YOSHWA 14
14
Khukavulwa khu Lusomo luli Imbo wu Muchela kwa Yorodani
1Kalondakhu yaka kivaalanga khuli shivala shia Kanaani, khuluveka luli imbo wu Muchela kwa Yorodani shiakavulwa mu Vaisraeli. Musalisi Eliazari, Yoshwa mwana wa Nuni, halala na vimilili va vandu vi tsinzu tsia Israeli vakavulila vandu voosi. 2Tsisomo tsia vandu vi tsimbia tisa ninusu khuluveka luli imbo wu Muchela kwa Yorodani, akavulwa khuvirila khu ikura, khuli Mwami Nyasaye yali niyavoolela Musa vakhole. 3Musa yali wahaakhu vandu vi tsimbia tsivili ninusu ya vandu vuluhia lundi shivala khuluveka luli ivukwi wu Muchela kwa Yorodani; navutswa shiyali wahaakhu vandu vu lwivulu lwa Levi, khuli yakavila vandi tawe, 4shichila vitsukhulu va Yosefu, vali vakwa tsimbia tsivili -- vandu vi tsimbia tsia Manaase nende Efurahimu; vandu vu lwivulu lwa Levi vavulakhu lusomo lwosi, lwa vanyola mu shivala shienesho; navutswa mataala ku khumenyamu konyene, nende havundu ha vanyala khwayitsa miruku chiavo. 5Vaisraeli vakavula shivala shienesho, khuli Mwami Nyasaye yali niyavoolela Musa vakhole.
Kalebu Yaheelwa Litaala lia Heburoni
6Litukhu lindi, vandu valala varula mu vandu vuluhia lwa Yuda, nivatsia khulola Yoshwa mu litaala lia Gilugali. Mulala khuvo walaangwangwa Kalebu mwana wa Yefuna warulanga mu vandu vi inzu ya Vakenizi, yamuvoolela, “Umanyikhu makhuva ku Mwami Nyasaye yavoolela Musa, mundu wa Nyasaye, nu khuli Kadeshi-bareneha khulondokhana khwinzi nende yivi. 7Nali nindi ni mihika makhomi kane, lwa Musa murumishi wu Mwami Nyasaye, yanduma khurula Kadeshi-bareneha khwitsa khurunishitsa shivala yishi. Namuvoolela makhuva katoto, ka nanyolayo. 8Nikhali vandu va khwarumwa navo vachila vandu veru nivaria. Navutswa inzi nasuuvilila Mwami Nyasaye, uli Nyasaye wanje nu mwoyo kwosi. 9Khulitukhu lienelo, Musa yanzisuuhila navoola, ‘Khusuuvilitsanga ndi shivala shia waseenamu, shiliitsa khuva shioshio nende vitsukhulu vovo mihika ni mihika, shichila walonda malako ku Mwami Nyasaye, uli Nyasaye wanje nu mwoyo kwokwo kwosi.’ 10Navutswa nunundi, lolakhu. Chiakhavira mihika makhomi kane na chiranu, khurula Mwami Nyasaye navoolela Musa makhuva kenako. Kikholekha mumatukhu ka Vaisraeli, vakhalakanyila mu shiangalangwi; khandi Mwami Nyasaye, khuli yandaka, waninda shili mwoyo khurula mumatukhu kenako. Mbenzakhu nunundi! Ndi ni mihika makhomi munane na chiranu. 11Shili vutswa ni tsingulu nunundi, khuli tsingulu tsia nali natsio khulitukhu lia Musa yanduma ninzia. Shili vutswa ni tsingulu tsiu khutsia khukwana muliihe, inoho khukhola shindu shiosi. 12Khulwa yako, umbee shivala shi vikulu, shiu Mwami Nyasaye yandaka alamba khulitukhu lienelo, lwa inzi nende vandu vaanje khwakalukha. Khwakhuvoolela ndi vandu vuluhia lwa Anaki vamenyayo mu mataala ki tsimbinga. Haundi, Mwami Nyasaye aliitsa khuva ninzi, nilikhunga vandu venavo, khuli mwene yali niyavoola.”
13Nalwo lwa Yoshwa yakasitsa Kalebu mwana wa Yefuna, namuha litaala lia Heburoni khuva lielie mwene. 14Khulwa yako, litaala lia Heburoni khali nunundi ni lia vitsukhulu va Kalebu, shichila yalonda nu mwoyo kwosi Mwami Nyasaye, uli Nyasaye wa Israeli. 15Litaala lia Heburoni lialaangwangwa khale Kiriatsi Araba. Araba yali mundu wi tsingulu tsinyishi mu vandu vuluhia lwa Anakimu. Milembe chianyolekha lwenolo mu shivala shienesho.
© The Bible Society of Kenya, 2013