ISAYA 32
32
Vuhonyinyi Vwatoto vwa Israeli
1Loli, mwami aliitsa khwamiha khuvirila mu likhola liu vulunji,
khandi vimilili valiitsa khwimilila munjila yatoto.
2Shia mulala khuvo aliitsa khuva khuli havundu uw khwishinga khu vushindu,
khandi shivisilu khurula khu imbuutsa,
khuli michela chia matsi mu shiangalangwi,
khuli shinini shiu lwanda lukali mu shivala shiahangalala.
3Nalwo lwa vandu vali ni tsimoni valiitsa khulola;
khandi maroyi ka vandu vahulilanga kaliitsa khuhulishitsa.
4Vandu vakholanga vindu vuchila khwikhutsila valiitsa khuva vacheli ni limanya,
khandi vandu vasilu mulilomoloma
valiitsa khulomoloma vulahi vwene.
5Vandu vayiingwa valiitsa khuvula khulaangwa vimilili,
inoho vi shileeche khuheelwa luyali.
6Vandu vayiingwa valomolomanga vindu viu vuyiingwa,
khandi vakanakananga khukhola vindu vitamanu:
khukhola vindu vi shifwavi,
khunyeka Mwami Nyasaye,
khulekha vandu vi inzala ilumanga vatsililile khuva ni inzala;
khandi khwima vandu vu vuluhu matsi ku khung'wa.
7Vindu via vandu vayiingwa vakholanga ni viu vuyiingwa;
valoshitsanga khuli vanyala khutivitsa vandu vamanani
khali niiva ka vandu vavula khwavatiila,
vakanakananga khukholelwa ni katoto.
8Navutswa mundu waheelwa luyali
akholanga vindu viu khuheelwa luyali,
akwanilanga vindu viu khuheelwa luyali.
Mivaalo khu Vakhali Vamenyanga Yerusalemi
9Munyi vakhali vi limenya liu khwiyaanzitsa, muhulishitsi makhuva kaanje;
munyi vamuvula liheenda mwoyo liosi, muhulile kambolanga!
10Munyi vamuli mu vulindi vulahi,
muliitsa khutechela;
shichila litunda livulakhuho lia muliitsa khuchesa khu musala kwi misabibu.
Khali lichesa lia matunda kavulakhuho ka muliitsa khuchesa mumatukhu ki lichesa.
11Munyi vakhali vi limenya liu khwiyaanzitsa, mutechele;
munyi vamuli mu vulindi vulahi, mutechele numuria;
munavule tsinguvu tsienyu,
mwifwale tsinguvu tsia makunia mu visiindi vienyu.
12Mwirumule khu tsimbele tsienyu numuvelele,
shichila milimi chi lilova lilahi
khandi milimi chi misabibu milahi,
13khandi shichila shivala shia vandu vaanje,
nishili shivala shia mavwa nende maraakalu kameelamu;
toto, mwikhule shichila tsinzu tsiosi tsia vandu vali nivamenyamu nu vuyaanzi
khandi shichila litaala likali lia vandu vikhoyelamu.
14Khali inzu yu vwami iliitsa khulekhwa,
litaala likali lia vandu vanyishi vamenyamu lisang'alale;
shikulu nende minaara viliitsa khwononyinywa mihika ni mihika;
tsipunda tsiumbulimu tsiliitsa khuhuya huyamu,
khali makondi kaliitsa khwayitswamu;
15khutukha lwa Roho aliitsa khwikha khu khutsi khurula mwikulu,
mwichendanyama muliitsa khukwa mulimi kwi lilova linuulu,
khandi mulimi kwi lilova linuulu kulikwa muliru.
16Katoto kaliitsa khwikholekha mwichendanyama,
khandi likhola liu vulunji mu mulimi kwi lilova linuulu;
17shichila vandu valiitsa khunyola milembe khurula khu likhola liu vulunji;
khandi valimenya mu vuhonjelu nu khuva ni lisuuvilitsa mihika ni mihika.
18Vandu vaanje valiitsa khumenya muvumenyo vwi milembe,
nivali mu tsingo tsiu vulindi vulahi,
havundu ha valiitsa khuhulushila vuchila khunyashitswa.
19Khali niiva imbula ya machina iliitsa khukhuva ma ilikwishitsa misala chiosi chiu muliru,
khali niiva litaala liosi liliitsa khutivitswa,
20muliitsa khukasitswa muno,
muliitsa khumiitsa vukuutsa vwenyu shia havundu hosi ha matsi kali,
ma tsing'ombe nende tsipunda tsienyu
tsilichenda shia havundu hosi nitsiayanga
vuchila mundu khutsilinda.
© The Bible Society of Kenya, 2013