यूहन्ना 5

ठती साल दे रोगी गी चंगा करना

1इनें गल्लां हां बाद यहूदीयें दा एक त्यार ओया, ते यीशु यरूशलेम गी गीया। 2यरूशलेम च भिड्ड-फाटक दे कोल एक कोण्ड ऐ जेड़ा इब्रानी पाषा च बैतहसदा आखया जंदा ऐ; ओ पंज डेव्ढ़ीयें कन्ने केरया गेदा ए। 3ईनदे च बड़े सारे बीमार, अन्नें, लंगड़े ते सुके अंग आले पानी दे इलने दी आस च पेदे रौंदे हे। 4किके ठीक मौके उपर परमेसर दे सोर्गदूत कोण्ड च उतरीयै पानी गी लांदे हे। पानी अलदै गै जेड़ा कोई पैलैं उतरदा हा ओ चंगा ओई जंदा हा, पांवे ओसदी कोई बी बीमारी कि नेई ओन्दी ही। 5उत्थें एक मानु हा, जेड़ा ठत्ती साल थमां बमारी च पेदा हा। 6यीशु ने उसी बमारी च पेदे दिखियै ते ए समझीयै के ए मते ध्याडां दा इसै चाली च पेदा ऐ, उसी पूछ्या, “के तू चंगा होना चानां ऐ?” 7ओस बमार मानु ने उसी जबाब दिता, ए प्रभु मेरे कोल कोई मानु नेईयै के जेसलै पानी गी लाया जा, ओस बेलै मिगी कोण्ड च तूआरै; लेकन मेरे पूजदे-पूजदे दुआ मेरे थमां पैलैं पानी च उतरी जंदा ऐ। 8यीशु ने उसी आखया, “ओठ, अपनी खट चुक्क ते चल फेर।” 9ओ मानु फोरन गै चंगा ओई गीया, ते अपनी खट चुक्कियै चलना फिरना लगी पिया।

10ओ यहूदीयें दे बसां दा ध्याडा हा। एसकरी यहूदी ओदे कोलां जेड़ा चंगा ओया हा, पुशन लगे, “अज्ज तां साड़ा बसां दा ध्याड़ा ऐ, कनून दे मताबक तुगी खट चुक्कना ठीक नेईयैं।” 11ओसने उनेंगी जबाब दिता, “जेस ने मिगी चंगा कित्ता, उसै मिगी आखया, अपनी खट चुक्क, ते चल-फेर।” 12उनै उसी पूछया, “ओ कोन मानु ऐ जेस ने तुगी आखया के अपनी खट चुक्क, ते चल फेर?” 13लेकन जेड़ा चंगा ओई गेदा हा ओ नेई जानदा हा के ओ कोन ऐ, किके उत्थें मती पीड़ ओनें दे कारन यीशु उत्थां दा बखियै गी ओई गेदे हा। 14इनें गल्लें थमां बाद ओ यीशु गी मंदर दे बेड़े च मिलया। यीशु ने उसी आखया, “देख्ख, तू चंगा ओई गेदा ऐं; पी दवारा पाप नी करयां, ऐसा नेई उवै के एदा कोलां बड़ी पारी मसीबत तेरे उपर आई जा।” 15ओस मानुऐ जाईयै यहूदीयें दे मुख्ये कन्ने आखी दिता के जेस ने मिगी चंगा कित्ता ओ यीशु ऐ। 16एस कारन यहूदी मुख्ये यीशु गी सतान लगे, किके ओ ए कम्म यहूदीयें दे बसां दे ध्याडे करदा हा। 17एस गल्ल उपर यीशु ने उनेंगी आखया, “मेरा पिता परमेसर अजें तकर कम्म करदा ऐ, ते आऊँ बी कम्म करना ऐ।” 18एस कारन यहूदी उसी मारनें आसतै ओर बी जादै कोशट करन लगे, के यीशु नां छडा यहूदीयें दे बसां दे धयाड़ै रीति गी त्रोड़दा, लेकन परमेसर गी अपना पिता आखीयै, अपने आप गी परमेसर दे बराबर आखदा हा।

पुत्र दा अख्त्यार

19एस गल्ल उपर यीशु ने उनेंगी आखया, “आऊँ तुसेंगी सच-सच आखना ऐं, पुत्तर अपने कोलां केछ नेई करी सकदा, सेर्फ उवै जेड़ा ओ पिता गी करदे दिखदा ऐ; किके जेड़े-जेड़े कम्में गी ओ करदा ऐ उनेंगी पुत्तर बी उसै चाली करदा ऐ।” 20किके पिता पुत्तर कन्ने प्यार करदा ऐ ते जेड़े-जेड़े कम्म ओ अप्पुं करदा ऐ, ओ सारे उसी दसदा ऐ; ते ओ इन्दे थमां बी बड्डे-बड्डे कम्म उसी दसग, तां जे तोस रांन ओई जायो। 21किके जियां पिता मोदें गी जिंदा ते उनेंगी जांन दिन्दा ऐ, उयांगै पुत्तर बी जिनेंगी ओ चांदा ऐ उनेंगी जिंदा करदा ऐ। 22पिता किसे दा न्याय नेई करदा, लेकन न्याय करने दा सारा कम्म पुत्तर गी सौम्पी दित्ता ऐ। 23एसकरी के सारे लोग जियां पिता दा आदर करदे न उय्यां गै पुत्तर दा आदर करन। जेड़ा पुत्तर दा आदर नेई करदा, ओ पिता दा, जिसी ओसने पेजे दा ऐ, आदर नेई करदा। 24आऊँ थुआड़े कन्ने सच-सच आखना ऐ, जेड़ा मेरा वचन सुनीयै मेरे पेजने आले उपर बश्वास करदा ऐ, मेशा दी जिंदड़ी ओसदी ऐ; ते ओस उपर सजा दा उक्म नेई ओंदा लेकन ओ मौत थमां पार ओईयै जिन्दडी च दाखल ओई चुके दा ऐ।

25आऊँ थुआड़े कन्ने सच-सच आखना ऐ ओ बेला ओंदा ऐ, ते इसै बेलै ऐ, जेदे च मरे दे लोक परमेसर दे पुत्तर दी बाज सुनगन, ते जेड़े सुनगन ओ जिंदे रौगन। 26किके जियां पिता गी अपने आप च जांन ऐ, उयांगै ओसने अपने पुत्तर गी बी ए आक्क दित्ता ऐ के अपने आप च जांन रखै; 27बरना उसी न्याय करने दा बी अख्त्यार दिते दा ऐ, एसकरी के ओ मनुक्ख दा पुत्तर ऐ। 28एस कोलां रांन नेई ओयो; किके ओ बेला ओंदा ऐ के जिन्नें कबरें बेच न ओ ओसदी बाज सुनीयै बार निकली औगन। 29जिन्नें पलाई कित्ती ऐ ओ जीनें आसतै जिंदा ओई जागन ते जिन्नें बराई कित्ती ऐ ओ सजा आसतै जिंदे ओई जागन।

यीशु दे बारै च गवाई

30“आऊँ अपने आप च केछ नेई करी सकदा; जे सुनना ऐं, उवै जीया न्याय करना ऐं; ते मेरा न्याय सच्चा ऐ, किके आऊँ अपनी मरजी नेई लेकन अपने पेजने आले दी मरजी चांना ऐ। 31जेकर आऊँ अप्पुं गै अपनी गुआई दियां, तां मेरी गुआई सच्ची नेई। 32एक ओर ऐ जेड़ा मेरी गुआई दिंदा ऐ, ते आऊँ जानना ऐ के मेरी जेड़ी गुआई ओ दिंदा ऐ, ओ सच्ची ऐ। 33तुसैं यूहन्ना थमां पूछया ते ओसने सच्चाई दी गुआई दिती ऐ। 34लेकन आऊँ अपने बारै च मनुक्ख दी गुआई नेई चानां; तां बी आऊँ ए गल्लां एस आसतै अखनां ऐ के तुसेंगी मुक्ति मिलै। 35ओ तां जलदा ते चमकता दीया जेया हा, ते तुसेंगी केछ चेर तकर ओसदी लोई च मगन ओना छैल लगया। 36लेकन मेरे कोल जेड़ी गुआई ऐ ओ यूहन्ना दी गुआई थमां बड़ी ऐ; किके जेड़ा कम्म पिता ने मिकी पूरा करने लेई सोंपा ऐ मतलब इयै कम्म जेड़ा आऊँ करना ऐ, ओ मेरे गवाह न, के पिता ने मिकी पेजा ऐ। 37ते पिता जेस ने मिकी पेजे दा ऐ, उसै मेरी गुआई दिती ऐ। तुसें नां कदें ओदी बाज सुनी, ते नां ओसदा रूप दिखया; 38ते ओसदे शिखया गी मन च कैम नेई रखदे, किके जिसी ओसने पेजया तोस ओदा बश्वास नेई करदे। 39तोस पवित्र शास्त्र च तुपदे ओ, किके सिखदे ओ के ओस च मेशा दी जिंदड़ी तुसेंगी मिलदी ऐ; ते ए उवै ऐ जेड़ा मेरी गुआई दिंदा ऐ; 40पी बी तोस मेशा दी जिन्दडी जीनें लेई मेरे कोल नेई औना चांदे। 41आऊँ मनुक्खें थमां आदर नेई चानां। 42लेकन आऊँ तुसेंगी जानना ऐं के थुआड़े देल बेच परमेसर दा प्यार नेई। 43आऊँ अपने पिता दे नां च आया ऐं, ते तोस मिकी कबूल नेई करदे; जे बाकी कोई अपने गै नां च आए, तां उसी तोस कबूल करी लैगे। 44तोस जेड़ा एक दुए थमां आदर चांदे ओ ते ओ आदर जेड़ा छडा परमेसर थमां ऐ, नेई चांदे, केस चाली बश्वास करी सकदे ओ? 45ए नेई समझो के आऊँ पिता दे सामने थुआड़े उपर लजाम ला; थुआड़े उपर लजाम लाने आला तां मूसा ऐ, जेस उपर तुसें परोसा रखया ऐ। 46किके जेकर तोस मूसा दा बश्वास करदे, तां मेरा बी बश्वास करदे, एसकरी के ओसने मेरे बारै च लिखा ऐ। 47लेकन जेकर तोस ओसदी लिखी दी गल्लें उपर बश्वास नेई करदे, तां मेरी गल्लें उपर कियां बश्वास करगे?”

Obecnie wybrane:

यूहन्ना 5: DOG

Podkreślenie

Kopiuj

Porównaj

Udostępnij