रोमियों 15
15
दूज्जेयां री उन्नति करो
1असी जाणदे कि इन्हा गल्लां कने कोई फर्क नी पैंदा, इधेरे तांइ असी जे विश्वास बिच मजबूत हिन, कमजोरां मणूआं री मदद करण, ना कि अपणे आप जो खुस करण। 2असा जो अपणे संगी विश्वासियां रे भले तांइ सोचणा चाएदा। ते से चीजां करणी चाएदी जिस कने से मणू खुस हुंदे, ते दुज्जेया री मदद करणी चाएदी, ताकि तिन्हेरा विश्वास मजबूत हो। 3किजोकी मसीह यीशु ने अपणे आप जो खुस नी कित्तेया, पर जिय्यां पवित्रशास्त्र बिच लिख्खे रा है:
“जिन्हा लोक्कां ने तेरी बेज्जती कित्ती,
तिन्हा ने मेरी भी बेज्जती कित्ते री है।”
4जिन्नी गल्लां पैल्ले पवित्रशास्त्र बिच लिख्खी गे री हिन, से असा जो शिक्षा दैणे तांइ ही लिख्खी गे री हिन, कि असी सबर ते पवित्रशास्त्र का मिलणे वाले प्रोत्साहन कने ए आस बणाई रखण, कि परमेश्वर ने वादा कित्ते रा है तिसजो तिन्हा ने पूरा करणा। 5मैं परमेश्वर का प्रार्थना करदा कि से तुसा जो सबर ते सांती दे ताकि तुसा अप्पु मिते मिली जुली होई करी रेई सको, जिय्यां कि असा जो मसीह यीशु विश्वास बिच करणे वालया जो जचदा भी। 6ताकि तुसा सारे कठ्ठी करी असा रे परमेश्वर री बड़ाई करो जे असा रे प्रभु यीशु मसीह रे पिता हिन।
सब तांइ खुशखबरी
7इधेरे तांइ तुसा इक्क-दूए जो अपणाई लेयो जिय्यां मसीह यीशु ने तुसा जो ग्रहण कित्ते रा है, ताकि मणू परमेश्वर री महिमा करण। 8मैं तुसा जो बोलदा, कि मसीह यीशु यहूदी लोक्कां रे दास रे रुप बिच आए, ताकि से ए ज़ाहिर करी सके कि परमेश्वर विश्वासयोग्य हिन, ते तिन्हा वादेयां जो पूरा कित्तेया, जे परमेश्वर ने तिन्हेरे पूरखां कने कित्ते थिये। 9अते गैर यहूदी जाति भी दया री वजह कने परमेश्वर री तारीफ करे, जिय्यां कि पवित्रशास्त्र लिख्खे रा है,
“इधेरे तांइ मैं गैर यहूदियां अन्दर तेरी तारीफ करणी,
ते तेरे नां रे भजन गाणे।”
10पवित्रशास्त्र री अलग जगाह् बिच ए भी लिख्खे रा है,
“ओ गैर यहूदियों,
परमेश्वर री प्रजा कने खुसियां मनाओ।”
11पवित्रशास्त्र री इक्क होर अलग जगाह् बिच ए भी लिख्खे रा है,
“ओ गैर यहूदियों,
प्रभु री तारीफ करो,
ते ओ देस-देस रे सारे लोक्कों, परमेश्वर जो सराहो।”
12ते फिरी यशायाह भविष्यद्वक्ता ने पवित्रशास्त्र बिच लिख्खे रा है,
“यिशै #15:12 दाऊद राज्जा रा प्यो।रे खानदान बिच का इक्क मुंडे ने पैदा होणा,
ते तिन्हा ने गैर यहूदी जाति रा शासक बणना,
गैर यहूदियां ने तिन्हा पर आस रखणी कि तिन्हा ने तिन्हा लोक्कां जो बचाणा।”
13मैं आस दैणे वाले परमेश्वर का प्रार्थना करदा, कि तुसा जो विश्वास करणे बिच पूरे तरिक्के खुसी ते सांती दे, ताकि पवित्रात्मा री ताकत कने तुसा री उम्मीद बदधी जाओ।
पौलुस री योजना ते निजी नमस्ते
हिम्मत कने लिखणे री वजह
14ओ मेरे संगी विश्वासियों, मैं अप्पु ही तुसा रे बारे बिच पक्के तरिक्के कने जाणदा, कि तुसा अप्पु भी भलाई कने भरपूर हिन, ते जे गल्लां परमेश्वर जे तुसा का चाह्ंदे, तिन्हा जो जाणदे, ताकि इक्क दूए जो सिखाई सको। 15तां भी मैं किच्छ गल्लां तुसा जो याद दुआणे तांइ खुली करी लिख्खी। ए तिस अनुग्रह री वजह कने होया, जे परमेश्वर ने मेरे जो दित्ते रा है, 16कि मैं गैर यहूदियां तांइ मसीह यीशु रा दास होई करी, परमेश्वर रे सुब बसेख री सेवा इक्क पुरोत्त सांई करां। ताकि मैं तुसा गैर यहूदियां जो पवित्रात्मा रे जरिये पवित्र कित्ते रे इक्क कुर्बानी सांई परमेश्वर जो चढां जिस कने से खुस हुंदे। 17मैं मसीह यीशु री वजह कने परमेश्वर री सेवा पर गर्व करी सकदा। 18किजोकी जे कम्म मसीह यीशु ने मेरे जरिये कित्ते रे हिन, तिन्हा री वजह कने मैं हिम्मत कने बोल्ली सकदा, कि मैं गैर यहूदी लोक्कां जो प्रभु री हुकम मनणे तांइ प्रभावित करी सकदा। तिन्हा ने मेरा बसेख सुणी करी, ते मेरे कम्मां जो दिख्खी करी मसीह यीशु बिच विश्वास कित्ता। 19जे ताकत पवित्रात्मा ने मेरे जो दित्ते री है, तिस कने मैं चिन्ह-चमत्कार दिखांदा। इधेरे तांइ मैं यरुशलेम का लेई करी इल्लिरिकुम प्रदेश तिकर जित्ते भी गेया, तित्ते लोक्कां जो मसीह यीशु रा सुब बसेख सुणाया। 20पर मेरे मन री चाह्त ए है, कि जिस-जिस जगाह् बिच मसीह यीशु रा सुब बसेख नी सुणाया गेया, तित्ते ही सुब बसेख सूणां। ताकि इय्यां ना हो कि इदेइ जगाह् पर कम्म करां जित्ते कुसकी होर ने पैल्ले का कम्म सुरु कित्ते रा हो। 21पर जिय्यां पवित्रशास्त्र बिच लिख्खे रा है, तिसजो पूरा करणा चाह्ंदा,
“जिन्हा का तिन्हेरा सुब बसेख नी पूज्जे रा है,
तिन्हा ने ही दिखणा,
ते जिन्हा ने नी सूणेया, तिन्हा ने ही समझणा।”
रोम जो जाणे री योजना
22मैं तुसा का आणे का घड़ी-घड़ी रोक्केया गेया, किजोकी मैं तिन्हा इलाक्केयां बिच सुब बसेख सुनाणे री कोसीस करेया करदा थिया, जित्ते पैल्ले नी सुणाया गेया थिया 23पर मैं तिन्हा इलाक्केयां रे लोक्कां बिच मसीह रा सुब बसेख सूणाई दित्ते रा है, जिन्हा ने पैल्ले नी सूणेया थिया। ते अवे मैं तुसा का आई करी मिलणा जे मैं मते साल्लां का चाह्ंदा। 24इधेरे तांइ जिस बेल्ले मैं स्पेन देस जो जाणा, तां तुसा का हुंदे होए जांगा। किजोकी मेरे जो आस है कि तिस सफर बिच तुसा कने मैं मिली लेयां, ते तुसा री संगत रा आनंद लैणे का बाद, मैं चाह्ंदा तुसा मेरे जो अग्गे रे सफर तांइ मेरी थोड़ी मदद करी देयो।#15:24 इस जगाह् पर “मदद करणे” रा मतलब, खाणे-पीणे बिच ते आर्थिक मदद है। 25पर अब्बे तां मैं यरुशलेम सहर रे पवित्र मणूआं जो दान दैणे तांइ जाया करदा है। 26किजोकी मकिदुनिया ते अखाया प्रदेश रे विश्वासियां जो ए सही लग्गेया कि यरुशलेम सहर बिच रैह्णे वाले पवित्र मणूआं बिच जे गरीब विश्वासी हिन, तिन्हा जो दैणे तांइ किच्छ दान इक्कठा कित्ता जाए। 27तिन्हा ने ए सब किच्छ अपणी मर्जी कने कित्तेया। से यरुशलेम रे विश्वासियां रे कर्जदार हिन। किजोकी जां गैर यहूदी विश्वासियां ने यरुशलेम रे विश्वासियां रे जरिये परमेश्वर रे सुब बसेख री आत्मिक आशीषां जो हासिल कित्तेया, तां तिन्हा जो ए महसूस हुंदा कि तिन्हेरी आर्थिक मदद करी के तिन्हेरा कर्जा चुकाई दैण।
28इधेरे तांइ मैं ए कम्म पूरा करी के, ते तिन्हा जो ए दान पकड़ाई करी, तुसा कने रैह्णे का बाद, स्पेन देस जो जाणा। 29ते मेरे जो पता है, जां मैं तुसा का आणा ता तुसा कने मसीह री आशीषां जो सांझा करणा। 30ओ संगी विश्वासियों, असा रे प्रभु यीशु मसीह रे ते पवित्रात्मा रे प्यार जो याद दुआई करी, मैं तुसा का छन्दे करदा, कि मेरे तांइ परमेश्वर का प्रार्थना करणे बिच मेरे कने मिली करी लग्गी रेयो। 31ताकि परमेश्वर मेरे जो यहूदिया प्रदेश रे अविश्वासी लोक्कां का बचाई रख्खे, ते यरुशलेम सहर बिच रैह्णे वाले पवित्र मणू, तिस आर्थिक मदद जो पाणे का बाद खुस होई जाण, जे मैं तिन्हा का लेई जाया करदा है। 32ते मैं परमेश्वर री मर्जी कने तुसा का आं, ते तुसा री संगत बिच तरो-ताजा होई जां। 33सांती रा परमेश्वर, तुसा सबणी कन्ने रैह्ण। आमीन!
Obecnie wybrane:
रोमियों 15: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
