ISAYA 12
12
Lwimbo lu Khusanditsa
1Khulitukhu lienelo, muliitsa khuvoola,
“Khusanditsanga yivi Mwami Nyasaye,
shichila khali niiva wambukulila vurima,
vurima vwovwo vwamanya nuvucheha,
nuneminya mwoyo.
2Ni kilikali, Nyasaye neye umbonyinyanga;
nasuuvila muye, vuchila khuria;
shichila Mwami Nyasaye neye umbetsanga tsingulu nende vunyali,
khandi neye muhonyinyi wanje.”
3Muliitsa khuteeha matsi numuli nu vuyaanzi,
khurula mu visiima vihaananga vuhonyinyi.
4Khulitukhu lienelo, muliitsa khuvoola,
“Khusanditsi Mwami Nyasaye,
khusaale khu lira lielie.
Landitsili vandu vi tsimbia tsindi vikholwa vievie;
vooleli vandu khuli lira lielie liheelwa vukhumi.
5Mwitsominyile Mwami Nyasaye mu tsinyimbo,
shichila wakhola vindu vi tsingulu;
yaka koosi kamanyikhane shia havundu hosi khulilova.
6Munyi vandu vamenyanga mu Sayoni,
mulaanjilile ikulu numwimba tsinyimbo tsiu vuyaanzi,
shichila woyo wi tsingulu wumenyanga na munyi,
ni Nyasaye Mutakatifu wa Israeli.”
© The Bible Society of Kenya, 2013