Isaya 43
43
Mulungu yakwihuwiza vyono kowaponya wanhu wakwe
1Nye nyo Isilayeli,
u Muwaha Mulungu mono yawawumba,
yakutya nhavi, “Mulece kogopa,
hambi nha nakondya kumukombozenyi.
Kanyhi nimucemenyi ‘Wuli wangu.’
2Na kolo mukukola mu malenga matali,
ane nowa nili hamonga nanye.
Ne magayo genyu, hamba si gomugubizenyi yaye.
Na kolo mukukola mu moto, hamba si mopya yaye,
ne majelo mawaha muno, hamba si gomusumizenyi yaye.
3Hambi 'ne nha yo nene Muwaha Mulungu,
u Mulungu wenyu,
u Mulungu mono yelile wa Isilayeli mono yakumuponyenyi.
Nane noyilavya Misili, yiwe 'kombo so nyenye,
nayo Kushi na Seba, nazo nozilavya nhavivyo,
ku soko yenyu, anye ho muwe welecele.
4Ne makungugo gose, nogaleka,
ho mhonye wumi wenyu,
hambi anye nyo Isilayeli,
nha muli wo wuguzi wukamu kuli'ne,
nane nghamwendenyi no kumupelenyi lilumbo.
5Holeka mulece kogopa,
hambi ane nha nili hamonga nanye!
‘Nane nowakonghola no kuwagomola
wo lulelo lwenyu ku wulawa kutali ku lubavu lwa kucilima,
sunga ko ku lubavu lwa kumwezi.
6Noyilonjela mhelo ye sumuka yiwalece wawuce kuko,
nayo mhelo ye takama yilece kuwemila yaye.
Muwalekaje wanhu wangu wawuye hamonga
ku wulawa mu ma'si go kutali, na mu yinze yose.
7Hambi nha wanhu wangu nene
ane nawawumba ho wamhele lukumyo.’ ”
Waisilayeli wo wuhomelezi wo Muwaha Mulungu
8U Mulungu yakutya,
“Waletenyi ku wuling'anizwe wanhu wangu.
Hambi nha wena meso, ninga hamba si wakuwona yaye,
wena ne makutu, ninga hamba si wakuhulika yaye!
9Waletenyi makungugo gose ku wuling'anizwe.
Hambi milungu yawo ya hayi yono yosuma
kuzilonga ze vilo vyono vikuza?
Hamba milungu ya hayi ya muli yene
yono yosuma kuzilonga zono zikwijela aluno?
Ale, muyilekaje ta milungu yiyo, yiwahomelele
hono mbeka wali ling'ani
yihomelele i mbeka ye zinghani zawo,
ne wanhu kolo wakuzihulika, watye ‘Heya za mbeka.’ ”
10Nye nyo wanhu wa Isilayeli, anye yo nyenye
wuhomelezi wangu.
Ane namuhagulenyi ho muwe wetumami wangu,
ho mumanye 'ne no kunyihuwila
kanyhi ho mumanye nha vyono yo nene du
Mulungu nili wene.
Na kanyhi mumanye nha vyono hasina mulungu
yunji ku wulawa katali, hamba mono
kolowa, langa yo nene du.
11“Ane yo nene du Muwaha Mulungu,
yo nene du mono nosuma kumuponyenyi.
12Ane yo nene mono namulonjelenyi
zono zolomwijelelenyi,
hanyuma nghaza nimuponyenyi.
Na hasina hamba mulungu yunji mujenzi mono yetuma zizi,
nanye yo nyenye mono muli wahomelezi wangu.
13Ane nili Mulungu,
na nojendelela vilo vyose kuwa yo nene du Mulungu.
Na hasina munhu wo wose mono kokwiponya
mu vilungo vyangu.
Kanyhi hasina munhu wo wose mono kosuma
kuzikawaniza zono nitumaga.”
Wisukule we Waisilayeli ku Babiloni
14Mulungu mono yelile wa Isilayeli,
u Muwaha Mulungu mono yakuwa kumuponyenyi yakutya nhavi,
“Ane notuma lipuga lye wasilikale ku Babiloni ho wamuponyenyi.
Nogabenanjiza malango ge likaya,
ne lizozo lye nyemo lye wanhu walyo,
lyopituka liwe cililo.
15Hambi ane, nha yo nene Muwaha Mulungu,
u Mulungu wenyu mono yelile.
Yo nene mono nakuwumba 'gwe Isilayeli,
kanyhi yo nene no mutemi wenyu.”
16Katali Muwaha Mulungu yanoza nzila mwi'lenga,
yakanoza wukolo mu malenga mawaha.
17Yakalyongomeza lipuga liwaha muno lye wasilikale
we vilungo. Lipuga lyono lyali lina matuka go
wulugu hamonga ne zifwalasi.
Wakagwa, hamba si wolokwinucila lukulu kanyhi,
wakajililila lukulu nho wuzelu we tala
yono yakondya kuzimywa.
18Ninga Muwaha Mulungu yakutya,
“Mulece kuzikumbucila zinghani zinongozi
zono zakondya kupuluta,
hamba kwihwesa zinghani ze katali.
19Langa, muzilanjililaje zinghani zimhya
zono nozituma.
Nazo nha zakondya kwijela, nanye mosuma
kuziwona lulu!
Ane nosesa nzila yikolele mwi nyika,
nimupelenyi ne makolongo ge malenga
gahulume mumo.
20Nane kolo nakondya kutula makolongo gakuhuluma
mu nyika, no kuwapela malenga i wanhu wangu wahagulwa,
ale baho, sunga ne malimu gose ga mu mbago
nago ho gomhela cogopo,
nazo zinyhewe ne zinyacihema
zonghumya nene.
21Hambi wawa nha wo wanhu wono nenozeza
nene no mweneco,
nawo wowa kwimba zo lukumyo lwangu!”
U wubi we Waisilayeli
22U Muwaha Mulungu yakutya nhavi,
“Ninga anye nyo nghungugo ya mwali Isilayeli mwakondya kunghatala,
kanyhi hamba si mwendaga no kuhemba nene.
23Hamba si mwasakaga no kundavizya vilavywa
vinyanywe vye zingholo,
hamba si mwali mwendile kumhela cogopo
mu nzila ye makumbiko genyu.
Ane nha si namukatazajenyi so wusaka kuli'nye vilavywa,
hamba kumukatazajenyi so wufusa wuvumba.
24Nanye hamba si mwangulila wuvumba yaye,
hamba kunyigutya ne mhama ye mitugo zenyu.
Langa anye mwamhela mutegulo muzito muno
wo wubi wenyu,
mukasakaza ne zimbi zono mwetuma.
25Ninga hamba nhavivyo, ane yo nene Mulungu
mono nghuwunenela wubi wenyu.
Nane nghuzinoza zizi vyono nili Mulungu.
Hamba si nowukumbucila kanyhi no wubi wenyu.”
26“Alu, cibitane ku mahakama,
muwutegule kuko wusonjezi wenyu!
Mulolose nghani zenyu, mulajile nha vyono
muli ling'ani!
27U mulezi wenyu mulongozi hamonga
ne walongola wenyu, wose nha wetuma wubi kuli'ne.
28Sunga ne watemi wenyu,
nawo wakahavufya i hanhu hangu hono helile.
Holeka ku soko yiyo,
nane nghaleta wongomezwe kuli Isilayeli.
Nghawaleka wanhu wangu Isilayeli watovulwe.”
Cigogo Bible © Bible Society of Tanzania, 2002.