Ŋúnuyɔ 102
102
Fùrɔgɔfɔli dìgire náarigɛ gè
1Fùrɔgɔfɔli náarigɛ gī, bà wi ŋɔri ti 'kúɔ dè, a wiī nɛ dìgire nyu dè Yewe mɛ́ wè.
2Yewe yo, ma mi náarigɛ lúʔu gè,
dí mi kòkuulo ni‑ sí nɔ̀ muɔ nɛ̄.
3Fǎga kàduʔu wáa mi mɛ́ mi funbiɛnrɛ cɛngɛ nī gèʔ !
Ma líiye cáan m'mɛ́ cɛngɛ gíì mi nɛ kòkuulo wáari lè !
Ma lúʔu mi mɛ́ fáari !
4Nɛ́ ki cɛ́n mi cɛnyɛ yiī nɛ tòrí majo wírige gī,
mi káceye yiī nɛ sórigi majo kàsunnɛganʔana gīɛlɛ.
5Mi fungo kiī bɛ̀ nyàʔa tíɛlɛ gàa pe 'ceri nɛ̀ cáan a ki 'waʔa gè,
mi nɛ fìʔɛ bè mi suro lìi dè.
6Mi funyaʔa nī gè mi níɛ cíɛn yékpogbuɔlɔ nī,
mi céri ti 'waʔa nɛ̀ tári mi káceye nɛ̄ yè.
7Mi yē bɛ̀ luʔɔ nyápɔrigɔ tíɛlɛ gàa gī baa waama kùlo nī lè,
nɛ́ ní bɛ̀ gbòdofinige tíɛlɛ gàa gī gunduuro nī dè.
8Mi nɛ súɔn sìnŋɔni nī,
mi yē bɛ̀ sínjapile tíɛlɛ nàa niī tɛ́ninɛ nìi nigbe saʔa naamɛ gè.
9Mi leguulo peli nɛ mi teri súuri níɛ pìye nyíɛnɛ mi nɛ̄,
níɛ ki caa bàli nɛ̄ peli nɛ dɛ́ngɛ nyu wè nɛ wáari wè,
pe‑ puu bɛ̀ mi tíɛlɛ.
10Mi yē nɛ cúnʔɔ líi gè bɛ̀ suro tíɛlɛ,
mi yéturo tiī nɛ nyaʔami mi lagbuʔɔ nī gè#102.10 Wéli baa 42.4; 80.6.,
11Yewe, muɔ fundanʔanigɛ nɛ́ muɔ funyɛrigɛ kire kɛnmɛ nɛ̄
muɔ 'mi yɛ̀gɛ nɛ̀ mi wáa liilige.
12Mi cɛnyɛ yiī nɛ kúu nɛ waa bɛ̀ cɛnguʔɔ nyúmɔ tíɛlɛ,
mi yē bɛ̀ nyàʔa tíɛlɛ gàa ki 'waʔa gè.
13Nɛ̀ ki yaʔa Yewe, muɔ wè,
muɔ yē tɛ́niwɛ muɔ kùlofɔlilɔ kácunʔɔ nɛ̄ gè súuri;
pe béri sɔ̀ngí de taʔa nɛ́ muɔ ní kɛ̀ngɛlɛ ke mìɛni nī.
14ʔaan, muɔ bé yɛ̀ bè nyinimɛ taa Siyɔn kàʔa nɛ̄ gè.
Lɛ̀lɛ ni 'nɔ̀ ma kpuʔɔrɔ taʔa dè ki nɛ̄,
nɛ́ ki cɛ́n lɛ̀lɛ náà muɔ yé tɛ́ngɛ lè, ni nyɛ́nì nɔ̀.
15Nɛ́ ki cɛ́n weli bèle, muɔ baakuɔlɔ bèle,
Siyɔn kàdɛniyɛ yi nyɛ́nì pe dɛ́ni,
piyē nɛ nyinimɛ tari ki gunduuro puuro nɛ̄ gè.
16Bà ki bé kpíʔile kùlogolo ke béri Yewe míʔɛ fìʔɛ́ gè,
duniya kùlofɔlilɔ pe mìɛni béri tɔ́ri nɛ́ muɔ kpuɔmɔ ní bè,
17a Yewe kɛ́nì koli nɛ̀ Siyɔn kàʔa faan gè bè wi kpuɔmɔ tìɛ bè.
18Wi bé wi yiʔɛ yiʔɛ gè fuunmɔfɔli náarigɛ kɔli mɛ́ gè,
wiǐ cíi wi náarigɛ nɛ̄ gèʔ.
19Tire dáà ti mìɛni 'yɛli ti‑ sɛbɛ
kɛ̀ngɛlɛ ke mìɛni mɛ́ gàli ke báan gèle,
kire ga buu bàli pe bága sii bèle,
peri Yewe gbùʔɔrɔ́ wè.
20Nɛ̀ Yewe yaʔa baa wi saawalidɛngɛgɛ nī gè naamɛ gè,
nyìʔɛnɛ nī lè,
wi nyɛ́nì nyùgo cùungu gè a wi 'dàala wéli lè,
21bè kasuulebile pe cíɛnmɛ lúʔu bè,
bè pe suɔ bàli pe yé tɔ́n pe‑ kùu siri wè,
22kire ga buu Yewe míɛkpuʔɔ ki de tòbiló Siyɔn kàʔa nī gè,
dí siɛnnɛ peri wi gbùʔɔrilɔ ŋúnuyɔ ŋú yè Zerizalɛmi kàʔa#102.22 A muɔ 'lúʔu Siyɔn kàʔa nɛ́ Zerizalɛmi kàʔa ní, kànugo gī. nī gè,
23a kùlogolo siɛnnɛ nɛ́ kùlofɔlilɔ pe kɛ́nì pìye gbuʔulo bèle
bè Yewe gbùʔɔrɔ wè.
24Wi 'mi ŋɔri kúɔ dè mi sìi sunʔɔmɔ nī bè, nɛ́ mi cɛnyɛ weri yè.
25A mi 'jo: «Mi Kulocɛliɛ, fǎga mi líɛ mi sìi cɛnyɛ sunʔɔmɔ nī bèʔ,
muɔ ŋáà wī muɔ yiʔɛlɛ ke mɔgi kɛ̀ngɛlɛ ke mìɛni nī gèle.
26Kiī faʔa, muɔ 'dàala kàkpuɔnnɔ kɛ́n bèle;
nyìʔɛnɛ niī muɔ kiyɛ yakpiʔilige.
27Nyìʔɛnɛ nɛ́ dàala ni bága kúɔ, nɛ̀ ki yaʔa muɔ bé puu baa súuri.
Tire ti mìɛni bága liɛ bɛ̀ burudo tíɛlɛ;
muɔ bé ti yiʔɛ majo bɛ̀ siɛn cî burudo yiʔɛ dè, tiǐ ní puu bileʔ.
28Muɔ wè, muɔ yē ŋàa wi yē wè, muɔ wè nɛ yiʔi nɛ nyaʔaʔ#102.28 Wéli baa Yir 3.14; Eza 41.4; 43.11,13; 48.12.,
muɔ yiʔɛlɛ ke wè nɛ kúu nɛ nyaʔaʔ púloʔ#102.28 Koliyo 26-28 tiʔɛ nɛ̄ gè, ki 'juu baa Eb 1.10-12..
29Muɔ baakuɔlɔ pìile bèle, pe bé kòridiʔɛ taa,
pe siimɛ pi bé tɛ́ni muɔ yiʔɛ mɛ́ yanyige nɛ̄.»
Obecnie wybrane:
Ŋúnuyɔ 102: sev
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© (Active), Wycliffe Bible Translators, Inc. All rights reserved.