रोमियों 12
12
प्यार बिच नौई जिन्दगी कियां जीणी
परमेश्वर जो जिंदी कुर्बानी चढ़ाणा
1इधेरे तांइ ओ संगी विश्वासियों, मैं तुसा जो परमेश्वर रे दया जो याद दुआई करी तुसा का छन्दे करदा, कि अप्पु जो जिन्दा, ते पवित्र अते परमेश्वर जो भाणे वाले कुर्बानी रे रुप बिच चढ़ाओ। परमेश्वर री सेवा करणे रा ए ही सही तरिक्का है। 2इस दुनिया रे लोक्कां सांई मत बणो, पर तुसा रे मन रे बदली जाणे री वजह कने तुसा रा चाल-चलन भी बदलदा रे, जिस कने तुसा परमेश्वर री भली, ते ठीक लगणे वाली, ते सिद्ध इच्छा जो तजुरबे कने जाणदे रेयो। 3किजोकी जे अनुग्रह मेरे जो मिल्ले रे तिस अनुग्रह री वजह कने मैं तुसा बिच का हर इक्क जो बोलदा कि जिन्ना अप्पु जो समझणा चाएदा, अप्पु जो कोई तिसका जादा ना समजे पर जिय्यां परमेश्वर ने हर इक्क जणे जो दित्ते रा तिस विश्वास रे नाप रे हिसाब कने, ठीक समझ कने अप्पु जो तिन्ना ही समजे। 4किजोकी जिय्यां असा रे इक्क जिस्म रे मते सारे अंग हिन, ते तिन्हा सबणी अगां रा इक्क जदेया कम्म नी हुंदा, 5तिय्यां ही असी विश्वासी मणू मिली करी मसीह यीशु रे जिस्म रा हिस्सा बणी गेरे हिन, ते असी आपस बिच इक्क-दूए कने जुड़े रे हिन। 6हालांकि असा जो परमेश्वर का मिल्ले रे तिस अनुग्रह रे हिसाब कने, बखरे-बखरे वरदान मिल्ले रे हिन। तां जिस जो भविष्यवाणी करणे रा वरदान मिल्ले रा हो, तिसजो पूरे भरोस्से कने से भविष्यवाणी करणा चाएदी जे गल्लां परमेश्वर ने तिसजो दस्से री हिन। 7अगर कुसकी जो लोक्कां री सेवा करणे रा वरदान मिल्ले रा हो, तां सेवा करणे बिच लग्गी रेयो। जे अगर कुसकी जो शिक्षा दैणे रा वरदान हो, तां से शिक्षा दैणे बिच लग्गी रेयो। 8जे अगर कुसकी जो लोक्कां प्रोत्साहित करणे रा वरदान मिल्ले रा हो, तां से लोक्कां जो प्रोत्साहित करणे बिच लग्गी रेयो। जिस जो दान दैणे रा वरदान मिल्ले रा हो, ता से खुले मन कने दान दे। जिस जो लोक्कां री अगुवाई करणे रा वरदान मिल्ले रा हो, से पूरी मैहनत कने लोक्कां री अगुवाई करे। जिस जो दया करणे रा वरदान मिल्ले रा हो, से खुसी कने करेया करे। 9प्यार करणे बिच कदी कोई दिखावा ना हो, पर दिल कने प्यार करेया करो। बुराई कने नफरत रख्खो। भले कम्म करणे बिच लग्गी रेयो। 10भाईचारे रे प्यार कने इक्क-दूज्जे कने लगाव रख्खो। अप्पु-मिते इक्क दूए री इज्जत दैणे बिच इक्क-दूज्जे का बदधे चलो। 11मैहनत करेया करो ते आलसी मत बणो। आत्मिक जोस कने भरित्ते रे रेयो। पूरे दिल कने प्रभु री सेवा करदे रेयो। 12जे परमेश्वर ने असा तांइ करणा तिस आस बिच खुस रेयो, मुसीबतां बिच सबर रख्खो, प्रार्थना बिच लगातार लग्गी रेयो। 13पवित्र मणूआं तांइ जे किच्छ भी जरुरी हो, तिस अन्दर तिन्हेरी मदद करो। अजनबी लोक्कां री#12:13 ए वचन मसीह रा प्यार दिखाणे तांइ दूए विश्वासी लोक्कां री सेवा करणे ते तिन्हा जो अपणे घरे रुकाणे रे बारे बिच बोल्लेया करदा है। किजोकी तिस जमाने बिच सफर करणे वालेयां तांइ रुकणे तांइ जादा सराय नी हुंदे थिये ते बाहर रैह्णा खतरनाक हुंदा थिया। खातिर दारी करणे बिच लग्गी रेयो। 14जे तुसा पर जुल्म करदे तिन्हा जो श्राप नी पर सिर्फ आशीष ही देयो। 15खुसियां मनाणे वालेयां कने खुसी मनाओ, ते रोणे वालेयां कने रोओ। 16हर इक्क मणू कने इक्क जदेया ही बर्ताव करो, ते घमंड मत करो, पर आम लोक्कां कने संगत रख्खो, अप्पु जो जादा ही समजदार मत समझो। 17बुराई रे बदले कुसकी कने बुराई मत करो, जे गल्लां सबणी मणूआं तांइ भली हो, तिन्हेरा ध्यान रख्खेया करो। 18जित्ते तांइ होई सको, तुसा सारे लोक्कां कने मेल-मिलाप रख्खो 19ओ प्यारे लोक्कों, अप्पु कदी बदला मत लिन्दे, पर परमेश्वर जो तुसा तांइ बदला लैणे देयो, किजोकी पवित्रशास्त्र बिच परमेश्वर ने बोल्ले रा है,
“बदला लैणा मेरा कम्म है; मैं ही बदला लैणा।”
20पर जिय्यां पवित्रशास्त्र बिच इय्यां भी लिख्खे रा है,
“जे अगर तेरा दुश्मण भूख्खा हो, तां तिसजो रोट्टी खुआ,
जे अगर तिसजो त्रेह लग्गे री हो, तां तिसजो पाणी पिआ,
किजोकी इय्यां करणे कने तू तिसजो शर्मसार करी दैणा।”
21बुराई का मत हारो, पर भलाई कने बुराई जो जीत्ती लियो।
Obecnie wybrane:
रोमियों 12: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
