TSINGANU 15
15
1Lichipu liu mwoyo kwakalaha lirulitsaho vululu,
navutswa likhuva liu vululu lichilanga vurima vuvaho.
2Lilomoloma liu mundu uli nu vusitsa lihaananga vucheli,
navutswa mundu muyiingwa avoolanga vindu viu vuyiingwa.
3Mwami Nyasaye alolanga shia havundu hosi;
aheenzanga mundu wi likhola lilahi nende litamanu.
4Lilomoloma lia kalaha lirelanga vulamu,
navutswa mikhuva milulu chivelelitsanga mwoyo.
5Mundu muyiingwa achayanga mivaalo ka tata wewe,
navutswa woyo uhuchililanga khuchelihitswa nu mucheli.
6Mu tsinzu tsia vandu vi likhola liu vulunji khulimu ni miandu minyishi,
navutswa mirungu chia vandu vatamanu vanyolanga chivalerelanga matiinyu.
7Lilomoloma lia vandu vu vusitsa lilanditsanga vucheli;
shikali kario khu vandu vayiingwa tawe.
8Vihanwa vi misango via vandu vatamanu ni shifwavi khu Mwami Nyasaye,
navutswa ayaanzitswangwa ni lisaala lia vandu valahi.
9Vindu via vandu vatamanu vakholanga ni shifwavi khu Mwami Nyasaye,
navutswa wayaanza yavo vakholanga likhola liu vulunji.
10Mundu wu kholanga vindu vitamanu aliitsa khusalilitswa vululu muno,
navutswa woyo wambakhananga khuchelihitswa aliitsa khukhutsa.
11Niiva Mwami Nyasaye wamanya kakholekhanga mu shihatisi nende muvutivi,
anyala khukorwa ndi tsinganakani tsiu mundu?
12Mundu wi shihenye henye wayambakhana khuchelihitswa;
Khali yikhalanga ihale wene khurula khu vandu vu vusitsa.
13Mundu uli nu vuyaanzi amwenyanga hamoni hehe,
navutswa khutuunya khuvelelitsanga mwoyo.
14Mundu uli ni limanya yenyelitsanga vucheli,
navutswa vayiingwa valolanga nu vulahi khutsililila khuva vayiingwa.
15Vandu vamanani vamenya shia litukhu nivanyakhananga;
navutswa vandu vali nu vuyaanzi mu limenya liavo
vatsilililanga khwikhoyela mu milikha.
16Nu vulahi khuva ni shitititi navutswa uhe Mwami Nyasaye luyali
khuvira khuva muhinda nikhali wamenya nunyakhananga.
17Nu vulahi khulachilila tsingutsa nuli nu vuyaanzi,
khuvira mulukha kwi lilia likali li vindu vinuulu ha khuli nu vuhimwa.
18Mundu uli nu vurima vu vwangu achilanga lilembana livaho,
navutswa wi likhutsila aleranga milembe.
19Mundu mukaara avirilanga mu vutiinyu
mumatukhu koosi kashili mwoyo;
navutswa likhola liu mundu wi likhola liu vulunji lialunjikha.
20Mwana uli nu vusitsa achilanga tata wewe asangala,
navutswa mundu muyiingwa achayanga mama wewe.
21Mundu muyiingwa ayaanzanga lwa ali musilo,
navutswa woyo uli ni limanya atsilililanga khukhola likhola liu vulunji.
22Vuchila khuva na mechitso vindu vimali khuloshitswa khwikholekha vikoyananga;
navutswa inganakani irulanga khu vandu vanyishi
ichilanga mundu akuura.
23Lichipu limali khuchipwa munjila indahi liyaanzitsanga mundu;
Nu vulahi khuvoola likhuva lilahi mumatukhu kenyekhanga!
24Likhola liu mundu uli nu vusitsa limwinjilitsanga mu vulamu mwikulu;
khumwikalila khutsia mu shihatisi.
25Mwami Nyasaye asambulanyinyanga tsingo tsia vandu vilola,
navutswa alindanga miandu chiu mukhutsakhali.
26Tsinganakani tsia vandu vatamanu ni shifwavi khu Mwami Nyasaye,
navutswa ayaanzitswangwa na makhuva malahi.
27Mundu mwilili wu khunyola vukhala vu vuvehi achilanga vandu vi inzu yeye nivanyakhana;
navutswa woyo wambakhananga khuheelwa asoya
aliitsa khutsililila khuva mwoyo.
28Vandu vi likhola liu vulunji vakanakananga nivashili khuchipa,
navutswa vandu vatamanu valomolomanga vindu vitamanu.
29Mwami Nyasaye ali ihale wene khurula khu vandu vatamanu,
navutswa ahulilanga lisaala lia vandu vi likhola liu vulunji.
30Khumwenya mumoni khuchilanga mundu ava nu vuyaanzi,
khandi makhuva malahi kalombanga mundu yihulila vulahi mu mmbili.
31Mundu uhulishitsanga khuli achelihitswangwa,
aliitsa khuva nu vusitsa.
32Mundu wambakhananga khulonda mivaalo yichayanga mwene,
navutswa woyo uhuchililanga khuchelihitswa anyolanga limanya.
33Khuha Nyasaye luyali nako mivaalo karulananga khu vusitsa,
khandi nushili khuheelwa luyali uve mwichelihitsi.
© The Bible Society of Kenya, 2013