रोमियों 10
10
1ओ मेरे संगी विश्वासियों, मैं ए चाह्ंदा, ते परमेश्वर का मेरी ए ही प्रार्थना है कि से इस्राएल रे लोक्कां जो छुटकारा दे। 2किजोकी मैं गवाई दिंदा कि तिन्हा लोक्कां बिच परमेश्वर तांइ जोस है, पर से मणू ए नी समजदे कि परमेश्वर री सेवा कुस तरिक्के कने करणी चाएदी। 3किजोकी से परमेश्वर रे धार्मिक ठैहराणे रे तरिक्के जो नी समजदे। से परमेश्वर रे तरिक्के जो छड्डी करी, अपणे तरिक्के कने धार्मिक ठैहरणा चाह्ंदे, इधेरे तांइ से परमेश्वर री धार्मिक बणाणे रे तरिक्के जो मनणा नी चाह्ंदे थिये। 4मसीह यीशु ने मूसा रे कानूनां जो पूरा कित्तेया जिस मकसद तांइ से दित्ते गेया थिया, ताकि हर इक्क मणू जे मसीह यीशु बिच विश्वास करे, से परमेश्वर री नजर बिच धार्मिक ठैहरे।
उद्धार सब तांइ है
5मूसा रा कानून, परमेश्वर री नजर बिच धार्मिक ठैहरणे रे बारे बिच पवित्रशास्त्र बिच ए लिखदा,
“जे मणू इन्हा गल्लां जो मनदा, तिनिये तिन्हा री वजह कने जिन्दे रैह्णा।”
6पर विश्वास कने मिलणे वाली धार्मिकता रे बारे बिच पवित्रशास्त्र बिच ए लिख्खे रा है,
“अपणे मन बिच ए मत बोलदा कि मसीह जो दुनिया बिच थल्ले लाणे तांइ स्वर्ग पर कुसने चढ़णा,
7या मसीह जो मुर्देयां बिच का जिन्दा करणे तांइ, थल्ले पताल बिच कुसने उतरणा?”
8पर ए लिख्खे गे रा है,
“परमेश्वर रा संदेश, तुसा रे नेड़े है,
तुसा इस बसेख जो अपणी जुबान कने मन्नी सकदे,
जे तुसा रे दिल बिच है”
मतलब कि, ए परमेश्वर बिच विश्वास करणे रा से बसेख है, जिसेरा असी प्रचार करदे। 9जे अगर कोई भी मणू सारेयां सामणे, अपणे दिल कने यीशु जो प्रभु मन्नी लै, ते अपणे मन बिच ए विश्वास करे कि परमेश्वर ने तिन्हा जो मुर्देयां बिच का जिन्दा कित्ता, तां परमेश्वर ने तिसजो तिसेरे पाप्पां का बचाणा। 10किजोकी जां असी अपणे मन कने विश्वास करदे तां परमेश्वर असा जो धार्मिक ठैहरांदे, ते असी जिन्हा ने विश्वास कित्ते रा है, तिसजो अपणे मुँह कने मन्नी लैणे री वजह कने असी बचाए जाणे। 11यशायाह ने पवित्रशास्त्र बिच मसीह रे बारे बिच लिख्खे रा है,
“जे कोई उस बिच विश्वास करदा तिसजो शर्मसार नी होणा पैणा।”
12किजोकी यहूदी ते गैर यहूदियां बिच कोई फरक नी है। किजोकी परमेश्वर सारेयां रे प्रभु हिन, ते जे तिन्हेरा नां लिंदा, से तिन्हा जो बचांदे। 13किजोकी पवित्रशास्त्र बिच लिख्खे रा है, “हर इक्क मणू बचाया जाणा, जे परमेश्वर रा नां लिंदा।” 14“पर इसका पैल्ले की मणू प्रभु रा नां लेई करी तिन्हा का मदद मंगी सके, तिन्हा जो प्रभु बिच विश्वास करणा जरुरी है; ते इसका पैल्ले कि से तिन्हा बिच विश्वास करी सके, तिन्हा जो प्रभु रे बारे बिच सुनणा जरुरी है, ते इसका पैल्ले कि से प्रभु रे बारे बिच सूणन, कुसकी जो तिन्हा लोक्कां जो प्रभु रे बारे बिच दसणा जरुरी है।” 15ते इसका पैल्ले कि कोई तिन्हा जो प्रभु रे बारे बिच दस्से, कुसकी रा भेज्जेया जाणा जरुरी है। इधेरे तांइ पवित्रशास्त्र बिच लिख्खे रा है,
“सुब बसेख लाणे वाले मणूआं रे पैर किन्ने छैल हिन।”
16पर बड़े घट जणेया ने सुब बसेख पर विश्वास कित्ता। जिय्यां कि यशायाह भविष्यद्वक्ता ने पवित्रशास्त्र बिच बोल्ले रा है,
“ओ प्रभु, बड़े घट लोक्कां ने असा रे बसेख पर विश्वास कित्ता।”
17सुब बसेख जो सुनणे कने विश्वास हुंदा, अते सुब बसेख मसीह रे बारे बिच है। 18पर मैं बोलदा कि इस्राएल रे लोक्कां ने मसीह रे बारे बिच बसेख सुणे रा ही है। जिय्यां कि पवित्रशास्त्र बिच लिख्खे रा है,
“तिन्हेरा बसेख पूरी दुनिया बिच फैल्ली गेया,
ते तिन्हेरा संदेश, दुनिया रे इक्क कुणे का दूज्जे का कुणे तिकर पूज्जी गेया।”
19पर मैं ए बोलदा, कि ए सच है कि इस्राएल रे मणू मसीह रे सुब बसेख जो समजी गेरे हिन। जिय्यां कि प्रभु ने मूसा रे जरिये ए बोल्लेया,
“मैं तुसा यहूदी लोक्कां जो, गैर यहूदियां तांइ अपणा प्यार दिखाई करी हिर्स कराणी।
मैं बेवकूफ गैर यहूदियां रे जरिये तुसा रे गुस्से जो भड़काणा।”
20फिरी यशायाह ने बड़ी हिम्मत कने पवित्रशास्त्र बिच लिख्खेया कि परमेश्वर ने इय्यां बोल्लेया,
“मेरे जो तिन्हा लोक्कां ने हासिल करी लित्तेया,
जे मेरे जो तोप्पेया नी करदे थिये,
मैं अप्पु जो तिन्हा लोक्कां पर ज़ाहिर कित्ता, जे मेरे बारे बिच पूच्छेया नी करदे थिये।”
21पर इस्राएली लोक्कां रे बारे बिच परमेश्वर ने ए बोल्लेया,
“मैं सारा दिन, मेरा हुकम ना मनणे वाले, ते मेरे खिलाफ रैह्णे वाले लोक्कां अग्गे तिन्हा जो फिरी अपणाई लैणे तांइ अपणे हत्थ फलाई रख्खे।”
Obecnie wybrane:
रोमियों 10: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
