Wɔrɔmi ye 4
4
Abirahami fɛ̀ɛ́w kéele
1Nyàʔá si wolo a joo Abirahami kéeli na, wi lè wolo tóolɛɛw céri kàbaan na? Mɛ̀ɛ́ ki baa pye wi ma n sɛ́ɛ? 2Kapye Abirahami maa sínni taa kapyegèle báriga ni, tànʔa mǎà dée pye wi ma bàā wiyɛɛ gbɔ́ʔɔgi. Kàjáa tànʔa da pye wi ma bi wiyɛɛ gbɔ́ʔɔ Kolocɔlɔɔ yɛ́ʔɛ ma í. 3#Sél 15:6; Gal 3:6 Nyàʔá Kolocɔlɔɔ syɛɛnsɛbɛri joo? Ti n jo: «Abirahami n tága Kolocɔlɔɔ na, a Kolocɔlɔɔ gee bee córo wi ma sínnɛ.» 4Syɔ́ɔnwee wi báara lè sàra na, pe o wi sàraw córo yakanʔa í, fwɔɔ fwɔɔtɔnrɔ. 5Wee si wi lè wi ga yarigaa kpéʔele Kolocɔlɔɔ ma í, níì tága wi na, woro wee wi sínni kaangi lè woro yɛ́ʔɛnaa-sìnvyaabèle ma, wi n syɔ́ɔnw bee tágala córo wi ma sínnɛ. 6Kánmi bee na wee Kolocɔlɔɔ córo lè sínnɛfɔlɔ bi gi taa wi ga yarigaa kpéʔele Kolocɔlɔɔ ma í, Davidi n wɔ́ɔ̀ wee bee dùba kéele joo. 7#Ŋún 32:1-2 Níì cán wi n jo:
«Bele kakolobyere kùsulugo Kolocɔlɔɔ syɔɔ lè
níì be kapeegèle tɔ́n,
bele bee i nyɛ dùba pìibēle!
8Syɔ́ɔnwee wi lè Kàfɔw ga wi kapeebyeri córo wi ma lè í,
wee bee i nyɛ dùba pyà.»
9A yele jo lé dùbaw bee i nyɛ kɛ́nɛw fɔ̀ɔlɔ yagana wóo? Wi wɔ́ɔ o nyɛ sìngɛnɛbèle wóo ì? Níì cán wolo n gi joo n kwɔ́ɔ níì jo: «Kolocɔlɔɔ n Abirahami tágali córo wi ma sínnɛ.» 10Mɛ̀ɛ́ si wi da pye lǎlee ni Kolocɔlɔɔ li córo wi ma lè sínnɛ? A wi da kɛ́nɛw kpéʔele lé n kwɔ́ɔ láà, ba wi da kɔ́ɔ̀ wi kpéʔele í? Eʔe, wi da kɔ́ɔ̀ wi kpéʔele í, wi maa sèʔê pye sìngɛnɛ ni. 11#Sél 17:10 Koro kàdoʔo ma a wi náà kɛ́nɛw kpéʔele, a kɛ́nɛw bee pye fɛ̀ɛ bi gi tɛ̀ɛn ncan wi maa sínni taa tágali báriga ni n wi yaʔa sìngɛnɛ ni. Amɛɛ gi pye lè nya, koro na bele be tági lè ní si i nyɛ sìngɛnɛ ni, Abirahami i nyɛ bele bee myɛ tóo, jàngó sínni í wɔ́ɔ córo bele bee ma. 12Wi wɔ́ɔ i nyɛ kɛ́nɛw fɔ̀ɔlɔ tóo, bele be lè pe ga peyɛɛ daʔa pe kɛ́nɛw yagana na lè í, kàjáa pe i táanri wolo tóow Abirahami tágali kólogo ni, lee li pye wi ma lè n wi yaʔa sìngɛnɛ ni.
Kolocɔlɔɔ nyɔɔfaligi n taa tágali báriga ni
13 #
Sél 17:4-6; 22:17-18; Gal 3:29 Kolocɔlɔɔ maa wi nyɔ́ɔgi fàli Abirahami ma ní wi yòdaʔayi ní níì jo wi a ba pye dulunyanw kɔriliio, Kolocɔlɔɔ ga nyɔɔfaligi bee kpéʔele Abirahami ma Mowizi làlwaw báriga ni í, wi n gi kpéʔele wi ma sínni báriga ni, lee wi córo wi ma lè wi tágali kéele na. 14#Gal 3:18 Ki ga maa pye Mowizi làlwaw kôdanʔabéle be nyɛ kɔriliibèle, gee bee a dée tágali kaan li pye nyùngo fun, nyɔɔfaligi si pye gbanzan. 15Níì cán làlwaw wi maa ní Kolocɔlɔɔ fundanʔari ní, làlwaw si ga pye wi o nyɛ tɛ́ɛgee ni lè í, wi céemɛ o wɔ́ɔ̄ nyɛ tɛ́ɛgi bee ni í.
16 #
Gal 3:7
Gee bee na nyɔɔfaligi da kpéʔele tágali kéele na, jàngó gi pye yakaandelege, koro ga pye Abirahami yòdaʔayi myɛ í gi taa, ki si a kɔ́ pye Mowizi làlwaw kôdanʔabéle yagwɔɔlɔ wóʔo í, kàjáa bele má Abirahami tágali félege nyɛ lè, wi nyɛ lè wo myɛ tóow, ki wɔ́ɔ pye bele bee wóʔo, 17#Sél 17:5 àmɛɛ gi sɛ́bɛ lè níì jo: «Mii n mɔ télege mɔ í pye syɛɛnfeleye saʔa tóo.» Ki kɔ́rɔw wi nyɛ Abirahami wi nyɛ wolo tóow Kolocɔlɔɔ nyɛ́nɛ na, woro wee na wi tága lè, woro wee wi kúbèle nyángi ni yaari sìi na, ní i yáriri yirigi, dee di lè ti da sélì pye beè lè í. 18#Sél 15:5 Alí n gi yaʔa kéelee li da pye lè syɔɔn a gbǎn wi sɔ̀ngumi taʔa li na í, a Abirahami wi sɔ̀ngumi taʔa lee bee na níì tága gi na ncan woro a ba pye syɛɛnfele-nɛʔɛyɛ tóo, àmɛɛ Kolocɔlɔɔ da gi joo wi ma lè níì jo: «Anbée mɔ yodaʔayi a ba pye.» 19#Sél 17:17 Lǎli ni Abirahami yɛ̀ʔɛlɛ dabata félege kwɔ́ɔ lè, a wi wi céri wéle níì gi nyaa mɔ a jo ti n kùu n kwɔ́ɔ, ní wɔ́ɔ̀ gi nyaa Sara pìisee-lali n sɔ̀lɔ n kwɔ́ɔ, kàjáa kàa da yiri Abirahami tágali ni í. 20Sìndagala da pye wi fúngi ni a wi i wiyɛɛ gábala Kolocɔlɔɔ nyɔɔfaligi na í, kàjáa wi maa fànʔa taa tágali báriga ni ní i Kolocɔlɔɔ kpɔ̀ʔɔrɔ́, 21níì tɔ̀nɔ n tága gi na ncan gee nyɔ́ɔ Kolocɔlɔɔ fàli woro ma lè, fànʔa i nyɛ wi ma bi gbǎn wɔ́ɔ gi foro. 22Koro na «Kolocɔlɔɔ wi tágali córo wi ma sínnɛ.» 23Kàjáa woro nibin kéeli na ban ki da sɛ́bɛ níì jo ki n córo wi ma nya í. 24Ki maa wɔ́ɔ̀ sɛ́bɛ wolo kéeli na níì jo ki a wɔ́ɔ córo wolo ma, wolo bele wo tága wi na lè wee wi wolo Kàfɔw Zyezu nyán n yirige lè kúbèle nínge ni. 25#Eza 53:4-5 Wi maa Zyezu kaan kùúw ma wolo kapeegèle kéele na, níì wi nyán n yirige wolo sínni taala kéele na.
Obecnie wybrane:
Wɔrɔmi ye 4: CB10
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Kolocɔlɔɔ Syɛ́ɛnri © Bible Society of Côte d'Ivoire, 2008.
