मरकुस 11
11
यरुशलेम सहर बिच आखरी हफ्ता
यरुशलेम सहर बिच यीशु रा विजय-प्रवेश
1जां यीशु ते तिन्हेरे यरुशलेम सहर रे नेड़े, जैतून पहाड़ पर बैतफगे ते बैतनिय्याह ग्रां रे नेड़े पूज्जे, तां तिन्हा ने अपणे चेल्लेयां बिच का दो जो ए बोल्ली भेजेया, 2“सामणे वाले ग्रां बिच जाओ, अते तित्ते पुजदे ही इक्क गधी रा बच्चा बन्ने रा मिलणा जिस पर हल्ले तांइ कुसकी ने सवारी नी कित्ते री है, तिसजो खोली करी लेई आओ। 3जे अगर कोई तुसा जो टोके, तां बोल्लेयो कि प्रभु जो इसेरी जरुरत है, ते इसजो तौले हटाई दैणा।” 4चेल्लेयां ने जाई करी तिस गधी रे बच्चे जो बाहर दुआर रे कने गली बिच बन्ने रा दिख्खेया, अते खोलणे लगे। 5तित्ते खड़ित्ते किच्छ लोक्कां ने चेल्लेयां जो टोकि करी बोल्लया, “तुसी इसजो किजो खोल्लेया करदे हिन?” 6चेल्लेयां ने से बोल्लेया जे यीशु ने तिन्हा जो बोलणे तांइ सिखाया थिया, ते तिन्हा लोक्कां ने तिन्हा जो से गधी रा बच्चा लेई जाणा दित्तेया। 7तिन्हा ने गधी रे बच्चे जो यीशु का लेयाई करी तिस पर किच्छ कपड़े पाई दित्ते, अते यीशु तिस पर बेई गे। 8तां बड़े जणेया ने यीशु रे आदर बिच अपणे किच्छ कपड़े रस्ते बिच बिछाये, अते किच्छ होर लोक्कां ने बूट्टेयां बिच पत्ते वाली डालियां बछाई दित्ती। 9यीशु तिस भीड़ रे बिच मझाटे थिये ते जे मणू तिन्हेरे चारो पास्से थिये से जोरे-जोरे ए बोल्लेया करदे थिये कि,
“जय हो!” धन्न हिन से जे प्रभु रे नां कने आन्दा है!
10“असां रे पुरखे, दाऊद रा राज जे आया करदा है, धन्न हिन!”
“परमेश्वर री जय हो जे स्वर्ग बिच हिन!”
11तां यीशु यरुशलेम सहर पूज्जी करी तित्ते रे मन्दिर बिच आये, अते चारो पास्से सब चीजां जो दिख्खी करी अपणे चेल्लेयां कने बैतनिय्याह ग्रां जो हटी गे, किजोकी सांज्ज होई गे री थी।
बगैर फल्ल वाला अंजीर रा बूट्टा
12अगले रोज जां, यीशु ते तिन्हेरे चेल्ले बैतनिय्याह रे कस्बे का निकलेया करदे थिये, तां तिन्हा जो भूख लग्गी। 13यीशु ने दुर का अंजीर रे इक्क हरे बुटे जो दिख्खेया ते तिसेरे नेड़े गे ताकि खाणे तांइ अंजीर तोड़ी सकण। पर तिस बूट्टे पर पत्तेयां जो छड्डी किच्छ नी थिया किजोकी तिस बेल्ले फल्ल लगणे रा मौसम नी आया थिया। 14यीशु ने तिस बूट्टे कने बोल्लेया, “अवे का कोई तेरा फल्ल कदी न खाए!” अते तिन्हेरे चेल्ले सूणेया करदे थिये।
मन्दिर का दुकानदारां रा कड्डेया जाणा
15जां यीशु ते तिन्हेरे चेल्ले, यरुशलेम सहर बिच हटी आये, अते से मन्दिर बिच गे, ते जे मणू मन्दिर अंदर कुर्बानी करणे तांइ जानवरां जो बेच्चेया करदे थिये तिन्हा जो मन्दिर का बाहर कड्डणा लगे, अते पैसेयां रा लैण-दैण करणे वालेयां रे पीढ़े अते कबूतर बेचणे वालेयां री चौकियां उलटेरी दित्ती, 16ते यीशु ने फिरी कुसकी जो भी मन्दिर बिच बजार नी लाणे दित्तेया। 17अते यीशु ने तिन्हा लोक्कां जो बोल्लेया, “पवित्रशास्त्र अंदर लिख्खे रा है, ‘कि मेरा मन्दिर देस-देस रे लोक्कां तांइ प्रार्थना रा मन्दिर बोल्लेया जाणा’ पर तुसा ने इसजो डाकुआं रा अड्डा बणाई दित्ते रा है।” 18मन्दिर बिच यीशु ने जे किच्छ कित्तेया थिया जां बड्डे पुरोत्तां ते शास्त्रियां ने से सूणेया तां तिन्हा जो मारणे री साजिश करणा लग्गे। से मणू यीशु जो पकड़ने का डरदे थिये किजोकी कि बाकि सारे मणू तिन्हेरे उपदेस का हैरान हुन्दे थिये। 19फिरी संज्जा जो यीशु ते तिन्हेरे चेल्ले बैतनिय्याह रे कस्बे जो हटी गे।
सूक्के अंजीर रे बूट्टे री शिक्षा
20अगली भ्याग जां यीशु ते तिन्हेरे चेल्ले तिस अंजीर रे बुटे का गुजरेया करदे थिये जिस जो यीशु ने श्राप दित्तेया थिया, से जड़ तांइ सुकी गे रा थिया। 21पतरस जो से गल्ल चेत्ता आई कि यीशु ने तिस बूट्टे जो कै बोल्लेया थिया, ते यीशु जो हाक्क मारी करी बोल्लेया, “ओ गुरु, दिख्खो! जिस अंजीर रे बूट्टे जो तुसा ने श्राप दित्तेया थिया, से सुकी गे रा है।” 22-23तां यीशु ने चेल्लेयां जो बोल्लेया, मैं तुसा जो सच बोलदा “परमेश्वर पर विश्वास करी के ते अपणे मन बिच बगैर कुसकी शक रे जे अगर तुसा पहाड़ जो भी बोल्लो कि उखड़ी करी समुन्द्र बिच पेई जा, तां से भी होई जाणा। 24इधेरे तांइ मैं तुसा जो बोलदा कि जे तुसा प्रार्थना करी के मंग्गो, ते विश्वास करी लेयो कि तुसा जो मिल्ली गेया, अते तुसा रे तांइ होई जाणा। 25पर जां कदी तुसा प्रार्थना करणा लगो, तां जे अगर तुसा कुसकी जो दिल का माफ ना कित्ते रा हो, तां तिसजो माफ करी देयो: ताकि पिता परमेश्वर जे स्वर्ग बिच हिन, तुसा रे पाप माफ करे। 26ते जे अगर तुसा माफ नी करो, तां तुसा रे स्वर्गीय पिता ने भी तुसा रे पाप्पां जो माफ नी करणा।”
यीशु रे हक्क पर सवाल
27फिरी यीशु ते तिन्हेरे चेल्ले यरुशलेम सहर जो आये, अते जां यीशु मन्दिर बिच घूम्मेया करदे थिये तां बड्डे पुरोत्तां, शास्त्रि ते बुजुर्ग मणू तिन्हेरे का आई करी पूच्छणा लग्गे, 28“तू ए कम्म कुस हक कने करदा? मन्दिर बिच ए कम्म करणे रा हक्क तुसा जो कुसने दित्तेया?” 29यीशु ने तिन्हा लोक्कां जो बोल्लेया, “मैं भी तुसा का इक्क गल्ल पूछदा, जे अगर तुसा मेरी गल्ल रा जवाब देयो तां मैं भी तुसा जो दस्सणा कि ए कम्म कुस हक्क कने करदा। 30मेरे जो जवाब देयो कि कै यूहन्ना जो बपतिस्मा दैणे हक परमेश्वर रे पास्से का थिया या मणूआं रे पास्से का थिया?” 31तां से अप्पु-मिते बैह्स करणा लगे। “जे असी बोलदे कि परमेश्वर रे पास्से का, तां यीशु ने बोलणा कि फिरी तुसा ने यूहन्ना रा विश्वास किजो नी कित्तेया?” 32अते जे अगर असी बोलदे “लोक्कां रे पास्से का थिया, तां लोक्कां रा खतरा है, किजोकी लोक्कां जो पूरा भरोसा थिया कि यूहन्ना भविष्यद्वक्ता थिये।” 33अते तिन्हा लोक्कां ने यीशु जो जवाब दित्तेया, “असी नी जाणदे।” यीशु ने तिन्हा जो बोल्लेया, “तां मैं भी तुसा जो नी दसणा कि ए कम्म मैं कुस हक्क कने करदा।”
Obecnie wybrane:
मरकुस 11: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
