ISAYA 1
1
1Shitabu yishi shili na makhuva khu malolo ka Isaya mwana wa Amozi yalola, khu lusomo lwa Yuda nende litaala likali lia Yerusalemi. Kakholekha mumatukhu ka vami Uzia, Yotsamu, Ahazi, nende Hezekia vamihanga Yuda.
Vutamanu vwi Shivala shia Yuda
2Mwami Nyasaye avoolanga,
“Uhulishitsi yivi likulu,
reeka maroyi yivi lilova;
shichila inzi mwene
naleela vaana nu khuvavilushitsa
navutswa vamali khumbinganyinya.
3Ihili yamanya mwene wachivaya,
khali ipunda yamanya ha muruchi wayo achiayitsanga;
navutswa Vaisraeli vakorwa,
vandu vaanje vavuli limanya.”
4Wooyi! Muli khu vutiinyu munyi vandu vuluhia lukholanga vwoni,
munyi mwalitohitswa nu vutamanu,
vaana vivulwa mu vandu vatamanu,
vandu vatundana mu likhola liavo!
Munyi mwayivilila Mwami Nyasaye,
mwachaya Nyasaye Mutakatifu wa Israeli;
mwavirana naye khandi mwakalukha inyuma.
5Shichila shina mutsilililanga khwenya khunyashitswa?
Shichila shina mutsilililanga khuhingana?
Muli ni tsinguma khu mirwi,
khandi mwasalila mwoyo kwosi.
6Khuraanjila hasi khu indekeye khutukha khu murwi muvulakhu hali halamu,
navutswa hayitsula tsimbala, makuule, nende mavimba karoonyanga masahi,
nako shikochitswangwa inoho kavohwa ni shindu,
inoho kavekhwa makura tawe.
7Shivala shienyu shiasang'alala,
mataala kenyu kasambwa nu mulilu;
vacheni vamunuulanga shivala shienyu numurelekhu tsimoni,
shiasang'alala, khuli litaala liativitswa lia Sodomu.
8Vandu va Sayoni valekhwa khuli litiili mu mulimi kwi misabibu,
khuli shiniikha mu mulimi kwa kakumba,
shilolekhanga khuli litaala liavotokhanwa.
9Nikakhavele Mwami Nyasaye wi Mikaanda Chiliihe shiyakhuleshela vandu
khwakhavele khuli litaala lia Sodomu,
khwakhavele khuli litaala lia Gomora.
10Munyi vamihi va Sodomu,
muhulile likhuva liu Mwami Nyasaye!
Munyi vandu va Gomora,
hulishitsi mechitso ka Nyasaye weru!
11Mwami Nyasaye avoolanga,
“Misango chienyu minyishi chili nu vukhonyi shina khwinzi?
Vihanwa viu khusambwa via mamiiko
nende shivana shi miruku mikhomeelu vimali khundukha;
Shinyanzililanga masahi ki tsichilishi tsienyu,
inoho ka makondi kenyu,
inoho ki tsimbuli tsikhole tsienyu tawe.
12Lwa mwitsanga khwinzi khusaala,
ni viina wamuvoolela mumulerele vindu yivi,
numuseneeka mu lwanyi lwanje vutswa?
13Muvuli khunderela vihanwa ni vi shikhaya vutswa;
vubani vwenyu vwa musambanga vwasiinya muno.
Shinyala khuyaanzitswa ni Milukha chiu Mweli Khwilavushitsa Vuyia chienyu,
matukhu kenyu ki Lisabato nende
vituma vienyu vi idini tawe, shichila ni mitamanu.
14Shinyanzitswangwa ni Milukha chiu Mweli Khwilavushitsa Vuyia chienyu
nende milukha chindi chiaviritswa tawe.
Ni misiko militoho khwinzi;
mbula tsingulu tsiu khutsililila khwikhutsila.
15Lwa muchinganga mwikulu makhono kenyu
khusaala khwinzi,
niitsa khulekha khumwitsushitsakhu;
khali niiva muliitsa khusaala mu vunyishi,
niitsa khulekha khuhulishitsa;
shichila mwasuundula shisahi shinyishi.
16Mwisinji na matsi mulave;
leshi khukholela vikholwa vitamanu numulola!
Mulekhane ni likhola litamanu,
17Mweche khukhola malahi;
mukhave khuli murweshitsa vwatoto,
muhavine vatambwitswangwa,
mukholele vavisandu lienya liavo,
rweshitsili vakhutsakhali ka venyanga karweshitswi.”
18Mwami Nyasaye avoolanga,
“Hambi, leshi khukhonyane inganakani.
Khali niiva vwoni vwenyu vuli khuli masahi,
muliitsa khulavu khuli machina ki imparafu;
khali niiva vuli khuli vumuuchi muno,
muliitsa khulava khuli ipamba.
19Niiva mulirulitsa khulonda malako kaanje konyene vutswa,
muliitsa khulia vindu vilahi vicheswangwa mu milimi;
20navutswa niiva mulachaya malako kaanje nu khumbinjitsa,
muliitsa khutivitswa ni shivavi;
shichila inzi Mwami Nyasaye mali khuvoola.”
Litaala Likali liu Vwoni
21Lolikhu khuli litaala likali liu vusuuvilwa
lilolekhanga khuli mukhali mulaaya!
Liali liarweshitsa mu vunyishi katoto,
likhola liu vulunji liakholekhanga mulio,
navutswa nunundi vulumindi vwayitsula mulio.
22Ifetsa yenyu yakwa ikutu,
idivai yenyu yatsukanyinywa matsi.
23Vamihi venyu ni vahingani,
khandi ni valina vi vihuuvi.
Shia mundu wosi wayaanza khuheelwa asoya,
khandi vilukhachilanga khuheelwa vihanwa.
Vayambakhana khulinda vavisandu
nu khuhulishitsa mukhutsakhali
nayaalwangwa mushiina.
24Khulwa yako, Mwami Nyasaye wi Mikaanda Chiliihe, uli Nyasaye wa Israeli avoolanga,
“Ni kilikali, nzitsanga khumuvukulila vurima;
nu khuvanzila mwene vatsiku vaanje.
25Niitsa khumukhola likhuva;
niitsa khusisulula ikutu yenyu nu munyu
khumukhola khuva vanihu.
26Niitsa khumukalushitsila vakhalachi
khuli kakholekhanga muliraanga,
khandi vakhonyani vi inganakani khuli mumatukhu kakhale.
Nikamali khwikholekha, nalwo lwa muliitsa
khulaangwa ‘Litaala likali li likhola liu vulunji’,
‘Litaala likali liu vusuuvilwa.’ ”
27Litaala likali lia Sayoni liliitsa khuhonyinywa mu vwatoto,
khandi yavo vamenyanga mulio nivikanila
valiitsa khuhonyinywa munjila yi likhola liu vulunji.
28Navutswa vandu vahingana nende vooni
valiitsa khutivitswa khulala,
khandi yavo vambakhana khulonda malako ku Mwami Nyasaye
valiitsa khumululwa.
29Muliitsa khuheelwa tsisoni shichila miseno chiachilanga numuyaanza;
nu khuheenditswa mwoyo shichila milimi chia mwarovola.
30Muliitsa khuniala khuli musala ku museno kwavungulukha masambu,
khuli mulimi kwahangalala kwakhaama matsi.
31Vandu vi tsingulu valiitsa khukwa khuli vunyasi vumakanu,
mihinzilu chiavo khuli tsisasi tsiu mulilu;
vo voosi halala ni mihinzilu chiavo
viliitsa khusambwa khulala,
vuchila mundu unyala khutsiminya mulilu.
© The Bible Society of Kenya, 2013