ISAYA 29
29
Likhuva khu Yerusalemi
1Wooyi!! Uli khu vutiinyu yivi Yerusalemi, vwaali vwa Nyasaye!
Litaala likali lia Daudi yamenyamu lili khu vutiinyu!
Leshi muhika mulala kuviri inoho chivili chitushi nu khuvwa,
ni milukha chienyu chia mwamenya nu mukholanga.
2Nikhali niitsa khukhola yivi litaala likali lia Yerusalemi khunyakhana,
vandu valiitsa khulila nu khwikhula,
ma litaala likali liliva khwinzi khuli vwaali vwa Nyasaye,
lili na masahi ka vandu viirwa shia havundu hosi.
3Nyasaye aliiitsa khumuvotokhana
nu khumukwana mu tsimbeka tsiosi.
4Uliitsa khusiuvwa hasi muno mu vwina;
uliitsa khulomolomela mu vwina vwenovo;
uliitsa khulomoloma makhuva koko nuli hasi mu lukuushi;
mwoyo kwokwo kuliitsa khuhulilikhana hasi mu malova
khuli kwi shinanyenzo.
5Navutswa vatsiku vovo vanyishi valiitsa khukalukhana vave khuli lukuushi lunyiukhu lumali khuchingwa,
vatsiku vovo vakhukholela vindu vitamanu valiitsa khuhuutsanyinywa khuli mukhutse kwilulwangwa.
Kaliitsa khwikholekha vwangu vuchila khumanyikha.
6Mwami Nyasaye wi Mikaanda Chiliihe aliitsa khukhukhonya;
aliitsa khwitsa nu muhumu mukali ku khutechelitsa shivala.
Aliiitsa khwitsa nu vushindu vukali vwi shihungutsi
nu mulilu ku khulaalitsa.
7Nalwo lwi vivala viosi vikwananga Yerusalemi,
vandu voosi vaseeranga imbinga yavo
nu khuvakhola khuvaheenditsa mu vunyishi mwoyo,
valiitsa khukoora khuli malooro,
khuli makhuva ku mundu alolanga mu tsindolo nakoni.
8Vivala viosi vikwananga Yerusalemi vilasasanyinywa
khuli mundu wa inzala ishimulumanga maloora aliitsanga shiukhulia,
navutswa lwa avukhanga mu tsindolo anyola ali ni inzala ishi imulumanga,
inoho khuli mundu wa vuluhu vulechi maloora ang'wetsanga matsi,
navutswa lwa avukhanga mu tsindolo anyolanga uhangalale vuluhu vumulechi.
Vaprofeti Vasilo
9Mutsililile khuva vasilo! Mutsililile khuva vavekhu!
Tandi khali numukhang'wele idivai!
Chendi khuli vandu vatandi,
vuchila khutsanzamakhu khali ruti!
10Mwami Nyasaye umuheele tsindolo tsinyishi;
umali khumuvekhulitsa muvuli khulola munyi vaprofeti;
umali khumukhunikha tsinganakani tsienyu
mutsililile khuva vasilo munyi valoli.
11Malolo yaka koosi kali khu munyi khuli makhuva kahandikwa mu shitabu, nashio shia khunikhwa vutinyu. Khali nuhilila mundu wamanya khusoma, ma umuvoolele somela shitabu yishi, alakhuchipa shianyala khushisoma tawe, shichila shia khunikhwa vutinyu. 12Niiva ulaha mundu wakorwa khusoma asome, alakhuvoolela shinamanya khusoma tawe. 13Mwami Nyasaye avoolanga,
“Vandu yava vitsanga khusaala khwinzi na makhuva mele,
khandi vambeetsanga luyali mulilomoloma vutswa,
navutswa mioyo chiavo chili ihale wene khwinzi.
Vasikamilanga khulondokhana khu mechitso karulanga khu vandu vutswa.
14Khulwa yako, niitsa khukholela vandu yava likhuva liu khuchenyinya,
liu khuhuka khandi liu khuchenyinya.
Vusitsa vwa vandu vavo vali nu vusitsa vuliitsa khuvwa,
khandi vucheli vwa vandu vavo vali nu vucheli vuliitsa khuviswa.”
Lisuuvilitswa mu Matukhu Kaliitsa Khuvaho
15Wooyi! Muli khu vutiinyu munyi va mwivisanga khu Mwami Nyasaye
nu mukhola vindu vienyu,
munyi vamukholelanga vindu vienyu mu shisuundi numuvoola,
“Ni viina ukhulolanga?
Ni viina unyala khumanya shia khukholanga?”
16Munyi mukholanga vindu makalaama!
Muloonji anyala khuva shilala na matohi kukhuloonjela?
Shindu shialoongwa shinyala khuvoolela mundu washiloonga,
“Nivi wanoonga tawe?”
Inyungu yaloongwa inyala khuvoolela mundu wachiloonga,
“Unyala khuva wakorwa shia shindu shiosi?”
17Harikale hatititi vutswa,
muliru kwa Lebanoni kulikalukhanyinywa khukwa mulimi munuulu,
khali mulimi kuli munuulu nunundi
kulikalukhanyinywa khukwa muliru.
18Khulitukhu lienelo, vandu vikala maroyi valiitsa khuhulila
makhuva kaliitsa khusomwa khurula mu shitabu,
khandi khurula mu shisuundi tititi,
vavekhula valiitsa khulola ni tsimoni tsiavo.
19Vandu vichehitsi valiitsa khuva nu vuyaanzi mu Mwami Nyasaye;
khali vandu vamanani valiitsa khwikhoyela mu Nyasaye,
uli Mutakatifu wa Israeli.
20Vandu vi shileeche valiitsa khutivitswa,
vandu vakholelanga Nyasaye shihenye henye valiitsa khuvwaho;
vandu voosi vayaanzililanga khukhola vutamanu
valiitsa khutivitswa.
21Vandu vakoyanyinyanga shiyaalo shiu mundu mushiina
valiitsa khutivitswa,
khandi vandu vakholelanga vakhalachi vindu vitamanu
khandi vavoolanga vuvehi khwikalila katoto khurweshitswa khu vandu vavula vutamanu.
22Khulwa yako, Mwami Nyasaye wahonyinya Aburahamu,
avoolanga makhuva yaka khu vandu vi nzu ya Yakobo,
“Vandu vi inzu ya Yakobo valiitsa khuvula khulekhwa mu matiinyu khandi,
inoho khwihunamila khandi mu tsisoni.
23Lwa valiitsa khulola vaana vavo,
vaana va inzi mwene nachila nivivulwa,
valiitsa khuhaana vukhumi khu lira lianje;
valiitsa khuhaana vukhumi khwinzi Mutakatifu wa Yakobo;
nu khumba luyali inzi Nyasaye wa Israeli.
24Vandu vayiingwa valiitsa khweka limanya,
khandi yavo vayaanza khwililila valiitsa khuhuchilila mivaalo.”
© The Bible Society of Kenya, 2013