ISAYA 14
14
Khuli Varula mu Vuhaambe
1Navutswa Mwami Nyasaye aliitsa khuvela tsimbavasi Yakobo; aliitsa khurovola khandi Israeli. Aliitsa khuvakalushitsa mu shivala shiavo vene. Vandu vi tsimbia tsindi valiitsa khwiyunga navo, mavakwi shindu shilala na vandu vi inzu ya Yakobo. 2Vandu vi tsimbia tsindi valiitsa khuvavukula nu khuvahila havundu havo vene. Vaisraeli valiitsa khuvavukula vamenye navo mu shivala shiu Mwami Nyasaye, khuli varukwa vavo vasatsa nende vakhali. Valiitsa khukumila khuli vavohe yavo vali nivavakhola vavohe; nu khwamiha vandu va vatambitsanga.
Khuli Mwami wa Babilonia Yativitswa
3Lwa Mwami Nyasaye aliitsa khumuhulishitsa mu lisalila nende linyakhana lienyu, khandi khurula khu muhinzilu mulitoho kwa mwanikwa khukhola, 4muliitsa khukhola shihenye henye khu Mwami wa Babilonia, numuvoola,
“Lolikhu khuli mundu wakhutambitsanga amali khutivitswa,
khuli vululu vwevwe vumali khuvwa!
5Mwami Nyasaye umali khutong'olanyinya indovoshi ya vandu vatamanu,
shikong'o shiu vwami shia vamihi,
6shia yarumishila mu vurima vwevwe khutambitsa vandu,
ni vikhuusi vikhavwetsanga tawe;
shia yamihila vandu vi tsimbia tsindi mu vurima vwevwe
natsililila khutambitsa tsimbia tsindi vuchila khutsilolela tsimbavasi tsiosi.
7Shivala shiosi shiahonjela khandi shili mu milembe;
shia mundu yimbanga tsinyimbo nu vuyaanzi.
8Khali misala chi mitarakwa nende ceda chia Lebanoni chikhoyanga shichila yivi, nichivoola,
‘Lwa waremeelwa hasi,
mundu avulakhuho witsanga khukhuyeelitsa hasi.’
9“Shihatisi shirecheshe khukhumiila
lwa nuve nu wakhakhutsa.
Shivwanyinyanga mulilu mu vinanyenzo khwitsa khukhuha milembe,
halala na yavo voosi vamihanga khulilova;
vivasinjilitsanga khu visoko viali viavo viu vwami
yavo voosi vamihanga vandu vi tsimbia tsiosi.
10Viosi viliitsa khulomoloma nivikhuvoolela,
‘Khali yivi uli muteteshele khuli khwateteshela!
Umali khukwa khuli lwakhuli!’
11Wali waheelwa luyali lwa wakhuvilwangwa vilili,
navutswa nunundi wakhutsa uli mu shihatisi.
Ukonanga havundu hi mitsiambolo chili,
khandi tsinyende natsio tsikhuvimbanga.
12“Yivi uli khuli inyining'ini ing'eleng'ananga nu vwakhashia mu mavwevwe,
lolakhu khuli wakuukha khurula mwikulu!
Lolakhu khuli wasiuvwa hasi,
yivi wali nu wakuura vandu vi tsimbia tsiosi!
13Wakanakana nuvoola,
‘Niitsa khutsia mwikulu;
navikha shisoko shianje shiu vwami hikulu hene hi tsinyining'ini tsia Nyasaye;
nzitsanga khwikhala khu shikulu shili ivuluka ha vanyasaye vakanilanga halala.
14Niitsa khutsia ikulu wene wa malesi;
khandi nzikhole mwene khuva shilala na Nyasaye Uli Ikulu khu Viosi.’
15Navutswa wasiuvwa mu shihatisi,
walukuurwa mukari mwene mu vwina.
16“Yavo vakhulolanga valiitsa khukhusekha;
nu khwireevana nivavoola,
‘Uyu neye mundu wachila shivala nishitechela,
warishitsanga vwami,
17wakhola shivala nishikwa shiangalangwi
khandi nativitsa mataala kali mushio,
wakhahuchilila vavohe veve khutsia ingo toto?’
18Vami va vandu vi tsimbia tsindi tsiosi vayeveelwa mu vukhumi,
shia mulala mu shilindwa shieshie mwene.
19Navutswa yivi warulitswa, nusiuvwa ilwanyi wi shilindwa shioshio;
khuli mwana wu luuswa wahululwa,
walaakalala wiirwa na vandu vakhutsa,
valivirwa ni shivavi,
wakhutsila mu vwina vu lwanda,
vandu nivakhuseenela hasi.
20Navutswa shiuliitsa khuyeveelwa mu shilindwa navo tawe,
shichila wativitsa shivala shioshio,
nivi mwene wiira vandu vovo.
Saalanga ndi khali mulala khu vitsukhulu va vandu vatamanu valivula khukulikhwakhu!
21Mwirecheshe khusinza vaana veve shichila vutamanu vwa vakuuka vavo vakhola;
shikenyekhanga valivushilila valiamiha khulilova
nu khumbakha mataala mulio tawe.”
Nyasaye Alativitsa Babilonia
22Mwami Nyasaye wi Mikaanda Chiliihe avoolanga, “Nzitsanga khukwana litaala lia Babilonia malitivitsi. Inzi Mwami Nyasaye shinzitsanga khulekhakhu shindu shiosi vaana, inoho mundu wosi shilihonolokha khali hati hene tawe. Inzi Mwami Nyasaye wi Mikaanda Chiliihe mali khuvoola. 23Nzitsanga khukalukhanyinya litaala lia Babilonia khukwa havundu ha makhule kamenyanga khandi khuva shitohi; niitsa khuyeenza litaala lia Babilonia ni sheeyo shiliitsa khweeya shia shindu shiosi. Inzi Mwami Nyasaye wi Mikaanda Chiliihe mali khuvoola.”
24Mwami Nyasaye wi Mikaanda Chiliihe umali khwisuuha navoola,
“Katoto, kamali khuloshitsa kaliitsa khwikholekha khuli ndoshitse,
khandi kambiritsi kalikholekha kaliitsa khwikholekha,
25Niitsa khutivitsa Muashuria mu shivala shianje,
khandi nilimutuuvachila khu vikulu vianje;
niitsa khuvoholola vandu vaanje khu Vashuria valivula khutambitswa,
nu khuvula khuvakhola khukwa varukwa vu khuchinga misiko khu maveeka kavo.
26Yaka nako kanganakananga khu vandu vamenyanga mu shivala;
nzitsanga khusalilitsa vandu vi tsimbia tsiosi khulilova.”
27Ka Mwami Nyasaye wi Mikaanda Chiliihe aloshitsi khukhola,
ni viina unyala khumwikalila khukhola?
Niyenyanga khusalilitsa,
ni viina unyala khumukaya khuvula khusalilitsa?
Nyasaye Aliitsa Khutivitsa Vafilisti
28Yili nalio likhuva liavoolwa
khumuhika kwa Mwami Ahazi yakhutsilakhu:
29Munyi Vafilisti voosi, muvuli khwikhoya,
lwa indovoshi ya vamurumulilanga yatong'okha;
shichila khurula mu inzukha imbilikong'o
nayo inyolekhamu,
inge irulanga mulivuyu liene.
30Mwana mukhulundu wu mumanani aliitsa khulia wikura,
khandi vandu vavula shiavitiilakhu khumenya mu milembe.
Navutswa niitsa khuchila inzala iliira vaana venyu;
na vandu venyu voosi valiitsa khuva nivarikale.
31Yivi shilivwa, hoola mioyo;
yivi litaala, lila tsikhwili;
Munyi Vafilisti voosi, mutechele!
Shichila mwooshi kurulanga ivuluka,
khandi vasikali vi ikholo navo varoonjele khukwana.
32Ni lichipu shina lia mundu achipa varumwa vuluhia lwenolo?
Valiitsa khuvoolelwa ndi Mwami Nyasaye wasinjilitsa ni tsingulu Sayoni,
khandi ndi vandu vavula khwavitiila mu vandu veve valiitsa khwilushilamu.
© The Bible Society of Kenya, 2013