ISAYA 17
17
Nyasaye Aliitsa Khusalilitsa Siria nende Israeli
1Yili nalio likhuva lia Nyasaye khulondokhana khu Damasika.
“Hulishitsi! Damasika liliitsa khuvula khuva litaala likali khandi;
liliitsa khukwa shikulu shia mashindi vutswa!
2Mataala keke kaliitsa khurikala mele mihika ni mihika;
kaliitsa khukwa lwayo lwa makondi,
khandi avulakhuho uliitsa khukarishitsa.
3Mataala kevwa na masisi ka Efurahimu kaliitsa khuyongovela,
khandi vwami vwa Damasika vuliitsa khu vwaho;
Vasiria valiitsa khwihonolokha valiitsa khulola tsisoni khuli nivivulwa Vaisraeli.
Inzi Mwami Nyasaye wi Mikaanda Chiliihe mali khuvoola.”
4Mwami Nyasaye avoolanga,
“Litukhu yelo luyali lwa Yakobo luliitsa khuchehitswa
khandi tsingulu tsietsie khuvwa.
5Aliitsa khuva khuli mulimi kwa vachesimu viukhulia,
aliitsa khukholwa khuli muchesi avunanga imu mu mulimi,
khandi aliitsa khuva khuli mulimi kwa vavunamu mu Luhoongo lwa Refahimu.
6Ni vandu vati vonyene vutswa valiitsa khurikala khuli misayituni chirikalanga,
misayituni chivili, inoho chivaka khu lusia lwivutoonje;
chine, inoho chiranu khu musala kwamanga mu vunyishi.
Inzi Mwami Nyasaye, uli Nyasaye wa Israeli mali khuvoola.”
7Khulitukhu lienelo, vandu valiitsa khumanya Muloonji wavo, khandi valiheenza khu Nyasaye Mutakatifu wa Israeli. 8Shivaliitsa khwenya khandi vwaali vwa vene valomba na makhono kavo, inoho vasuusilili mu vindu via vene valomba -- vimanyilu via nyasaye wi shikhali Ashera nende vwaali vu khusambilakhu vubani tawe.
9Khulitukhu lienelo, mataala kavo ki tsingulu kaliitsa khuva khuli mataala karikala mele ka Vaahivi nende Vaamori, varika vutswa lwa vali nivilukhanga Vaisraeli.
10Munyi Vaisraeli, mwayivilila Nyasaye wamuhonyinya,
khandi mwa yambakhana khwitsushitsa lwanda lwa mwivisamu;
Khulwa yako, khali niiva numuraaka viraakwa vilahi viene via Baali,
khandi muvisaalili khu musambwa kwa nyasaye wa vandu vi tsimbia tsindi;
11khali nu muvikhola vimeele khulitukhu lienelo,
shindu shivulakhuho shiamuchesa
khulitukhu yelo li linyakhana nende lisalila likhahona tawe.
Vivala via Vatsiku Varulamu Viakuurwa
12Wooyi! Hulilikhu khuli vandu vanyishi vakhuvanga liyooko,
vakhuvanga liyooko khuli inyanza ihilikananga!
Wooyi! Hulilikhu khuli vandu vi tsimbia tsindi tsihumanga,
tsihumanga khuli maruundu kakhuvakananga!
13Vandu vu tsimbia tsindi vahumanga khuli matsi manyishi nikahilikananga,
navutswa Nyasaye alatsikondeshela, natsio tsililukha tsitsi ihale wene,
khuli muyeeka kuhuutsanga ikhulio khu shikulu
khandi khuli lukuushi lutuumulwangwa ni shihungutsi;
14khuli shirishitsanga mu tsisaa tsia halukolovo,
khandi shihoonjela nuvutsia khu shia!
Yaka nako kalikwila vandu vakhunuulanga miandu chieru
khandi vakhuyaaya vindu vieru.
© The Bible Society of Kenya, 2013