཟིགས་ལགས་ ནཱ་གི་ཡུམ་དང་སྐུ་མཆེད་ཚུ་གིས་ ཕྱི་ཁར་འཚོལ་དེས་ཟེར་ཞུཝ་ད། 33ཡེ་ཤུ་གིས་ཁོང་ལུ་ ངེ་གི་ཡུམ་དང་སྐུ་མཆེད་ཚུ་ག་སྨོ་ཟེར་གསུངས་ཞིནམ་ད། 34དེ་ལས་ཁོ་གིས་ཡར་གྱལ་སྒོར་སྡོད་མི་ཚུ་ལུ་གཟིགས་ཏེ་ བལྟ་ཞིག་ ཨ་ནཱ་ཡོད་མི་དེ་ཚུ་ངེ་གི་ཨའི་དང་སྤུན་ཆ་ཚུ་ཨིན། 35ག་ཅི་སྨོ་ཟེར་བ་ཅིན་ དཀོན་མཆོག་གི་ཐུགས་དགོངས་དང་བསྟུན་ཏེ་འབད་མི་འདི་ ངེ་གི་ནུ་གཅུང་དང་ ངེ་གི་སྲིངམོ་དང་ ངེ་གི་ཨའི་ཨིན་ཟེར་གསུངས་ནུག།

Obecnie wybrane:

མཱར་ཀུ་ལེའུ་ 3: dzoD

Podkreślenie

Kopiuj

Porównaj

Udostępnij