DANIELI 4
4
Malooro ka Nebukadineza khu Musala
1Mwami Nebukadineza yavoolela vandu khurula mu vandu vi tsimbia tsiosi nende tsinomonomo tsiu mu shivala likhuva yili,
“Nyoli milembe khurula khwinzi! 2Nyenyanga mumanye vulahi vwene makhuva khulondokhana khu viloleshitsu nende vindu viu khuchenyinya, via Nyasaye Uli Ikulu khu Viosi yakholela.
3“Vimanyilu via Nyasaye ni vi tsingulu tsinyishi,
khali vindu vievie viu khuchenyinya ni viu vunyali!
Vwami vwevwe nu vwami vwi mihika ni mihika;
khandi yamihanga khumatukhu koosi.
4“Inzi Mwami Nebukadineza nali nimenyanga limenya lilahi hango hanje khandi ninzihulilanga vulahi muno mu inzu yanje yu vwami. 5Navutswa lwa nali ningoni khu shitali shianje mu vutukhu, naloora malooro ku khurishitsa. Nalola malolo kambenditsa mu mwoyo kwanje. 6Nahaana lilako khu vandu voosi vu vusitsa mu Babilonia khwitsa imbeli wanje, nikanyalikha vambolele shia malooro kaanje kavoolanga. 7Nalwo lwa vakhumu, valoochi, Vababilonia, nende valakuli valerwa. Navavoolela malooro kaanje, navutswa vakhaywa khumbolela shia kavoolanga. 8Lwinyuma, Danieli, ulaangwangwa Beletishazari, lira liali lia nyasaye wanje, uli na roho wa vanyasaye, yitsa imbeli wanje -- khali nimuvoolela malooro kaanje,
9“Yivi Beletishazari, uli mundu wimililanga vakhumu, namanya ndi uli na roho wa vanyasaye vatakatifu, khandi wamanya makhuva khulondokhana khu kaviswa mu malooro kaanje. Nuyaanza mbolela shia kavoolanga.
10“Lwa nali ningonanga khu shitali shianje, naloora malooro yaka; nalola musala muraambi muno hakari wi lilova. 11Musala kwaraambiha nu kuva musala mukali, khali nu kutukha mwikulu khu vandu voosi vakulole mu shivala. 12Kwali na masambu malahi muno. Kwali kwayama matunda manyishi ka vandu voosi vanyala khulia. Tsinyama tsiumbulimu tsiamenyanga mu shiniikha shiu musala kwenoko.
13“Lwa nali nishikonanga khu shitali shianje, nalola malolo; nonoho lwa nalola mulindi mutakatifu narulanga mwikulu. 14Yalila nu mwoyo mukali navoola, ‘Reemi musala khandi mutsole tsisia tsiakwo. Vungulanyinyi masambu katsio khandi musalanyinye matunda kakwo. Khunganyinyi tsinyama mu shiniikha shiakwo nende manyonyi mu tsisia tsiakwo. 15Navutswa leshi shisiikhi nende miili hasi mu malova, nivivoheelwi ni shivia nende mukasa, khandi vunyasi vuviisi nu vivotokhane. Leshi vinyole matsi khurula khu liime liu mwikulu, nu khumenya khuli inyama yumbulimu mu visakha viu mu shivala shinu. 16Leshi vwoongo vwevwe vukalukhane khandi ave nu vwoongo khuli vwi inyama yumbulimu khumihika saba. 17Valindi navo vaviritsanga likhutsa, likhuva likholekhanga shichila malako ka vatakatifu, khu vandu voosi vali mwoyo vamanye ndi Nyasaye Uli Ikulu khu Viosi neye wamihanga vwami vwa vandu. Neye uchilanga mundu wa yenyi yamiha nu khwikhalitsa vandu vati khu shisoko shiu vwami.
18“Yaka nako malooro ka inzi Mwami Nebukadineza naloora. Yivi Beletishazari, mbolela makhuva ka kavoolanga, lwa vandu vu vusitsa voosi mu vwami vwanje vamali khukhaywa khumbolela shivune shia kavoolanga. Unyala khukhola ndio, lwa roho wa vanyasaye vatakatifu amenyanga mu yivi.”
Danieli Yavoola Shivune Shiene
19Nalwo lwa Danieli walaangwangwa lindi Beletishazari yanyakhanakhu hati muno. Yatechela mu mwoyo kwekwe. Mwami Nebukadineza yamuvoolela, “Malooro halala ni shivune shiako kakhakhutechelitsa tawe.” Beletishazari yachipa, “Nzikombanga ndi vindu viavoolwa vilakholekha mu malooro yaka vikwili vatsiku vovo, navutswa khuvula khukwila yivi. 20Musala kwa walola kwali muraambi khandi mukali, khali nu kutukha mwikulu khu vandu voosi vakulole, 21kwali na masambu malahi muno nende matunda manyishi khukwo, khandi kwa vandu vanyishi valia, tsinyama tsiumbulimu ni tsimenya mukwo khandi manyonyi nikumbakha vitsu viako mukwo -- 22Mwami Nebukadineza, nivi neye musala kwenoko! Waraambiha khandi uli ni tsingulu tsinyishi; 23Nivi walola khandi mulindi mutakatifu narulanga mwikulu, navoola ‘Reema musala kwenoko khukutivitsa, navutswa lekha shisiikhi shiakwo nende miili hasi mu malova, nende shindu shialombwa khu shivia nende mukasa mumbulimu; khandi liime khukhutsinzivitsa, khutukha lwa uliitsa khumenya halala ni tsinyama tsiumbulimu khumihika saba?’
24“Yivi mwami wanje, yaka nako ka malooro koko kavoolanga, khandi nako ka Nyasaye Uli Ikulu khu Viosi avooli kaliitsa khukhukwila. 25Uliitsa khukhunganyinywa mu vandu, ulimenya mumbulimu nende tsinyama tsiumbulimu. Uliitsa khwaya vunyasi khuli ihili khandi liime liliitsa khukhutsinzivitsa khumihika saba khutukha lwa uliitsa khumanya ndi Nyasaye Uli Ikulu khu Viosi neye wamihanga vwami vwa vandu; khandi neye uheetsanga mundu wa ye mwene yenyi vwami. 26Navutswa shisiikhi nende miili chiu musala kwenoko viarikala hasi mu malova. Kamanyinyanga ndi uliitsa khunyola khandi vwami vwovwo lwa uliitsa khumanya ndi Nyasaye neye wamihanga shia shindu shiosi mu shivala. 27Khulwa yako, yivi mwami, nuyaanza umbulishitsi. Lekha khukhola vwoni, navutswa ukhole likhola liu vulunji. Lekhana nu vutamanu vwovwo khandi uvele tsimbavasi vamanani. Haundi, nalwo lwa uliitsa khuva muhinda muno.”
Shia Malooro Kavoolanga Shiarweshitswa
28Yaka koosi kakwila Mwami Nebukadineza. 29Lwa mweli kwi likhomi na chivili kwali nu kuvwetsanga, Mwami Nebukadineza yali nachendanga khwikulu khwi inzu yeye yu vwami mu litaala lia Babilonia. 30Mwami Nebukadineza yalomoloma nu mwoyo mukali, navoola, “Heenzikhu mu litaala likali lia Babilonia! Ninzi naliumbakha mwene khuvirila mu vunyali vwi tsingulu tsianje, khuva havundu hanje wu vwami, shichila vunyali vwanje!” 31Lwa yali nashilomolomanga makhuva kenako, yahulila mwoyo nu kulaanjililanga khurula mwikulu, nu kuvoola, “Mwami Nebukadineza, likhuva yili nalio lirumilwi khu yivi! Vwami vurulitswi khu yivi! 32Uliitsa khukhunganyinywa mu vandu. Uliitsa khumenya mumbulimu nende tsinyama tsiumbulimu, khandi uliitsa khwaya vunyasi khuli ihili. Uliitsa khumenya urio khumihika saba, khutukha lwa uliitsa khumanya ndi Nyasaye Uli Ikulu khu Viosi neye wamihanga vivala khandi neye wamihitsanga mundu wa yenyi wosi.”
33Isaa indala yeneyo, vuprofeti vwenovo vwarweshitswa; khali Nebukadineza nakhunganyinywa mu vandu. Yamanya niyaaya vunyasi khuli ihili, khandi natsinzivitswa ni liime liu mu shivala. Yamela liswi linyishi khuli tsimbaha tsi shilitsa, khandi naraambiha makhuvuyu khuli ka manyonyi.
34“Lwa matukhu kenako kali nikakhavwa, inzi Nebukadineza naheenza ikulu, ma tsinganakani tsianje nitsikalukha. Nasanditsa Nyasaye Uli Ikulu khu Viosi, ninzitsominya khandi nimba woyo uli mwoyo mihika ni mihika luyali; shichila yamihanga mihika ni mihika, khandi vwami vwevwe vuliho khumatukhu koosi. 35Vandu voosi vamenyanga khulilova vavula vukhonyi imbeli wewe, khandi shia yenyi khukhola vindu viu mwikulu nende vandu vamenyanga khulilova, nako kakholanga. Mundu avulakhuho unyala khumwikalila inoho khumuvoolela, ‘Ni shina shia wu kholanga?’
36“Mumatukhu kenako, namanya ninyola khandi tsinganakani, khali tsingulu tsianje nende luyali. Vandu vakhonyanga inganakani nende varumishi vaanje vakhava inzi; nanyola khandi tsingulu mu vwami vwanje, khandi nimba nu vunyali vinyishi.
37“Inzi Nebukadineza, nzitsominyanga, khuminyanga khandi mbananga luyali khu Mwami wu Mwikulu. Vikholwa vievie viosi ni viatoto khandi viu vulunji; khandi achilanga vandu vilola khuva vichehitsi mu likhola liavo.”
© The Bible Society of Kenya, 2013