यूहन्ना 10

पुहाल ते भेड़ां रा उदारण

1मैं तुसा जो सच-सच बोलदा कि जे कोई दुआर का गुआड़ बिच नी बड़दा, पर कुसकी दूए पास्से का चढ़दा, से चोर ते डाकू है। 2पर जे दुआर का अन्दर जान्दा, से भेड़ां रा पुहाल है। 3तिसेरे तांइ पैहरेदार दुआर खोल्ली दिंदा, ते भेड़ां तिसेरी अवाज सुणदी, ते से अपणी भेड़ां जो नां लेई-लेई करी सददा ते बाहर लेई जादां। 4जिस बेल्ले से अपणी सारी भेड़ां जो बाहर कड्डी लिन्दा, तां से तिन्हेरे अग्गे-अग्गे चलदा, ते भेड़ां तिसेरे पीच्छे-पीच्छे चली पैंदी, किजोकी से तिसेरी अवाज पछाणदी। 5पर तिन्हा ने पराए मणू का नी जाणा, पर तिसका नसणा किजोकी से पराए री अवाज नी पछाणदी। 6यीशु ने तिन्हेरे जो ए उदारण सुणाया, पर से तिन्हेरी गल्लां रा मतलब नी समजे।

यीशु अच्छा पुहाल

7तां यीशु ने फिरी तिन्हा जो बोल्लेया, मैं तुसा कने सच-सच बोलदा, कि भेड़ां रा दुआर मैं है।

8जिन्ने मेरे का पैल्ले आए से सारे चोर ते डाकू हिन, पर मेरी भेड़ां ने तिन्हेरी नी सूणी। 9दुआर मैं है, जे अगर कोई मेरे का अन्दर आए, तां छुटकारा पाणा, ते अन्दर बाहर आया जाया करणा ते चारा पाणा। 10चोर कुसकी होर कम्म तांइ नी पर सिर्फ चोरी करणे, ते मारणे, ते तबाह करणे तांइ आदां। मैं इस तांइ आया की ओ जिन्दगी पाण ते रज्जी करी पाण। 11खरा पुहाल मैं है, खरा पुहाल अपणी भेड़ां तांइ हमेसा अपणी जान दैणे तांइ तैयार रैहन्दा। 12-13मजदूर भेड़िये जो आंदा दिख्खी करी नह्सी जांदा। किजोकी से ना तां तिन्हेरा पुहाल है ते ना ही भेड़ां रा मालक है, इधेरे तांइ तिन्हेरी परवाह नी करदा। भेड़िया तिन्हा भेड़ां पर हमला करी के तिन्हेरे जो बखेरी दिंदा। 14खरा पुहाल मैं है, मैं अपणी भेड़ां जो ते मेरी भेड़ां मेरे जो तिय्यां ही जाणदी 15जिय्यां प्यो मेरे जो जाणदा ते मैं प्यो जो जाणदा, ते मैं अपणी भेड़ां तांइ हमेसा जान दैणे तांइ तैयार रैहन्दा। 16मेरी होर भी भेड़ां हिन, जे इस गुआड़ री नी हिन मेरे जो तिन्हा जो भी लाणा जरुरी है तिन्हा ने मेरी अवाज सूणनी, तां इक्क ही झुण्ड ते इक्क ही पुहाल होणा। 17प्यो इस तांइ मेरे कने प्यार करदा किजोकी मैं अपणी जान दिंदा ताकि मैं फिरी जिन्दा होई जां। 18कोई मेरी जिन्दगी मेरे का खुस्सेया नी है करदा, बल्कि मैं अप्पु ही अपणी जिन्दगी #10:18 इस वचन बिच जिन्दगी स्वर्ग बिच रैह्णे रे बारे बिच दर्शाया करदा है।दिंदा, मेरे जो अपणी जिन्दगी दैणे रा भी हक्क है, ते तिसजो फिरी लेई लैणे रा भी हक्क है: ए हुकम मेरे जो मेरे पिता-परमेश्वर का मिल्ले रा है। 19इन्हा गल्लां री वजह कने यहूदियां बिच फिरी फूट पेई गई। 20तिन्हा बिच का मते सारे बोलण लग्गे, तिन्हा बिच दुष्टात्मा है, ते से पागल हिन, तिन्हेरी मत सुणो। 21होर लोक्कां ने बोल्लेया, ए गल्लां इदेय मणू री नी जिसेरे बिच दुष्टात्मा हो, दुष्टात्मा अन्नेयां री हाख्खियां नी खोल्ली सकदी।

यहूदियां रा अविश्वास

22यरुशलेम सहर बिच स्थापना रा त्याहार मनाया जाया करदा थिया, सर्दियां रा मौसम थिया।

23यीशु मन्दिर बिच सुलैमान रे अंगण #10:23 ए से जगाह् थी जित्ते राज्जा सुलैमान घुमणा आंदा थिया ते ए जगाह् मन्दिर रे अंगण बिच ही थी।बिच घूम्मेया करदे थिये। 24तां यहूदियां रे अधिकारियां ने यीशु जो घेरी लित्ता ते पूच्छेया, तुसा ने असा रे मन जो लम्बे समय का परेसानी बिच पाई रख्खे रा है। जे अगर तुसा मसीह हिन तां असा कने साफ-साफ बोल्ली देयो। 25यीशु ने तिन्हा जो जवाब दित्ता, मैं तुसा जो बोल्ली दित्ता पर तुसा विश्वास ही नही करदे, जे कम्म मैं अपणे प्यो रे दित्ते रे अधिकार कने करदा, ओ ही मेरे गवाह हिन 26पर तुसा इस तांइ विश्वास नी करदे किजोकी मेरी भेड़ां बिच का नी हिन 27मेरी भेड़ां मेरी अवाज सुणदी, मैं तिन्हा जो जाणदा, ते से मेरे पीच्छे-पीच्छे चलदी। 28ते मैं तिन्हा जो हमेसा री जिन्दगी दिंदा, से कदी भी बर्बाद नी होणी, ते कोई तिन्हा जो मेरे हथ का नी खुस्सि सकदा। 29मेरा प्यो जिन्हा ने तिन्हेरे जो मेरे जो दित्ते रा है, सबका बड्डा है ते कोई तिन्हा जो मेरे प्यो का खुस्सि नी सकदा। 30मैं ते प्यो इक्क ही हिन। 31यहूदियां ने यीशु जो मारणे तांइ फिरी बट्टे चुक्के। 32इस पर यीशु ने तिन्हा जो बोल्लेया, मैं तुसा जो अपणे प्यो रे पास्से का मते सारे ठीक कम्म दिखाए रे हिन तिन्हा बिच का कुस्स कम्म तांइ तुसा मेरे जो बट्टे मारदे? 33यहूदियां ने तिन्हा जो जवाब दित्ता, ठीक कम्म तांइ असी तुसा जो बट्टे नी मारदे पर परमेश्वर री बेजती करणे री वजह ते इस तांइ की तुसा मणू होई करी अप्पु जो परमेश्वर बणादां। 34यीशु ने तिन्हा जो जवाब दित्ता, कै तुसा री पवित्रशास्त्र बिच नी लिख्खे रा है,

“मैं बोल्लेया, तुसा परमेश्वर हिन?”

35जे अगर तिन्हा जो परमेश्वर बोल्लेया जिन्हेरे का परमेश्वर रा वचन पूज्जेया (ते पवित्रशास्त्र री गल्ल झूठ नी होई सकदी), 36तुसा किजो बोलदे कि ए परमेश्वर री बेजती है जां मैं बोलदा, “मैं परमेश्वर रा पुत्तर है?” आखरकार, मैं से ही है जिस जो पिता-परमेश्वर ने मेरे जो अलग करी के इस दुनिया बिच भेज्जे रा है। 37जे मैं अपणे प्यो रे कम्म नी करदा, तां मेरा विश्वास मत करो 38पर जे अगर मैं से कम्म करदा, तां चाए मेरा विश्वास ना भी करो, पर उन्हा कम्मां रा तां विश्वास करो, ताकि तुसा जाणी सको ते समझो की प्यो मेरे बिच है ते मैं प्यो बिच। 39तां तिन्हा ने फिरी यीशु जो पकड़ने री कोसीस कित्ती पर से तिन्हेरे हत्थां का निकली गे।

40फिरी यीशु यरदन नदी रे पार तिस जगाह् पर चली गे जित्ते यूहन्ना पैल्ले बपतिस्मा दिंदा थिया, ते उत्ते ही रे। 41मते सारे मणू तिन्हेरे का आई करी बोलदे थिये, यूहन्ना ने तां कोई चिन्ह-चमत्कार नी दिखाया, पर जे किच्‍छ यूहन्ना ने इन्हेरे बारे बिच बोल्लेया थिया, से सारा किच्‍छ सच थिया। 42ते उत्ते मते लोक्कां ने यीशु पर विश्वास कित्ता।

Obecnie wybrane:

यूहन्ना 10: CDHNT

Podkreślenie

Kopiuj

Porównaj

Udostępnij