YAKOBO 4
4
Vulina ni Vindu viu mu Shivala
1Ni shina shichilanga liihe nu khurindilana khukholekhanga mu munyi nu khuvaho? Khurulanga khu likomba lienyu liu khuyaanzitsa vivelo vi mivili chienyu, likwananga shia khase khosi mu munyi. 2Mwikombanga khunyola vindu, navutswa lwa muvulanga khuvinyola, mwirechekhanga khali khwiira. Mwikombanga khuva ni vindu nu mwoyo kwosi; navutswa lwa muvulanga khuvinyola, murindilana numukwana. Muvula vindu via mwenyanga muve numuli navio, shichila shiumureevanga Nyasaye amuhe tawe. 3Lwa mureevanga amuhe, shiumunyolanga tawe, shichila mureevanga munjila indamanu, khulu khwenya khurumishila khukhola ka yaanzitsanga likomba lienyu li mivili. 4Munyi vandu vambakhana khuva vasuuvilwa! Munyala khuva mwakorwa ndi khukhola vulina ni vindu viu mu shivala, kamanyinyanga ndi muli vatsiku va Nyasaye? Khulwa yako, mundu wenyanga khulomba vulina ni vindu viu mu shivala, yikholanga mwene khuva mutsiku wa Nyasaye. 5Mukhakanakani Mahandiko Matakatifu kavula vwatoto, lwa kavoolanga, “Roho wa Nyasaye yakhuha wayitsula likomba liu vululu.” 6Navutswa tsimbavasi tsia Nyasaye akhuheetsanga tsili ni tsingulu tsinyishi. Nashio shivune shichilanga Mahandiko Matakatifu nikavoola,
“Nyasaye wayambakhana vandu vilola,
navutswa alolelanga tsimbavasi vandu vichehitsi.”
7Khulwa yako, munyi vene mwihaane khu Nyasaye. Mwambakhane Ibilisi, neye aliitsa khumwilukha. 8Mwisuundie khu Nyasaye, neye aliitsa khwisuunda khu munyi. Munyi vooni, mukololoshitsi limenya lienyu! Munyi va mwikhola kholitsanga khuva valunji, muve vanihu mu mioyo chienyu! 9Muve nu vuveleli mu mioyo, mulili numwikhula. Nu vulahi nu mukalukhanyinyi khusekha khwenyu khuva khwikhula; vuyaanzi vwenyu khuva khutuunya! 10Muve vichehitsi imbeli wu Mwami, naye aliitsa khumuha tsingulu.
Ukhakhalachila Wundi Tawe
11Vasuuvili vashianje, muvuli khulomoloma vindu vitamanu khulondokhana khu vandi. Mundu ulomolomanga vindu vitamanu khulondokhana khu wundi, inoho ukhalachilanga wundi, alomolomanga shindu shitamanu khulondokhana khu malako khandi akhalachilanga Malako. Navutswa niiva unyala khukhalachila Malako, shiunyala khukhola shia Malako kenyanga tawe; navutswa ukakhalachilanga. 12Nyasaye neye wonyene uhaananga malako khandi nu mukhalachi. Ye wonyene ali nu vunyali vu khuhonyinya khandi khutivitsa. Navutswa ukanakananga unyala khuva uli viina, lwa ukhalachilanga mureende wowo?
Khuleshe Khwichinjilila
13Mbulishitsikhu, munyi vamuvoolanga, “Nunundi inoho mukamba khulatsia khuchenda mu litaala likali lindi, wa khuliitsa khumenya khumuhika mulala khandi khukholeleyo mihinzilu chieru nu khunyola vukhala.” 14Khali shiumumanyikhu shindu shiosi khulondokhana khu katsitsanga khwikholekha mukamba tawe! Vulamu vwenyu ni shina? Muli vutswa khuli mwooshi mutititi, kutuumanga hatititi vutswa, makukora. 15Nikhali, mwenyekhanga muvoole, “Niiva ni lienya liu Mwami, khulamenya makhukhole yaka inoho yako.” 16Khuli kalolekhanga, munyi mwayilola khandi mwayichinjilila. Vwichinjilili khuli vwenovo nu vutamanu.
17Khulwa yako, mundu wambakhananga khukhola shikholwa shilahi, shia yenyekhanga ave nakholanga, avetsanga nakholi vwoni.
© The Bible Society of Kenya, 2013