Kapyegèle 25
25
Pɔli n wiyɛɛ kéeli tórigo Sezari ma
1Amɛɛ Fɛsitusi baa tɛ́ɛn lè wi fǎngi na Sezarikaʔa ni, a canya siin ga kwɔ́ɔ, taanri wógi na a wi kári Zyerusalɛmi ma. 2A sáriga-wòlobèle kàfɔɔlɔ ní Zyefubèle syɛɛnkpolobéle sáà Pɔli kéeli tɛ̀ɛn wi na, níì wi nyɛ́ɛri níì jo wi poro pɔʔɔ 3wí kacànna kpéʔele poro na wí tun yaà paa maa ní Pɔli ní Zyerusalɛmi ma. Pe maa peyɛɛ nyaa n jo n bɛ̀ɛ gi na níì jo poro a sa wi kpóo kólogi na. 4A Fɛsitusi si be yari, Pɔli i yaà kàsow ni Sezarikaʔa ni, ní níì jo cɛɛri ga pye woro tiimaa a lúru kári yaà, 5ní wɔ́ɔ̀ be pye: «Koro na gi yɛlɛ yele syɛɛnkpolobèle í pínɛ kári ní mii ní, kapye wi n kolo keelaa ni, pe sa li tɛ̀ɛn.»
6A wi ga canya kɔrɔtaanri wàlá canya kɛɛ félege kwɔ́ɔ yaà be níngi ni, a wi lúru n kári Sezarikaʔa ma. Koro nyǐndaligi na a wi tɛ́ɛn kútiijoo-koli na, níì be pye paa maa ní Pɔli ní. 7A wi ga nan yaà, Zyefubèle bele be yìri lè Zyerusalɛmi ma, a poro yére n wi màʔa, níì kapeeye saʔa joo n taʔa wi na, pe fanʔa si ga taa n gbàn n yi fílige í. 8A Pɔli wi wóri joo níì jo: «Mii ga Zyefubèle làlwa kéelaa cée í, mii ga wɔ́ɔ̀ kpɔ̀ʔɔrɔli kpaʔa kafuunnaa pye í, mii ga wɔ́ɔ̀ kapeelaa faala kpéʔele Sezari na í.»
9Kàjáa Fɛsitusi maa ni caa bi Zyefubèle kanidaanna kpéʔele, gee bee na wi Pɔli yíbe níì jo: «A mɔ a fɔ̀lɔ lé bi kári Zyerusalɛmi ma, koro ga pye mɔ kútiiw í sa joo nɛɛ bee mii nyɛ́nɛ na?»
10A Pɔli wi yari: «Mii i naa woyéreo ní Sezari kútiijoo-tɛ́ɛgi ni, nɛɛ naa gi yɛlɛ pe mii kútiiw joo. Mii ga kapeelaa faala pye Zyefubèle na í, àmɛɛ mɔ gi sámaga n cán lè. 11Kapye mii n kolo, wàlá n kapeelaa kpéʔele, lee li yɛlɛ lè ní kùu ní, mii a kùúw cée í. Kàjáa kapye kányɛʔɛ o nyɛ kérigèle ni pe joo n taʔa mii na lè í, syɔɔn faala a gbǎn mii kaan be ma í. Koro na mii caa ye mii tórigo Sezari ma woro í sa mii kútiiw kéele cɔɔnri.»
12A Fɛsitusi joo ní wi dɛ̀ɛmɛfɔbèle ní, ní náà Pɔli pye: «Amɛɛ mɔ jo lè mɔ a kári Sezari ma, woro má mɔ a kári kɛ.»
Pe n pan ní Pɔli ní Agiripa ní Berenisi ma
13A canyaa ga kwɔ́ɔ, a fànʔafɔw Agiripa pan Sezarikaʔa ma, woro ní cewaa ní be yiri lè Berenisi, bi ba Fɛsitusi syáanri. 14Amɛɛ be canya saʔa kwɔ́ɔ yaà lè, a Fɛsitusi kɔ́ɔ̀ Pɔli kéeli joo n tɛ̀ɛn fànʔafɔw na níì jo: «Felikisi n nànwaa yaʔa naa kàsow ni. 15Lǎli ni mii kári Zyerusalɛmi ma lè a sáriga-wòlobèle kàfɔɔlɔ ní Zyefubèle wólɛɛbéle sáà keelaa joo n taʔa wi na, ní i caa mii í jo wi n kolo, si wi kaan poro ma. 16A mii be yari: ‹Wɔrɔmi ye kalɛɛlɛ ban li nyɛ bi syɔɔn kaan syɛ́ɛnbèle ma í, fwɔɔ wi ní wi kútiikuun-nyɛ́nbèle í pínɛ joo peyɛɛ nyɛ̀nɛ na.› 17Gee bee na pe baa peyɛɛ gbóʔoro nɛɛ naa. Mii ga gi yaʔa a gi mɔn í, ki nyǐndaligi na a mii fala n sáà tɛ́ɛn mii kútiijoo-koli na níì jo paa maa ní nǎnw bee ní. 18Lǎli ni wi kútiikuun-nyɛ́nbèle yìri n yére lè, ní i kérigèle nyuu ni taari wi na, kapeegèle gele mii da ni sɔ̀ngí wi n kpéʔele lè, pe ga joo n nan lee bee làa faala na í, 19fwɔɔ a mii gi nyaa pe i peyɛɛ gábala poro tiimaa Kolocɔlɔw kpɔ̀ʔɔrɔlɔ kéele na, ní nànwaa kéele na, wee be yiri lè Zyezu, wi n kùu, á Pɔli si jo wi n nyán ni nyɛ sìi na. 20Amɛɛ kàkabalagi bee da mii fúngi wɔ́ɔ lè, a mii wi yíbe kapye wi a fɔ̀lɔ́ kári Zyerusalɛmi ma wi kútiiw í sa joo yaà. 21Kàjáa a Pɔli jo pe gi yaʔa fànʔafɔgbɔɔw Sezari í sa woro kútiiw kéele cɔɔnri. A mii si jo paa wi kɔ̀rɔsíi bi taa mii í kɔ́ wi tórigo yaà wi ma.»
22A Agiripa gi joo Fɛsitusi ma níì jo: «Mii i caa bi wɔ́ɔ nǎnw bee syɛ́ɛnrɛ lóʔo.» A Fɛsitusi wi yari: «Nyɛ̀ʔɛna wi a joo mɔ í lóʔo.»
23Ki nyǐndaligi na a Agiripa ní Berenisi ga pan fànʔafɔbèle panganma na, n fàra sùlasiibèle kàfɔgbolobéle na ní kěgi syɛɛnkpolobéle ní, n baa jée kútiijoo-tɛ́ɛgi ni, a Fɛsitusi tun a be pan ní Pɔli ní. 24Lǎli bee ni a Fɛsitusi jo: «Agiripa, mɔ wee wi lè fànʔafɔw, n fàra yele bele myɛ na ye naa lè ní wolo ní, yele n nǎnw naa nyaa, Zyefu-syɛ́ɛnmi myɛ maa nan mii na Zyerusalɛmi ni wi kéeli na, ní wɔ́ɔ̀ pan mii ma nɛɛ naa, ní i yákpogèle wáa níì jo, wi ga yɛlɛ wi kòro sìi na í. 25Kàjáa mii tiimaa ga gi nyaa a wi yarigaa kpéʔele gee gi yɛlɛ lè ní kùu ní í. Amɛɛ si wi jo lè fànʔafɔgbɔɔw í woro kútiiw kéele cɔɔnri, koro na mii jo mii a wi tórigo yaà. 26Mii si ga yarigaa faala taa bi sɛ́bɛ tórigo fànʔafɔgbɔɔw ma wi kéeli na í. Gee bee na mii wi yirige n baa yérige yele níngi ni, mɔ tiimaa yɛ́ʔɛ ma Agiripa, mɔ wee wi lè fànʔafɔw, koro ga pye wi yíbeli kàdoʔo ma gee mii yɛlɛ bi sɛ́bɛ lè mii í gee bee cán. 27Níì cán bi kàsolewaa tórigo yaà bi gi taa gee wi kpéʔele lè mɔ ga gi fílige n tɛ̀ɛn í, gee bee o nyɛ katimanana mii nyɛ́nɛ na í.»
Obecnie wybrane:
Kapyegèle 25: CB10
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Kolocɔlɔɔ Syɛ́ɛnri © Bible Society of Côte d'Ivoire, 2008.
