प्रेरितां रे कम्म 23
23
1पौलुस ने महासभा पास्से नझाई करी दिख्खेया ते बोल्लेया, ओ संगी विश्वासियों, मैं अज्ज तक परमेश्वर तांइ बिल्कुल सच्चे विवेक कने जिन्दगी बिताये री है। 2पौलुस री बोल्ले री गल्लां जो सुणी करी हनन्याह प्रधान पुरोत्त ने तिन्हा जो जे तिसेरे नेड़े खड़ित्ते रे थिये, पौलुस रे मुहँ पर चन्ड़ मारणे रा हुकम दित्तेया, 3तां पौलुस ने तिन्हा जो बोल्लेया, ओ बेईमानों, परमेश्वर ने तुसा जो मारणा, तुसा मूसा रे कानून रे हिसाब कने मेरा हिसाब-किताब करेया करदे हिन, तां फिरी कै मूसा रे कानून रे खिलाफ ही मेरे जो मारणे रा हुकम देया करदा है? 4जे नेड़े खड़ित्ते रे थिये तिन्हा ने बोल्लेया, तू परमेश्वर रे प्रधान पुरोत्त री बेजती करदा। 5पौलुस ने बोल्लेया, ओ संगी विश्वासियों, मेरे जो पता नी थिया कि ए प्रधान पुरोत्त हिन, किजोकी पवित्रशास्त्र बिच लिख्खे रा है: अपणे मणूआं रे परधान जो बुरा नी बोलणा चाएदा 6तां पौलुस ने ए जानणे का बाद कि तित्ते किच्छ सदूकी ते फरीसी मणू भी हिन, सभा बिच हक्क लाई करी बोल्लेया, ओ संगी विश्वासियों, मैं फरीसी है ते फरीसी लोक्कां रे टब्बर रा है, मुर्देयां रे फिरी जिन्दे कित्ते जाणे री गल्ल बिच आस रखणे री वजह कने मेरे पर मुकद्दमा होया करदा है। 7जां तिनिए ए गल्ल बोल्ली तां फरीसियां ते सदूकियां अन्दर अप्पु-मिते लड़ाईयां होणा लग्गी पेई ते सभा अन्दर फूट पेई गई 8किजोकी सदूकी मणू तां ए बोलदे कि, ना फिरी जिन्दे होई जाणा सच है, ना स्वर्गदूत अते ना ही दुष्टात्मा हुंदी पर फरीसी इन्हा सबणी गल्लां जो मन्दे 9फिरी बड़ा रोला पेई गेया ते किच्छ शास्त्रि जे कि फरीसी थिये, उठी होए ते ए बोल्ली करी बैह्स-बाजी करणा लग्गी पये, असा जो इस मणू अन्दर कोई खराबी नी मिल्ली, शायद कुसकी दुष्टात्मा या स्वर्गदूत ने तिस कने गल्ल कित्ती हो। 10जां बड़ी बैह्स-बाजी होई, तां पलटन रे सरदार ने इस डर कने कि से पौलुस रे टुकड़े-टुकड़े ना करी रखण, पलटन जो हुकम दित्तेया कि उतरी करी पौलुस जो महासभा बिच का जबरदस्ती कड्डी लैण, ते गढ़ अन्दर लेई जाण। 11तिस्सी रात्ती प्रभु यीशु ने तिसेरे नेड़े खड़े होई करी बोल्लेया, ओ पौलुस, हिम्मत कर किजोकी जिय्यां तैं यरुशलेम अन्दर मेरी गवाई दित्ती, तिय्यां गवाई तिज्जो रोम अन्दर भी दैणा पैणी।
पौलुस जो मारणे री चाल
12जां सँझ होई तां यहूदी लोक्कां ने साजिश कित्ती ते कसम खाई कि जां तांइ असी पौलुस जो मारी नी छडगे, तां तिकर असी किच्छ खाण या पीन तां असा पर लाणत है। 13तिन्हा ने अप्पु अन्दर ए कसम खाई थी, से चाली मणू का भी जादा थिये 14तिन्हा ने बड्डे पुरोत्तां ते बुजुर्ग लोक्कां का जाई करी बोल्लेया, असा ने ए कसम खाए री है कि जां तांइ असी पौलुस जो मारी नी छडदे, तां तांइ अगर किच्छ चखन भी तां असा पर लाणत हो। 15इधेरे तांइ अवे महासभा समेत पलटन रे सरदार जो समझाओ कि तिसजो तुसा का लेई आए, ते इय्यां लग्गे कि तू तिसेरे बारे अन्दर होर भी जांच-पड़ताल करणा चाह्ंदा ते असी तिसेरे पुजणे का पैल्ले ही तिसजो मारी रखणे तांइ तैयार रैह्न्गे। 16पर पौलुस रे भांजे ने सुणी लिया कि यहूदी अधिकारी तिसजो मारणे री तयारी अन्दर हिन, तां तिनिए गढ़ अन्दर जाई करी पौलुस जो से सारा किच्छ बोल्ली दित्तेया 17पौलुस ने हाकिमां बिच का इक्क जो अपणे नेड़े सद्दी करी बोल्लेया, इस जुआन जो पलटन रे सरदार का लेई जाओ, ए तिसजो किच्छ बोलणा चाह्ंदा 18इधेरे तांइ सूबेदार ने पौलुस रे भांजे जो तिसजो पलटन रे सरदार का लेई जाई करी बोल्लेया, कैदी पौलुस ने मेरे जो सद्दी करी मेरे छन्दे कित्ते कि ए जुआन पलटन रे सरदार कने किच्छ बोलणा चाह्ंदा है इसजो तिसेरे का लेई जा 19पलटन रे सरदार ने तिसेरा हत्थ पकड़ी करी ते तिसजो अलग लेई के पूच्छेया, तू मेरे जो कै बोलणा चाह्ंदा? 20तिनिए बोल्लेया, यहूदी अधिकारियां ने साजिश कित्ते री है कि तेरे का छन्दे करण कि कल पौलुस जो महासभा अन्दर अणन, ते इय्यां लग्गे कि से तिसेरे बारे अन्दर होर भी जांच-पड़ताल करणा चाह्ंदे होण। 21पर तिन्हेरी गल्ल मत मनदा, किजोकी तिन्हा बिच का चाली का जादा मणू पौलुस जो मारणे री भाल्ला अन्दर हिन, जिन्हा ने ए कसम खाए री है कि जां तांइ से पौलुस जो मारी नी रखण, तां तांइ नां तां तिन्हा किच्छ खाणा ते ना ही किच्छ पीणा, ते अवे से तैयार हिन ते तेरे बोलणे री भाल्ला अन्दर हिन। 22तां पलटन रे सरदार ने तिस जुआन जो ए हुकम देई करी बिदा कित्तेया, कुसकी जो भी मत दस्दा कि तैं मेरे जो ए गल्लां बोल्ले री हिन।
कैसरिया जिल्ले बिच पौलुस जो लेई जाणा
पौलुस जो फेलिक्स का भेजणा
23तां पलटन रे सरदार ने दो हाकिमां जो सदवाई करी बोल्लेया, दो सौ सैनिक, सत्तर सवार ते दो सौ भालैत, रात्ती रे नौ बजे#23:23 रात्ती रा त्रिया पहर का बाद कैसरिया कस्बे जो जाणे तांइ त्यार रख्खो। 24ते पौलुस री सवारी तांइ घोड़े तैयार रख्खो, कि तिसजो फेलिक्स हाकिम तांइ ठीक-ठाक पूजाई दैण। 25पलटन रे सरदार ने फेलिक्स राज्यपाल जो इस तरिक्के कने इक्क चीठ्ठी भी लिखी: 26महामहिम फेलिक्स हाकिम जो क्लौदियुस लूसियास री तरफ का प्रणाम, 27इस मणू जो यहूदियां ने पकड़ी करी मारी दैणा चाह्या, पर जां मेरे जो पता लग्गेया कि ए रोमी है, तां मैं पलटन लेई करी इसजो छुड़ाई करी लेई आया 28मैं पता लाणा चाह्ंदा थिया कि से इस पर किजो इल्जाम लाया करदे हिन, इधेरे तांइ तिसजो उन्हेरी महासभा अन्दर लेई गेया 29तां मेरे जो पता लग्गेया कि से अपणी मूसा रे कानून री गल्लां री वजह कने इस पर इल्जाम लाया करदे हिन, पर मारी रखणे जोग्गी या बह्न्नी रखणे जोग्गी इस अन्दर कोई बुराई नी है 30जां मेरे कने गल्ल लाई गई कि से इस मणू जो मारणे री भाल्ला अन्दर हिन तां मैं इसजो झट तेरे का भेज्जी दित्तेया ते आरोप लाणे वाले तिन्हा जो भी हुकम दित्तेया कि तेरे सामणे तिस पर इल्जाम लाण। 31इधेरे तांइ जदेह्याँ सैनिकां जो हुकम दित्तेया थिया, तिय्यां ही से पौलुस जो रातो-रात यरुशलेम सहर का लेई करी अन्तिपत्तरिस अन्दर आये, 32दूए रोज्जे से सवारां जो पौलुस कने जाणे जो छड्डी करी सिपाई अप्पु यरुशलेम सहर जो हटी आये। 33तिन्हा ने कैसरिया पूजी करी राज्यपाल जो चीठ्ठी दित्ती ते पौलुस जो भी तिसेरे सामणे खड़ेरी दित्तेया 34फेलिक्स राज्यपाल ने चीठ्ठी पढ़ी करी पूच्छेया, ए कुस जगाह् रा है? ते जां पता लग्गेया कि किलिकिया प्रदेश रा है 35तां तिसजो बोल्लेया, जिस बेल्ले तेरे आरोप लाणे वाले मणू भी आंगे, तां मैं तेरा मुकद्दमा करणा, ते तिनिए पौलुस जो हेरोदेस रे किले अन्दर रखणे रा हुकम दित्तेया।
Obecnie wybrane:
प्रेरितां रे कम्म 23: CDHNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
