Wɔrɔmi ye 11
11
Kolocɔlɔɔ ga Isirayɛli ye cée í
1 #
Filip 3:5
A gee bee jo lé Kolocɔlɔɔ n Isirayɛli ye cée? Eʔe dɛ! Níì cán mii tiimaa i nyɛ Isirayɛli ye wówaa, mii i nyɛ Abirahami yòdaʔagaa, ní wɔ́ɔ i nyɛ Bɛnzyamɛ ye wówaa. 2Syɛ́ɛnbèle Kolocɔlɔɔ da nyɛ́nɛ n wòlo lè booma ni be pye woro wòolo, wi ga be cée í. Gee wi syɛɛnsɛbɛri joo lè Elii kéeli na, yele ga gee bee cán ì? Wi maa Kolocɔlɔɔ nyɛ́ɛri Isirayɛli ye kánmi na níì jo: 3#1Fàn 19:10,14 «Kàfɔw, pe n mɔ kanyaajoobèle kpóo, ní wɔ́ɔ̀ mɔ sáriga-wòlo-yafaanyi jabagi. Mii nibin yagana wi kòro, á be i caa bi mii kpóo.» 4#1Fàn 19:18 Kàjáa nyàʔá si Kolocɔlɔɔ da joo wi ma syɛɛnlurugori? Wi maa wi pye: «Mii n nànbēle selebingéle taanri ní saala kagunɔ yaʔa niyɛɛ ma, bele be lè pe ga kpùmɔnɔ Baali taana í.» 5Anbée gi wɔ́ɔ i nyɛ tɔ́ɔliw ni, Kolocɔlɔɔ n pèle nyɛ́nɛ n wòlo n yɛlɛ ní wi kpɔ́ʔɔri ní. 6Kapye ki n kpéʔele n yɛlɛ ní kpɔ́ʔɔri ní, ki ní o nyɛ kapyegèle fɛ̀ɛ í. Kapye koro ban í, kpɔ́ʔɔri a ní dée pye kpɔʔɔrɔ í.
7Mɛ̀ɛ́ si gi nyɛ? Gee Isirayɛli ye da ni caa lè, pe ga gi taa í, á Kolocɔlɔɔ wonyɛnɛ-wòlobèle si gi taa, á wozanbèle fúnyo tɔ́n be na. 8#Làlw 29:4; Eza 29:10 Amɛɛ gi sɛ́bɛ lè níì jo:
«Kolocɔlɔɔ n be fúnyi tɔ́n,
ní wɔ́ɔ̀ nyapiigèlē kaan be ma,
gele ge lè pe o nyaagi ge ni í,
níì líiweegéle kaan be ma,
gele ge lè pe o lúro ge ni í,
fwɔɔ n baa nan níjanʔa na.»
9 #
Ŋún 69:23-24
A Davidi wɔ́ɔ̀ gi joo níì jo:
«Lìigboloyi be líi lè,
ki n yɛlɛ yoro í da be có
àmɛɛ karinyanga ní mɛɛcolo nyɛ lè,
si wɔ́ɔ pye be ma tɛɛ̀kpirigege,
ní wɔʔɔgɔ sábabu gee gi yɛlɛ be na lè.
10Ki n yɛlɛ pe nyapiigèle í tɔ́n
koro ga pye pe a kɔ́ ra nyaagi í,
pe kàdoyi si kòro woguruyo ní làrigèle myɛ ni.»
11A gee bee jo lé Isirayɛli ye n kpírige n too bi kálagi wii láà? Eʔe dɛ! Kàjáa pe kapeebyeri di pye sábabu, á syɛɛnfeleyi wozanya baa syɔɔli taa, koro ga pye yi kayaagi í pye Isirayɛli ye na. 12Amɛɛ si Isirayɛli ye kapeebyeri ní be tooli pye lè sábabu, á dulunyanw syɛɛnfeleye tɔ̀nɔkpɔɔɔ taa, pe syɔɔli ga baa foro lǎlee ni lè, tɔ̀nɔw bee a ba kpɔ́ʔɔ bi sɔ̀lɔ syɛɛnfeleyi ma.
Syɛɛnfeleyi wozanya syɔɔlɔ kéele
13Tɔ́ɔliw ni mii a joo yele syɛɛnfeleyi wozanya ma, níì cán àmɛɛ mii nyɛ lè pìituɔn syɛɛnfeleyi wozanya ma, mii i mii fáliw bee kéele kpɔ́ʔɔgi, 14koro ga pye bi kayaʔa lége mii felegefɔ-nyɛ́nbèle ni, jàngó poro pèle í taa syɔɔ. 15Níì cán àmɛɛ Kolocɔlɔɔ be yaʔa lè kɔlɔ̀ na, a gee bee pye sábabu, á dulunyanw syɛ̀ɛnnɛ baa bɛ̀ɛ ní woro ní, wi ga baa fɔ̀lɔ be na lǎlee ni lè, mɛ̀ɛ́ ki a pye be ma? Wi a be nyán yirige kúbèle nínge ni.
16Pe ga tɛ́nɛ̀ búrumii-pírigegaa wòlo n sámaga búru n kaan Kolocɔlɔɔ ma, wozangi gi kòro lè, gee bee wɔ́ɔ i nyɛ Kolocɔlɔɔ wóʔo. Tíigi nìnre ga pye Kolocɔlɔɔ wóro, ki káganyi wɔ́ɔ i nyɛ wi woyò. 17Amɛɛ si gi nyɛ lè mɔ a jo pe n káganyaa cɛnɛ n láʔala olivyew tiicɔ́rɔgɔ#11:17 pe n káganyaa cɛnɛ n láʔala olivyew tiicɔ́rɔgɔ na: Mɔ ga lóʔo tɛ́ɛgi naa ni káganyaa, yee be cɛnɛ n láʔala lè olivyew tiicɔ́rɔgɔ na, Isirayɛli ye na be nyɛ. Mɔ si ga lóʔo sìnbirigi olivye tíige káganga, syɛɛnfeleyi wozanya na be nyɛ. na, mɔ wee wi nyɛ lè sìnbirigi olivye tíige káganga, á be mɔ pwɔɔ n táriga tiicɔ́rɔgi káganya nínge ni, a mɔ baa taa ni gbo ki nǐnri lɔ̀ʔɔ na, 18ki ga yɛlɛ mɔ í da miyɛɛ nyɛ́nɛ tíigi bee káganya na í. Mɔ si i miyɛɛ nyɛ́nɛ yi na bi gi taa mɔ ban wi tíigi nyúngo tugo í, tíigi nyúngo gi mɔ tugo.
19Mɔ si a mii pye pe n káganyi bee cɛnɛ n láʔala koro ga pye si mɔ táriga yaà. 20Kányɛʔɛ gii. Kàjáa sìndagali kéele na pe be cɛnɛ n láʔala, tágali báriga ni si mɔ yére. Koro na ki ga yɛlɛ mɔ í da miyɛɛ nyɛ́nɛ í, ki n yɛlɛ maa fɛ̀ɛgí. 21Níì cán àmɛɛ gi nyɛ lè Kolocɔlɔɔ ga tíigi bee tiimaa káganya yaʔa í, wi a wɔ́ɔ mɔ yaʔa í. 22Gee bee na mi gi wéle àmɛɛ Kolocɔlɔɔ funjǎngi ní wi fundanʔari nyɛ lè, bele be láʔa n too lè, wi fundanʔari i nyɛ bele bee na, wi si i funjànga kpéʔele mɔ ma, kàjáa ki n yɛlɛ mɔ í kòro wi funjǎngi ni. Kapye koro ban í, wi a wɔ́ɔ mɔ ceri bi láʔa. 23Bele be cɛnɛ n láʔala lè, bele bee ga pye pe ga kòro be sìndagali ni í, Kolocɔlɔɔ a ní ba be pwɔɔ bi táriga yaà tíigi na. Níì cán fànʔa i nyɛ Kolocɔlɔɔ ma bi ní gbǎn be pwɔɔ táriga yaà. 24Amɛɛ Kolocɔlɔɔ mɔ ceri n láʔa sìnbirigi olivye tíige na lè, ní baa mɔ pwɔɔ n táriga olivyew tiicɔ́rɔgɔ na, bi gi taa tíiri pwɔɔganma ban bi nyɛ bee bee í, wi ga ní baa tíigi bee tiimaa káganya pwɔɔ n táriga yaà, yee bee a wári tára bi sɔ̀lɔ mɔ táraganmi na ì?
Isirayɛli ye kàdosangama syɔɔli
25Ni senyɛ̀nnɛ, mii o caa yele í kòro kalarali naa sìnján ni í, kapye koro ban í, yele a kɔ́ ra yeyɛɛ jóro sícilibēle, kalarali bee li nyɛ ncan Kolocɔlɔɔ n Isirayɛli syɛ́ɛnbèle pèle fúnyo tɔ́n bi taa syɛɛnfeleyi wozanya nyɔ́ɔ í ba foro yee yi yɛlɛ bi syɔɔ lè. 26#Eza 59:20 Kánmi bee na Isirayɛli ye myɛ a ba syɔɔ, àmɛɛ Kolocɔlɔɔ syɛɛnsɛbɛri gi joo lè níì jo:
«Syɔɔfɔw a yìri Siyɔn ma,
woro wi a ba Kolocɔlɔɔ yɛ́ʔɛnaa-sìnvyaari yirige
Zyakɔbi yòdaʔayi fúnyo ni.
27 #
Zyer 31:33-34
Mii ga baa be kapeegèle láʔa be na lǎlee ni lè,
mii joogaanni a náa foro be ma lǎli bee ni.»
28Isirayɛli ye i nyɛ Kolocɔlɔɔ nígoolo Syɛɛnjóocǎnri kàbaan na yele kéeli na. Kàjáa pe i nyɛ wi syɛɛn-nidaanmabéle nyɛ́nɛ-wòloli kàbaan na pe tofɔlɛɛyi kéele na. 29Níì cán Kolocɔlɔɔ o wi sɔ̀nguri kàragí wi yakaanyi ní wi nyɛ́nɛ-wòloli kéele na nyáana í. 30Amɛɛ gi pye lè sélimi na yele da ni lúro Kolocɔlɔɔ ma í, kàjáa tɔ́ɔliw ni Isirayɛli ye sìnloʔomi kéele na Kolocɔlɔɔ baa nyinimɛ taa yele na. 31Amɛɛ si yele da sélì pye lè, yele o lúro Kolocɔlɔɔ ma í, kánmi bee wonijanma na bele bee wɔ́ɔ̄ nyɛ tɔ́ɔliw ni, koro ga pye Kolocɔlɔɔ í wɔ́ɔ ba nyinimɛ taa be na, àmɛɛ wi nyinimɛ taa yele na lè. 32Níì cán Kolocɔlɔɔ n syɛ́ɛnbèle myɛ pínɛ n córo sìnloʔobéle, koro ga pye woro í nyinimɛ taa pe myɛ na.
Kolocɔlɔɔ bìngaataa-kpɔ́ʔɔri kéele
33 #
Eza 55:8
Ee, Kolocɔlɔɔ lɔ́ri, ní wi sícilimi n tɔ̀nɔ n nɛʔɛ gbanʔama, gee wi cán lè, láʔala o nyɛ gi na í! Syɔɔn sícilimi a gbǎn wi kérigèle cɔɔnriganma ní wi kakɔrirɔgèle cán í.
34 #
Eza 40:13
«Wìí wi a gbǎn Kàfɔw sɔ̀ngurɔ cán?
Ba wìí wi a gbǎn wi tama?
35 #
Zyɔb 41:11
Wìí wi yarigaa kaan wi ma
níì jo wi ní gi lúrugo kaan woro ma?»
36 #
1Kor 8:6
Níì cán woro má yáriri myɛ yìri, ti myɛ i nyɛ wi bárigaw ni, ti myɛ i nyɛ wi worò. Woro na nìjangbɔɔri yɛlɛ làla o làla. Amiina!
Obecnie wybrane:
Wɔrɔmi ye 11: CB10
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Kolocɔlɔɔ Syɛ́ɛnri © Bible Society of Côte d'Ivoire, 2008.
