मरकुस 16
16
यीशु रा फिरी जिन्दा होणा
यीशु रा फिरी जिंदा होणा
1संज्जा बेल्ले जां विश्राम दिन पूरा होई गेया, तां मगदला सहर री मरियम, ते याकूब री मां मरियम, अते सलोमी ने खुश्बू वाली चीजां खरीदी लित्ती कि आई करी यीशु रे लास पर मली सके। 2हफ्ते रे पैल्ले रोज्जे, भ्यागा ही सूरज निकलदे ही, से त्रै जनानियां यीशु री कब्र पर गेईयां। 3रस्ते बिच से ते अप्पु-मिते बोलणा लग्गी, “असां तांइ कब्र रे दरवाज्जे का बट्टा कुण रुलकांगा?” 4पर से मणू जिय्यां ही यीशु री कब्र का पूज्जे, तां दिख्खेया कि से बड्डा पत्थर जिस कने कब्र रा दरवाज्जा बांद्द कित्तेया गे रा थिये, से रुलके रा थिया। 5जां से कब्र अन्दर गई तां तित्ते इक्क जवान आदमी जो चिट्टे कपड़ेयां पाए रे ते कब्र अंदर सज्जे पास्से बैठ्ठे रे दिख्खेया। से जनानियां तिस जवान आदमी जो दिख्खी करी हैरान होई गई। 6तिस जवान आदमी ने तिन्हा जनानियां जो बोल्लेया, “हैरान मत हो, तुसा नासरत रे यीशु जो, तोप्पेया करदी हिन, जिन्हा जो सुली पर चढ़ाया गेया थिया। से जिन्दा होई गेरे हिन ते से इत्ते नी हिन। दिख्खो, ए से ही जगाह् है, जित्ते तिन्हा ने यीशु री लास जो रख्खेया थिया। 7पर तुसा मणू जाओ, ते तिन्हेरे चेल्लेयां ते पतरस जो बोल्लो कि यीशु ने तुसा का पैल्ले गलील प्रदेश जो जाणा, जिय्यां यीशु ने तुसा जो बोल्लेया थिया, तुसा ने तिन्हा जो तित्ते ही दिखणा।” 8अते से जनानियां तित्ते का झट-पट तिस कब्र का नह्सी करी हटी आई किजोकी डर रे मारे से कमेया करदी थी। से इन्नी जादा डरी गई थी कि तिन्हा ने कुसकी जो किच्छ भी नी बोल्लेया।
फिरी जिन्दे होणे का बाद यीशु रा चेल्लेयां जो दिसणा ते स्वर्ग पर चुक्केया जाणा।
मरियम मगदलीनी जो यीशु रा लिबणा
9यीशु मुर्देयां बिच जिन्दे होणे का बाद, सबका पैल्ले मगदला सहर री मरियम जो दिस्से, जिस बिच का यीशु ने सत्त दुष्टात्मां जो कड्डेया थिया। 10तिसने जाई करी अपणे साथियां जो सारा किच्छ दस्सेया जे हल्ले यीशु रे मरणे रा मातम मनाया करदे थिये। 11पर जां तिन्हा ने जाई करी तिन्हा जो दस्सेया कि यीशु जिन्दे हिन ते तिसने यीशु जो दिख्खे रा है, तां तिन्हा लोक्कां ने तिसेरी गल्ल रा भरोस्सा नी कित्ता।
दो चेल्लेयां जो यीशु रा लिबणा
12इसका बाद यीशु कुसकी दूए रुप अंदर अपणे बारा चेल्लेयां रे अलावा दूए दो होर चेल्लेयां जो दिस्से जां से यरुशलेम सहर रे नेड़े इक्क जगाह् पर सफर करेया करदे थिये। 13तिन्हा चेल्लेयां ने भी हटी करी बाकि रे चेल्लेयां जो दस्सेया, पर कुसकी ने तिन्हेरा भरोसा नी कित्तेया।
ग्यारा चेल्लेयां जो यीशु रा लिबणा
14बाद बिच, यीशु अपणे बाकि रे ग्यारह चेल्लेयां जो भी दिस्से जां से रोट्टी खाया करदे थिये। से चेल्लेयां जो बकणा लग्गे किजोकी तिन्हा ने अपणी ढिठाई ते विश्वास री कमी री वजह कने तिन्हेरे मुर्देयां बिच का जिन्दे होणे रे बारे बिच भरोस्सा नी कित्तेया। 15ते यीशु ने तिन्हेरे जो बोल्लेया, “तुसां सारी दुनिया बिच जाई करी, सारी दुनिया रे लोक्कां जो सुब बसेख सुणाओ। 16जे विश्वास करी के बपतिस्मा लिन्गा तिसेरा ही छुटकारा होणा, पर जे विश्वास नी करगा, तिसेरे पाप माफ नी होणे ते से गुनेह्गार मन्नेया जाणा। 17विश्वास करणे वालेयां रे ए निशानियां होणी कि तिन्हा मेरे नां कने दुष्टात्मा जो कढ़णा, नौई-नौई भाषा बोलणी, 18तिन्हा ने अपणे हत्थां कने कीड़ेयां जो चुक्की लैणा, अते जे से जैहरील्ली चीज भी पी जान्गे तां भी तिन्हेरा कोई नुक्सान नी होणा, तिन्हा ने बिमारां पर हत्थ रखणा, ते बिमारां ठीक होई जाणा।”
यीशु रा स्वर्ग वापस जाणा
19प्रभु यीशु उन्हा कने गल्लां करणे का बाद स्वर्ग बिच चुक्की लित्ते गे, ते परमेश्वर रे सज्जे पास्से बेई गे। 20ते तिन्हा चेल्लेयां ने निकली करी हर जगाह् प्रचार कित्तेया, ते प्रभु रे चेल्लेयां रे जरिए कम्म करदे रेय, अते तिन्हा नेक-बनेक्के कम्मां रे जरिए जे कन्ने-कन्ने हुंदे थिये, वचनां जो पक्का करदे रेय।
Obecnie wybrane:
मरकुस 16: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
