Malaki 2
2
Nyambi ya Ngula ukunyanca bakankombela
1Nyambi wa Makunge uli na kwamba ku bakankombela ngayi, “Ebye nibyo nikumitumiza. 2Mu ku fwanina kundemesha na biya mu kutenda. Ndi mu kubula kuyuvwa kunebye nikwamba na kumpana maleema, pe nikamikuta. Nikakuta na bitandalisho biya mukatambula. Mwa shikuma nabikutakale, ndaba munabulu kwombatala na mutima wenu nimwawo. 3Monenu, nikashushula bana benu na kulamba zimpala zenu wutoko wa bimuna baya mwakombelelanga, pe nikamifumisha ku meho wami. 4#Kul 3:11-13. Niho mukalimuke ngayi, Ami natumu kukwenu eze ndayano, ngayi kulimama kwami na bazukulya Levi mwanga kushume.” Nisho anamba Nyambi wa Makunge.
5 #
Kul 25:12. Nyambi wa Makunge ukwamba ngayi, “Kulimama kwami na Levi kwengile kulimama kwa wumi na ku mwena, ndayano nazipanine kukwendi ngayi mwanga ekale na bowa, mu matena ayo wampaninenga maleema. 6Mukanwa kendi mwekalile kufundiziza kwa kupwisha, byabibi kaliha byawaniwile ha mivumbo yendi. Wendelenga na nami mu ku mwena namu kulunga, pe watengulwile babengi kufuma ku byabibi. 7Wunengi mulimo wa bakankombela ku longesha kalimukisho ka Nyambi. Bantu bafwanina kuya kukwabo na kulilongesha ebye nikushinga, ndaba nibo bantumwana ba Nyambi wa Makunge. 8Ngoboni enu bakankombela munashanuku munzila ya kupwisha. Bilongesha byenu binaleteshe babengi ngayi bapukazale. Munabipishi kulimama kwami na Levi. Eshe nisho anamba Nyambi wa Makunge. 9Haya nikaletesha ngayi ukekale wakuhanduliwa ku matunga nimwawo, ndaba kulama zinzila zami mufwako, ngoboni mwamoneshanga shihota mu ku longesha kwenu.”
Kubula kukulupila kwa Baishalela kuli Nyambi
10Nimwetu kati kaliha tatiyetu umo ndi? Kati kaliha Nyambi umo watulengele ndi? Haya shumangani tukubula kuli kulupila ku umo na wamina na ku handula kulimama kwa Nyambi alimamine na batatizetu? 11Yunda wakubula kukulupila, pe byuma bya kuletesha wunyengwe bili na kutendiwa mu Ishalela namu Yelushalema. Bantu ba Yunda banahandulu Litala lya Nyambi ya Ngula, elye ahaka ha kuyeka bambuyama bakakulemesha banyambi bashenge. 12Muntu nimwendi wakutenda noho, Nyambi ya Ngula amufumishe mukati ka bazukulya Yakobo. Hinge ndi ukushinga kutupula ntupu kuli Nyambi wa Makunge, kowa nzila enze akatende noho.
13Shuma shamina mwatendanga eshe, mwazabishanga kaala ka Nyambi ya Ngula na mihozi, mwapwezumanga na kulila, ndaba Nyambi nalehe kutambula zintupu ziya mu kutwala kukwendi. 14Mukwipula ngayi, “Kati shumangani a kubula kutambwila zintupu?” Nyambi ya Ngula unamono kubula kwoloka kwobe kuli mukazobe uya wayekele oho ushili ndumbana. Hinge ndi niye wengile minobe na mukazobe walimamine nendi. 15Kati Nyambi ya Ngula kaliha wamilengele, obe na mukazobe kwinga lutu lumo na moyo umo ndi? Shumangani munengi umo? Ndaba washingilenga bana bamu wunyambi. Nohobene lilamenu enu bamwine na kwinga wakukulupiliwa ku mukazi wa wundumbana wobe. 16Nyambi wa Makunge, Nyambi wa Ishalela ukwamba ngayi, “Nazimba bakakulilubula mu maluwo. Nazimba mukakulifwika mushunga ngo shivwalo. Haya keyenu, hinga mwinga bakubula kwoloka ku umo na wamina.” Nisho anamba Nyambi wa Makunge.
Mutena wakuyatisha uli hahepi
17Muna kwangishi Nyambi ya Ngula na nyambilo yenu mukwamba ngayi, “Tunamukwangishi nahiti?” Oho mwambanga ngayi, “Muntu nimwendi ukutenda byabibi wamuwahe ku meho a Nyambi ya Ngula, pe kami uku wahilila mumwabo.” Mwepulanga kami ngayi, “Kati uli kuti Nyambi mukakutenda bya kupwisha?”
Obecnie wybrane:
Malaki 2: LLK
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Libuka Lya Kuyela © Bible Society of Zambia, 2020.