ISAYA 40
40
Khuli Vandu va Nyasaye Valeminywa Mwoyo
1Nyasaye wenyu avoolanga,
“Muleminye mwoyo vandu vaanje,
muvaleminye mwoyo!
2Mutinyilitse vandu vamenyanga mu Yerusalemi,
muvavoolele ndi linyakhana liavo limali khuvwa;
khandi vasemehwi vutamanu vwavo;
mali khuvasalilitsa shichila vwoni vwavo vwosi.”
3Mundu alaanjililanga navoola,
“Recheshitsi injila yu Mwami Nyasaye mu shiangalangwi!
Lunjishitsi mu shiangalangwi muhaanda mukalamu
kwa Nyasaye weru alondelakhu.
4Shia luhoongo luliitsa khwililitswa,
khandi shia shikulu nende rukulu viliitsa khuchehitswa;
havundu hashiama haliitsa khulekhanyinywa
khandi havundu ha makova kali haliitsa khuva lwomera.
5Nalwo lwa vukhumi vu Mwami Nyasaye vuliitsa khumanyinywa;
ma vandu voosi mu shivala vavulolele khulala,
shichila Mwami Nyasaye umali khuvoola kenako.”
6Mundu alaanjililanga navoola, “Yilwatse likhuva!”
Nalwo lwa nareeva, “Likhuva shina lia nzilwatsa?”
Yambolela, “Yilwatse ndi vandu voosi vali khuli vunyasi,
khandi likoondo liavo lilahi lili khuli mawua mu mulimi.
7Vunyasi vunialanga, khandi mawua kavungulukhanga,
lwa Mwami Nyasaye arumanga vushindu vwevwe khuvihuutsa;
ni kilikali, vandu vali vutswa khuli vunyasi.
8Vunyasi vunialanga, mawua kavungulukhanga,
navutswa likhuva liu Mwami Nyasaye lilavaho mihika ni mihika.”
9Numuyaanza mutikulushi khu shikulu shiaraambiha,
Munyi vandu va Sayoni, munyi va mwilwatsanga likhuva lilahi!
Mumulaanjilile nu mwoyo mukali,
munyi vandu va Yerusalemi, va mwilwatsanga likhuva lilahi;
yilwatsi kamuli nako, muvuli khuria;
vooleli mataala ka Yuda, “Loli, Nyasaye wenyu yitsanga!”
10Loli! Mwami Nyasaye yitsanga nu vunyali vwevwe,
khandi yamihanga ni tsingulu tsietsie;
loli, ali ni shihanwa shieshie
khandi yimililanga yavo vamali khuhonyinya.
11Atsitsanga khwayitsa shiayo shieshie khuli mwayi;
Aliitsa khulera halala vimeme via makondi mu makhono keke,
nu khukachinga himbi khu maveeka keke;
nu khwimilila vulahi vwene yako kali ni vimeme vitoro.
Nyasaye wa Israeli Avula Wanyala Khulekhanyinywakhu
12Ni viina unyala khupima inyanza ni tsikhovi tsiu mukhono kwekwe
inoho khupima malesi na makhono keke?
Mundu alikhuho unyala khwitsulitsa malova ku khulilova mu shikombe
inoho khupima khu ilaatili vulitoho vwi vikulu nende rukulu?
13Ni viina wavoolelakhu Roho wu Mwami Nyasaye kanyala khukhola,
inoho wamukhonyakhu inganakani yu khulonda?
14Ni viina wa Nyasaye yareeva amukhonye inganakani yu khucheliha,
ni viina wamwechitsa khukhola katoto,
khandi ni viina wamwechitsa khuli anyola vucheli,
khandi wamumanyinya khuli anyola limanya?
15Ni kilikali, vandu vi tsimbia tsiosi vali khuli imbuuru ya matsi karoonyanyanga nikarula mu indoho;
khandi kavukulwangwa khuli lukuushi nikapimwa khu ilaatili;
loli, avukulanga visuulu khuli lukuushi lunyiukhu muno.
16Muliru kwa Lebanoni kuvula tsikhuyi tsiu khurumishilwa,
inoho tsinyama tsiu khukholela musango kwi shihanwa shiu khusambwa.
17Mwami Nyasaye avukulanga vandu vi tsimbia tsiosi khuli ni shindu shikhaya khuye;
avalolanga khuli vavula vukhonyi
khandi ni shindu shikhaya.
18Ni viina wa munyala khulekhanyinya khu Nyasaye,
inoho ni likoondo shina lia munyala khusasanyinya khuye?
19Nu musambwa! Nukuli kwa mundu yalomba,
ma mwiraanyi wi itsahabu akuvekha itsahabu
khandi akulombela minyololo khurula khu ifetsa.
20Mundu mumanani
unyala khuvula khukhola musango khuli kwenoko
arovolanga shihanwa shi tsikhuyi tsinyala khuvula khukuunda.
Akhavanga mundu wechela khulomba vindu
khumulombela shifwanani shinyala khuvula khusuundwa.
21Mushili khumanyakhu? Khali mushili khuhulilakhu?
Mushili khuvoolelwakhu khurula khale?
Mushili khuvoolelwakhu khuraanjila khulitukhu lia shivala shialoongwa?
22Shialoongwa na woyo wikhalanga khu shisoko shieshie shiu vwami,
khandi vandu vamenyanga mushio vali khuli matakalala.
Wavambalalitsa likulu khuli nu luvaala,
nu khwaala hasi khuli ni liheemo liu khumenyamu.
23Arulitsanga khu vwami vimilili vi tsingulu
makhola vamihi vamihanga khulilova khunu khuva shindu vutswa.
24Vali vutswa khuli viraakwa vitoro,
vivetsanga ni viakharaanga khumeela vuchila khuva ni miili chiene.
Lwa Mwami Nyasaye arumanga vushindu,
viumanga ma vushindu vuvihuutsa khuli nu vunyasi vuumu.
25Nyasaye mutakatifu avoolanga:
Ni viina wa munyala khulekhanyinya khwinzi,
mbe khuli ye?
26Khali heenzikhu mu malesi mamulole!
Ni viina waloonga vindu via mulolanga?
Woyo uvimililanga khuli yimililanga mukaanda kwa vasikali;
wamanya ni vianga khandi alaanganga shia shilala lira!
Ali ni tsingulu tsinyishi muno -- khali shilala khuvio
shinyala khuvula khukora!
27Yivi Yakobo, shichila shina wilililanga nuvoola
ndi Mwami Nyasaye wakorwa vutiinyu vwovwo,
inoho khali avula shia khuheendelakhu mwoyo
lwa unyashitswangwa uvula khukholelwa vwatoto?
28Munyala khuva mushili khumanyakhu?
Khali mushili khuhulilakhu?
Mwami Nyasaye ni Nyasaye wi mihika ni mihika;
neye waloonga shivala shiosi.
Ashili khuteteshelakhu inoho khuvwa tsingulu;
mundu avulakhuho unyala khumanya shia yenyanga khukhola.
29Aheetsanga vandu vashiindanga tsingulu,
nu khumeeta mundu uvula vunyali vwosi tsingulu.
30Khali vavukha valiitsa khuvwa tsingulu nu khuteteshela,
khandi vasatsa vavukha valiitsa khwisikarila nu khukwa;
31navutswa yavo vali ni lisuuvilitswa liavo mu Mwami Nyasaye
valiitsa khumeetwa tsingulu;
valiitsa khupulukha ni tsimbaha khuli shilitsa;
valiitsa khwilukhaka vuchila khuvwa tsingulu;
valiitsa khuchenda vuchila khushiinda.
© The Bible Society of Kenya, 2013