2 VATESALONIKE 1
1
1Khutsi Paulu, Silivano nende Timoteo,
Khuhandichilanga vandu vi likanisa lia Tesalonike, nivali vandu va Nyasaye, uli Tata weru nende Mwami Yesu Kristo.
2Nyasaye, uli Tata weru nende Mwami Yesu Kristo vamulolele tsimbavasi, khandi vamuhe milembe.
Likhalachilwa lwa Kristo Aliitsa Khukalukha
3Vasuuvili vashieru, khusanditsanga Nyasaye shia khase khosi shichila munyi. Nu vulahi nu khukholi ndio, shichila lisuuvila lienyu limeetekhanga mu vunyishi, khandi vuyaanzi vwa shia mulala ali navwo khu vandi khandi vumeetekhanga. 4Nako kachilanga khutsi nu khwichinjilila, shichila munyi mu makanisa ka Nyasaye. Khwichinjililanga khulondokhana khuli mutsilililanga khwikhutsila, khandi khusuuvila khuvirila mu litambitswa nende manyakhano koosi ka muvirilamu.
5Yaka koosi kamanyinyanga ndi likhalaka lia Nyasaye ni liu vulunji; khandi nako kamanyinyanga mutushili khwinjila mu Vwami vwa Nyasaye, vuchilanga numunyakhana. 6Nyasaye neye uli watoto. Aliitsa khuvanzila vandu vachilanga numunyakhana linyakhana; 7khandi aliitsa khukhola munyi, vamunyakhananga khuvula khunyakhana, khali khutsi vakhunyakhananga. Kaliitsa khwikholekha, lwa Mwami Yesu aliitsa khuloleshitswa khurula mwikulu khuvirila mu tsimemo tsiu mulilu, halala ni tsinjelosi tsietsie tsiu vunyali. 8Aliitsa khusalilitsa vandu vatamanu vakorwa Nyasaye, khandi yavo vambakhananga khulonda Ivanjeli yu Mwami weru Yesu. 9Valiitsa khusalilitswa ni litivitswa li mihika ni mihika, nu khwikalilwa imbeli wu Mwami khandi khurula khu vunyali vwevwe vu vukhumi, 10khulitukhu lia aliitsa khukalukha, lwa vandu veve valiitsa khumukhuminya nu khuheelwa luyali khurula khu yavo voosi vali nivasuuvila muye. Khali munyi muli valala khuvo, shichila mwasuuvila, lwa khwilwatsa khu munyi.
11Nashio shivune shichilanga shia khase khosi nu khusaalila munyi. Khusaalanga ndi Nyasaye amukhole khuva vandu vatushili khumenya limenya liachila namulaanga. Khusaalanga ndi khuvirila mu vunyali vwevwe arweshitsi shia shindu shilahi shiosi, shia mwikombanga khukhola khandi muhinzilu kwosi kwa mukholanga khurulana khu lisuuvila. 12Nindio khandi khusaalanga, khu lira liu Mwami weru Yesu live ni liheelwangwa vukhumi mu munyi; khandi munyi muheelwi vukhumi khuvirila muye, khuvirila khu tsimbavasi tsia Nyasaye weru nende Mwami Yesu Kristo.
© The Bible Society of Kenya, 2013