ISAYA 66
66
Khuli Mwami Nyasaye Akhalachila Tsimbia Tsindi
1Mwami Nyasaye avoolanga,
“Likulu ni shisoko shianje shiu vwami,
na lilova ni havundu hanje haseenanga.
Ni inzu lukanu shina yamutsitsanga khunzumbashila,
ni havundu shina ha nzitsanga khumenya?
2Ninzi mwene walomba vindu yivi viosi,
viosi ni vianje.
Navutswa nyanzitswangwa nu mundu uli mwichehitsi
khandi uheendanga mwoyo,
umbetsanga luyali nalonda likhuva lianje.
3“Navutswa vandu yava vakholanga ka vene vayaanzililanga,
mundu wu kholanga musango
lwa asinzanga ichilishi ali vutswa
khuli mundu wiiranga wundi;
mundu usinzanga likondi,
ali vutswa khuli mundu utong'olanga isiimbwa ling'ori;
mundu uhaananga shihanwa shi imu,
ali vutswa khuli mundu uhaananga shihanwa shia masahi ki tsingulume;
mundu usambanga vubani khuli shihanwa,
ali vutswa khuli mundu usaalanga khu musambwa.
Varovola khukhola ka vene venyanga,
khandi vayaanzilila khukhola milukha chi shifwavi.
4Niitsa khuvakhola vanyole vutiinyu,
vindu vichilanga nivaria viliitsa khuvakwila;
shichila, lwa navalaanga mundu avulakhuho khali mulala wanjipa,
lwa nalomoloma, mundu avulakhuho khali wahulishitsa.
Vakhola vindu vitamanu imbeli wanje
khali nivarovola khukhola vindu via nambakhana.”
Lisalilitswa nende lihonyinywa
5Hulishitsi likhuva liu Mwami Nyasaye,
munyi va mumuheetsanga luyali khandi mulonda malako keke,
“Lwa muli vasuuvilwa khwinzi,
valala khu vamwavo venyu vamuhimanga,
khandi vavula shia vamuheendelanga mwoyo.
Vamukholelanga shihenye henye nivavoola,
‘Leshi Mwami Nyasaye aheelwi vukhumi, khu khulole vuyaanzi vwenyu’;
navutswa navo valiitsa khutamanyinywa.
6Hulishitsikhu, khuli liyooko lihulilikhananga mu litaala likali!
Mwoyo kuhulilikhananga mu Litempeli!
Mwoyo ku Mwami Nyasaye lwa asalilitsanga vatsiku veve.
7“Litaala likali lianje lili khuli mundu wivulanga khali nashili khulumwa;
khali nashili khuhulila isalila,
nalwo lwa yali namali khwivula mwana.
8Ni viina wahulilakhu likhuva khuli lienelo?
Ni viina walolakhu likhuva khuli lienelo nilikholekhanga?
Shivala shiaraanjitswakhu khulitukhu lilala ni?
Shichila lwa Sayoni yali nalumwangwa vwangu,
nalwo lwa yivula vaana veve.
9Khu, nyala khulinda vulahi vandu vaanje
khutukha khulitukhu liu khwivula,
nu khwikalila khwivulwa ni?
Inoho inzi uchilanga nivivula vaana,
nyala khuvikalila lwivulu ni?
Inzi Mwami Nyasaye mali khuvoola.”
10Mwikhoye halala na ni litaala likaali lia Yerusalemi
mamusangale mulio,
munyi voosi vamwaliyaanza;
mwikhoye mulio mu vuyaanzi,
munyi voosi vamwikhulanga shichila lio;
11Muliitsa khuyaanzilila mu vunyishi vu vuhinda vwalio,
khuli mwana mutoro anunanga maveele ka mama wewe.
12Mwami Nyasaye avoolanga,
“Niitsa khulikhola khuva nu vuhinda vunyishi khuli muchela,
khandi miandu chia vandu vi tsimbia tsindi chiliitsa khuva khuli muchela kuvulanga khukhaama matsi.
Muliitsa khunuuna nu khuchingwa khuli mwana mutoro,
nu khumoolitswa khuli mama amoolitswangwa mwana wewe khu masikamo keke.
13Niitsa khumuleminya mwoyo, khuli mama aleminyanga mwoyo mwana wewe;
muliitsa khuleminywa mwoyo mu Yerusalemi.
14Muliitsa khulola nikakholekhanga,
mamuve nu vuyaanzi mu mioyo chienyu;
muliitsa khuva ni tsingulu nu khukhomeela mivili
khuli vunyasi vuneeranga;
Nalwo lwa muliitsa khumanya ndi inzi Mwami Nyasaye
nindanga varumishi vaanje,
navutswa nimbukuli vurima salilitsanga vatsiku vaanje.”
15Mwami Nyasaye aliitsa khwitsa khuli mulilu,
makaare keke kiliihe khuli shihungutsi;
aliitsa khuchila vurima vwevwe vuloleshe nu vululu,
khandi lichelihitso lielie liliitsa khumanyinywa khuvirila khu tsimemo tsiu mulilu.
16Mwami Nyasaye aliitsa khukhalachila vandu
narumishilanga mulilu,
aliitsa khusalilitsa vandu voosi narumishilanga shivavi shieshie;
valiitsa khwiirwa vanyishi.
17Mwami Nyasaye avoolanga, “Yavo vitakasanga nivinihitsa vene khu vatsi khwinjila mu milimi, nivalondekhananga vene, nivalia inyama yi ingulume, vindu vi shifwavi nende tsihuyi, valiitsa khukhutsila khulala.
18“Namanya vulahi mihinzilu chiavo nende tsinganakani tsiavo, khandi niitsa khulera halala vandu vi tsimbia tsiosi; tsiliitsa khwitsa matsilole vukhumi vwanje. 19Niitsa khura shimanyilu shi tsingulu tsianje hakari hatsio. Yavo valiitsa khuva nivihonoloshe niitsa khuvaruma khutsia khu vandu vi tsimbia tsindi tsili, Tarishishi, Puti, Ludi, Tubali, Yavani, khandi havundu handi ha tsinjinga tsili ha vandu vashili khuhulilakhu shindu shiosi khulondokhana khwinzi inoho khulolakhu vukhumi vwanje. Navo valiitsa khuvoola havulavu makhuva khu vukhumi vwanje khu vandu vi tsimbia tsindi. 20Valiitsa khulera veshe voosi khurula mu vandu vi tsimbia tsiosi khuli shihanwa khwinzi Mwami Nyasaye. Valiitsa khwitsa nivanini khu tsifarasi, khandi mu makaare, mu tsimbochi, khu tsisushili, khandi khu tsingamia, khwitsa mu shikulu shianje shitakatifu, khuli Vaisraeli valeranga shihanwa shiavo shi imu khwinzi Mwami Nyasaye, nivachinji mu shindu shinihu. 21Niitsa khuvukula khandi valala khuvo khuva vasalisi khandi vandi khuva vandu vu lwivulu lwa Levi. Inzi Mwami Nyasaye mali khuvoola.
22“Khuli lwa likulu liyia nende lilova liyia lia nombanga liliitsa khutsililila khuvaho khuvirila khu tsingulu tsianje, nindio khandi khuli vitsukhulu venyu nende lira lienyu lilitsililila khuvaho.
23Shia litukhu liosi liu Milukha chiu Mweli Khwilavushitsa Vuyia,
khandi shia litukhu liosi li Lisabato,
vandu voosi valiitsa khwitsa mu Yerusalemi khusaala khwinzi.
Inzi Mwami Nyasaye mali khuvoola.
24“Valiitsa khulola mivili chia vandu vakhutsa,
nivali yavo vambinganyinya;
tsinyende tsiliitsa khuvalia shitsiliitsa khukhutsa;
inoho mulilu kuvasambanga khutsiminywa tawe.
Valiitsa khuva khuli shindu shiu khusiinya vandu voosi.”
© The Bible Society of Kenya, 2013