TSABURI 78
78
Ka Nyasaye Yakholela Vandu Veve
1Vandu vaanje, handi khu mechitso kaanje,
muhulishitsi makhuva kambolanga.
2Nzitsanga khulomolomela mu tsinganu;
nzitsanga khurumishila makhuva kaviswa karumishilwangwa khale,
3nivili vindu via khwahulila khandi khwamanya,
via vakuuka veru vakhuvoolela.
4Nu vutamanu khuvula khuvoolela vaana veru;
khuliitsa khuvoolela likhula liliitsa khuvaho,
makhuva khu vikholwa viu vukhumi viu Mwami Nyasaye nende tsingulu tsietsie;
khutsitsanga khumuvoolela viloleshitsu viu khuchenyinya via yakhola.
5Yahaana mechitso khu vitsukhulu va Yakobo;
navikha malako mu shivala shia Israeli,
ka yavoolela vakuuka veru
vave niveechitsanga vaana vavo;
6khu vandu vi likhula liliitsa khuvaho valimanya malako kenako;
vaana vashili khwivulwa,
khali vo valivoolelakhu vaana vavo;
7khu valivikha lisuuvilitswa liavo mu Nyasaye,
vuchiola khwivila vikholwa via Nyasaye,
navutswa vatsililile khulonda malako keke;
8vavuli khuva khuli vakuuka vavo vakholanga,
vandu vi likhula liu vuhaaka nende mahingani,
vandu vilikhula vali nivambakhana khuva vasuuvilwa khu Nyasaye.
9Vaefurahimu, khali niiva viyiyavaala vura nende mivanu,
vilukha khulitukhu liu khukwana liihe.
10Vambakhana khulonda lilakano lia Nyasaye,
vambakhana khumenya khulondokhana khu malako keke.
11Vivilila ka yali nakholi,
viloleshitsu via ya vamanyinya.
12Yakhola viloleshitsu mu shivala shia Misri mu lusomo lwa Zohani,
vakuuka vavo nivalolanga.
13Yavukhanyinya inyanza, navaviritsila muyo;
nakhola matsi khusinjila khuli masisi.
14Nyasaye yavimilila mbasu khuvirila mu malesi;
vutukhu vwosi khuvirila mu vulavu vu mulilu.
15Yaraanyinya lwanda mu shiangalangwi,
navaha matsi ku khung'wa khurula mu luliiva lwi inyanza.
16Nyasaye yachila matsi nikarula mu lwanda,
khali nakhola matsi nikakholomokha khuli muchela.
17Khali ndio, vatsililila khukholela Nyasaye vwoni,
nivali mu shiangalangwi vahinganyinya Nyasaye Uli Ikulu khu Viosi.
18Vachelitsa Nyasaye nivalolanga;
lwa venya vaheelwi shiukhulia shia vikombanga.
19Vanyeka Nyasaye nivavoola,
“Nyasaye anyala khukhuha shiukhulia mu shiangalangwi?
20Lwa yarumula khu lwanda,
matsi karulamu khuli muchela;
navutswa, anyala khukhuha shiukhulia,
khandi ahe vandu veve inyama yu khulia?”
21Lwa Mwami Nyasaye yahulila kenako,
yali mululu muno;
yachila mulilu nu kusamba vitsukhulu va Yakobo,
nalolela Vaisraeli vurima,
22shichila vambakhana khura lisuuvila liavo mu Nyasaye,
khali khusuuvilila mu tsingulu tsietsie tsiu khuhonyinya.
23Khali ndio, Nyasaye yahaana lilako khu malesi ikulu,
nikikukha khuli miliango.
24Yaronyinya imu hasi khurula mwikulu,
lwa yavarumila maana ku khulia.
25Mundu yaliakhu shiukhulia shi tsinjelosi;
ya varumila shiukhulia shiu khwikura.
26Nyasaye yachila imbuutsa nihuutsa khurula ivukwi,
khali naraanjitsa imbuutsa khurula ikuvanda
khuvirila mu tsingulu tsietsie.
27Yarumila vandu veve inyama inyishi khuli lukuushi,
manyonyi manyishi khuli muyeeshe khuluchinga lwi inyanza;
28manyonyi kenako karoonya mu maheemo ka vamenyamu,
shia havundu hosi mu maheemo.
29Vandu valia, nivikura;
Nyasaye yavaha shiukhulia shia vikombanga.
30Navutswa khali nivashili khwikuritsa luusa lwavo,
nivashili khumiila shiukhulia,
31Nyasaye yavalolela vurima;
niyiira vandu vi tsingulu khuvo,
namulula vayayi vavukha mu Israeli.
32Khali niiva yakhola kenako vatsililila khukhola vwoni;
khali niiva ya vakholela viloleshitsu vambakhana khusuuvila muye.
33Nalwo lwa yativitsa vulamu vwavo khuli miuya,
khali nivavirila mu matiinyu mu limenya liavo.
34Lwa Nyasaye yiira valala khuvo, vali nivarikale vakalukha khuye;
vikanila nivamukhava nu mwoyo kwosi.
35Vitsushitsa ndi Nyasaye yali khuli lwanda lwavo,
Nyasaye Uli Ikulu khu Viosi yali muhonyinyi wavo.
36Navutswa vamukaata mulilomoloma liavo;
vamuvoolela vuvehi.
37Vambakhana khumusuuvila nu mwoyo kwosi;
vameneka lilakano lielie.
38Navutswa shichila nu wi tsimbavasi, yavasemeha vwoni vwavo,
nalekha khuvativitsa.
Yikhutsila hali khanyishi mu vurima vwevwe,
nalekha khuvasalilitsila mu vurima vwevwe.
39Yitsushitsa ndi ni vandu vutswa;
vali khuli vushindu vuhuutsanga nuvukora.
40Ni hali khanga kha vamuhinganyinya mwichendanyama;
nivamuvelelitsa mu shiangalangwi!
41Vachelitsa Nyasaye hali khanyishi;
nivarindila Nyasaye Mutakatifu wa Israeli.
42Vivilila tsingulu tsietsie,
inoho litukhu lia ya vahonyinya khu vatsiku vavo;
43litukhu lia yakhola viloleshitsu vievie mu shivala shia Misri,
viloleshitsu vievie mu Lusomo lwa Zohani.
44Yakalukhanyinya michela chiavo nichikwa masahi,
vavuli khung'wakhu matsi khurula muchio.
45Yaruma shituma shi viku muvo, via vanyashitsa,
nende tsing'alo tsiononyinya shivala shiavo.
46Yaruma masa khulia viraakwa viavo;
khali tsisichi nitsiononyinya milimi chiavo.
47Yononyinya misabibu chiavo lwa yakhuvitsa imbula ya machina,
mikhuyu chiavo na matsi ki imparafu.
48Yiira tsing'ombe tsiavo ni imbula ya machina,
makondi kavo ni likulu.
49Nyasaye yali nu vurima vululu,
mululu, nu vuhimwa nende vutsiku,
naruma tsinjelosi tsiu khutivitsa.
50Yatsililila khuva nu vurima;
shiyavarulitsa mu likhutsa tawe;
navutswa yavativitsa khuvirila khu linyakhana liu vulwale.
51Nyasaye yiira vaana vi shiyayi vakhulundu mu shivala shia Misri;
mwana wu khuraanga khwivulwa mu tsinzu tsia Hamu.
52Navutswa yimilila vandu veve mwene khuli makondi,
navaviritsa mu shiangalangwi khuli shiayo shi miruku.
53Yavimilila mu vulindi vulahi, nivavula khuria;
navutswa vatsiku vavo viyinikha mu inyanza.
54Yavalera mu shivala shieshie shitakatifu,
mu vikulu via yali niyanyola khuvirila mu tsingulu tsietsie.
55Nyasaye yakhunganyinya vandu vi tsimbia tsindi imbeli wavo;
yakavulila vandu veve shivala shia vandu venavo,
khali namenyinya vandu vi tsimbia tsia Israeli mu shivala shienesho.
56Navutswa vachelitsa Nyasaye Uli Ikulu khu Viosi,
khali nivamuhinganyinya,
nivambakhana khulonda mivaalo keke;
57navutswa vahingana nivakhola vutamanu khuli vakuuka vavo vakholanga;
mwiima kwavo kwali khuli vura vwavorokha.
58Valomba Nyasaye nava nu vurima shichila havundu ha vasaalanga khu misambwa;
vachila navashendeshela shichila misambwa chiavo chiakhongwa.
59Lwa Nyasaye yalola ka vakholanga, yali nu vurima vunyishi;
niyambakhana Israeli.
60Yambakhana Liheemo Litakatifu lielie mu litaala lia Shilo,
hango ha yamenyanga mu vandu.
61Yachila vatsiku veru nivavukula Lisanduku li Lilakano,
shimanyilu shi tsingulu tsietsie nende vukhumi vwevwe.
62Nyasaye yalolela vandu veve mwene vurima
nalekha vatsiku vavo khuviira ni shivavi.
63Mulilu kwativitsa vayayi vavo vavukha,
vaana vi shikhana vavo nivavula vasatsa vanyala khuvahila.
64Vasalisi vavo viirwa ni shivavi,
khali vakhutsakhali vavo nivavula khwikhula.
65Nalwo lwa Mwami Nyasaye yavukha, khuli arulanga mu tsindolo;
khuli mundu wi tsingulu alaanjililanga shichila utandi.
66Nyasaye yakhunganyinya vatsiku veve;
navalerela tsisoni tsi mihika ni mihika.
67Navutswa yambakhana vitsukhulu va Yosefu,
navula khurovolakhu luhia lwa Efurahimu;
68navutswa yarovola luhia lwa Yuda,
Shikulu shia Sayoni, shia yayaanza.
69Nyasaye yumbakhaho Litempeli lielie khuli hango hehe mwikulu;
yalilomba khusinjila ni tsingulu khuvaho mihika ni mihika.
70Nyasaye yarovola murumishi wewe Daudi;
namurulitsa mu shiayo shia makondi;
71niyayitsanga makondi keke,
namulomba khuva Mwami wa Israeli,
mwayi wa vitsukhulu va Yakobo, nivali vandu veve.
72Daudi yavalinda vulahi nu mwoyo mulahi;
navamiha nu vucheli.
© The Bible Society of Kenya, 2013