मरकुस 7
7
परम्परा पर चलणे पर सवाल
1इक्क दिन किच्छ फरीसी ते शास्त्रि मणू यरुशलेम सहर का आई करी यीशु रे नेड़े कठ्ठी गे। 2ते तिन्हा फरीसी ते शास्त्रि लोक्कां ने यीशु रे किच्छ चेल्लेयां जो बगैर हत्थ धोत्ते रे रोट्टी खांदे दिख्खेया। 3यहूदी लोक, खासतौर पर फरीसी मणू अपणे बुजुर्गां री परम्परा रे हिसाब कने कदी भी बगैर हत्थ धोत्ते रे रोट्टी नी खांदे थिये। 4तिय्यां ही, फरीसी बजार का कोई चीज अणी करी बगैर हत्थ धोत्ते रे नी खांदे थिये। ए तिन्हेरी परम्परा रा हिस्सा थिया जिस बिच से प्याल्ले, सुराही ते केतली जदेय भान्डेयां जो धोंदे थिये। 5इधेरे तांइ उन्हा फरीसियां अते शास्त्रियां लोक्कां ने यीशु का पूच्छेया, “तेरे चेल्ले किजो बुजुर्गां री परम्परा पर नी चलदे? तेरे चेल्ले बगैर हत्थ धोत्ते रे ही रोट्टी खाई लिन्दे।” 6यीशु ने फरीसी ते शास्त्रि लोक्कां जो जवाब दित्तेया, “यशायाह ने जे तुसा जो जे ढोंगी बोल्लेया से ठीक ही बोल्ले रा है, जिय्यां कि लिख्खे रा है,
‘ए मणू गल्लां कने तां मेरी बड़ाई करदे,
पर इन्हा लोक्कां रे मन मेरे का दुर हिन।
7इन्हा लोक्कां री भक्ति सिर्फ ढोंग है,
किजोकी ए मणूआं री गल्लां जो परमेश्वर रे हुकम बोल्ली करी सखांदे।’
8तुसा परमेश्वर रे हुकमां जो नजर अंदाज़ करी करी के अपणी ही परम्परा कने बदली दिंदे।” 9फिरी यीशु ने बोल्लेया, “तुसी अपणी परम्परा जो पकड़े रखणे तांइ बड़ी सफाई कने परमेश्वर रे नियमां जो टाली दित्तेया। 10उदारण रे तौर पर, मूसा ने तुसा लोक्कां जो परमेश्वर रा ए हुकम दित्तेया, अपणे मां-प्यो री इज्जत करो, ते जे कोई अपणे मां-प्यो री इज्जत ना करे तिस मणू जो मौत री सजा दित्ती जाए। 11पर तुसा लोक्कां जो ए सखांदे कि अपणे मां-प्यो जो ए बोलणा ठीक है कि मैं जे मैं तुसा जो दैणा थिया से मैं परमेश्वर जो अर्पित करणे री कसम खाए री है। 12इय्यां करणे कने तुसा लोक्कां जो हकीकत बिच अपणे मां-प्यो री अनादर करणा हिन सिखाया करदे। 13इय्यां ही तुसा अपणी परम्परा जो बधाणे तांइ परमेश्वर रे वचन जो रद्द करी दिंदे ते ए तुसा री मती गल्लां बिच का इक्क उदारण है।”
मणू जो असुद्ध करणे वाली गल्लां
14तां यीशु ने मणूआं जो अपणे का सद्देया अते बोल्लेया, “तुसां सब मेरी गल्लां जो सुणो, अते समझो। 15इदेयी कोई चीज नी है जे मणू अंदर का जाई करी तिसजो भिठ्ठा करण, पर जे चीजां मणू रे मन का निकलदी, से ही तिसजो भिठ्ठा करदी। 16जे सुनणा चाए, से ध्यान कने सुणे।” 17जां यीशु भीड़ जो छड्डी करी घरे अंदर गेया तां तिन्हेरे चेल्लेयां ने इस उदारण रे बारे बिच यीशु का पूच्छेया। 18यीशु ने अपणे चेल्लेयां जो बोल्लेया, “क्या तुसा भी इदेय नासमझ हिन? कै तुसा भी इसेरा मतलब नी समजदे कि जे चीजां बाहर का मणू रे अन्दर जान्दी, से तिसजो भिठ्ठा नी करी सकदी? 19किजोकी से मन बिच नी, पर पेट बिच जान्दी, अते संडास बिच निकली जान्दी?” इस तरिक्के कने यीशु ने सारी खाणे वाली चीजां जो साफ ठैहराया। 20फिरी यीशु ने बोल्लेया, “जे मणूआं रे मन का निकलदा, से ही मणूआं जो भिठ्ठा करदा। 21किजोकी मणू रे मन का, बुरी-बुरी गल्लां, व्यभिचार, चोरी, खून करणा, 22व्यभिचार, लालच, बुराई करणा, धोखा, लुचपन, हिर्स, चुगली, घमंड, अते बेफकुफी। 23ए सब गल्लां मणू रे मन का ही निकलदी अते मणूआं जो भिठ्ठा करदी।”
सुरूफिनीकी जाति री जनानी रा विश्वास
24फिरी यीशु ते तिन्हेरे चेल्ले गलील प्रदेश का निकली करी सूर अते सैदा सहर रे नेड़े रे इक्क इलाक्के बिच आए ते इक्क घर बिच गे ते से चाह्ंदे थिये कि कुसकी जो तिन्हेरे तित्ते आणे रे बारे बिच पता ना लग्गे। 25अते झट ही इक्क जनानी जिसेरी हल्की कुड़ी बिच दुष्टात्मा थी, यीशु रे बारे बिच सुणी करी आई, ते तिन्हेरे पैरां पेई गई। 26से यूनानी जनानी सुरिया जिले रे फिनिके कस्बे री थी, तिनिये यीशु रे छन्दे कित्ते की से तिन्हेरी कुड़ी बिच का दुष्टात्मा जो कड्डी दैण। 27यीशु ने तिस जनानी रा विश्वास परखणे तांइ तिस जनानी जो बोल्लेया, “पैल्ले घर रे बच्चेयां जो रजणा दे, किजोकी बच्चेयां री रोट्टी लेई करी कूत्तेयां रे मुहाग्गर पाणा ठीक नी है।” (तिस जमाने बिच यहूदी मणू गैर-यहूदियां जो तुच्छ समजदे थिये)। 28तिस जनानी ने यीशु जो जवाब दित्तेया, “सच है प्रभु; फिरी भी कूत्ते भी तां मेज का छुड़के री बच्चेयां री रोट्टी री चुरा-चारा खाई लिन्दे।” 29यीशु ने तिस जनानी जो बोल्लेया, “इस गल्ल री बजाह् कने जा किजोकी दुष्टात्मा तेरी कुड़ी बिच का निकली गे री है।” 30तिस जनानी ने अपणे घरे जाई करी दिख्खेया कि कुड़ी मन्जे पर पेय री थी, अते दुष्टात्मा निकली गे री थी।
टौणे ते हकले मणूआं रा ठीक होणा
31फिरी यीशु सूर अते सैदा रे सहर रे नेड़े वाले का निकली करी दिकापुलिस जिले का होई करी गलीली समुन्द्र जो पूज्जे। 32तां मणू इक्क टौणे मणू जो जे खख्खा भी थिय्या, यीशु का लेई करी आये ते तिन्हेरे छन्दे कित्ते कि अपणा हत्थ तिस मणू पर रखण। 33यीशु से तिस मणू जो भीड़ का बखरे लेई गे, अते अपणी उंगलियां तिस मणू रे कन्नां बिच पाई, अते यीशु ने अपणी उंगल पर थूक्क लाई करी तिसेरी जिब्ब जो छुत्तेया। 34ते स्वर्ग रे पास्से दिख्खी करी साह् भरे, अते तिस मणू जो बोल्लेया, “इफ्त्तह” “मतलब खुली जा!” 35तिसेरे कान्न खुली गे ते ए साफ-साफ, अते तिसेरी जिब्ब री गन्ड भी खुली गई अते से साफ-साफ बोलणे लग्गेया। 36तां यीशु ने तिस मणू जो समजाया कि कुसकी जो भी इस बारे बिच मत बोलदा पर जिन्ना यीशु ने तिस मणू जो समजाया, तिसने तिन्ना ही जादा प्रचार कित्तेया। 37से बड़ा ही हैरान होई करी बोलणे लगेया, “यीशु ने जे किच्छ भी कित्तेया, से सब खरा ही कित्तेया, से टोणेयां जो सुनणे री, अते जल्लेयां जो बोलणे री ताकत दिन्दे।”
Obecnie wybrane:
मरकुस 7: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
