2 SAMWELI 5
5
Daudi Yamihitswa Khuva Mwami wa Israeli nende Yuda
(1 Tsiny 11:1-9; 14:1-7)
1Nalwo lwa vandu vi tsimbia tsia Israeli tsiosi vatsia khu Daudi, wali nali mu litaala lia Heburoni, nivamuvoolela, “Lola, khutsi khuli musahi kwokwo. 2Mumatukhu kavira, khali lwa Saulu yali nakhwamihanga, wimilila Israeli mu liihe; Mwami Nyasaye nakhulaaka ndi uliitsa khwimilila vandu veve, nu khuva mwamihi wavo.” 3Lwa vimilili voosi va Israeli vitsa khu Daudi nali mu litaala lia Heburoni, Mwami Daudi yakhola lilakano navo imbeli wu Mwami Nyasaye; ma vimilili venavo nivamuvekha makura khuva Mwami wa Israeli. 4Daudi yali nali ni mihika makhomi kavaka, lwa yamihitswa khuva mwami, niyamiha khumihika makhomi kane. 5Yamenya mu litaala lia Heburoni khumihika chiu khuraanga saba ninusu, niyamiha lusomo lwa Yuda lwonyene. Yarulaho natsia Yerusalemi, wa yamiha lusomo lwa Yuda khandi lwa Israeli khumihika makhomi kavaka na chivaka.
6Mwami Daudi nende vandu veve, vasimukha nivatsia Yerusalemi, khukwana Vayeebusi, vamenyamu. Vayeebusi vavoolela Daudi, “Uvula tsingulu tsiu khwinjila munu, shichila khali vandu vavekhu nende vafwokoya vanyala khukhwilukhanyinya. Daudi shianyala khwinjila munu tawe!” 7Navutswa Daudi yavukula ni tsingulu litaala liavo li imbinga lia Sayoni, nalikulikha lira “Litaala likali lia Daudi.”
8Khulitukhu lienelo, Daudi yavoolela vasikali veve, “Mundu alikhuho hanu wa Vayeebusi vasiinya khuli vasiinya inzi? Vatushili khwiirwa? Ruli hanu mutsi khwiirila vandu venavo mulikalavati lia matsi, khandi mukwane vandu vamanani vavekhu khandi vafwokoya venavo.” (Nashio shivune shiachila nikavoolwa, “Vandu vavekhu nende vafwokoya valiitsa khuvula khwinjila mu inzu yu Mwami Nyasaye.”)
9Lwa Daudi yavukula ni tsingulu litaala li imbinga lia Sayoni, yamenyamu, nalikulikha lira “Litaala likali lia Daudi.” Yumbakha imbinga khundulu khwalio khulivotokhana, khuraanjila havundu ha malova kali nikitsulitswa khuluveka luli ivukwi wi shikulu. 10Daudi yatsililila khuva ni tsingulu tsinyishi khumatukhu koosi, shichila Mwami Nyasaye wi Mikaanda Chiliihe yali naye.
11Mwami Hiramu wa Tiro yaruma varumwa khu Daudi. Vitsa khuye ni misala chia ceda nende vafundi vi misala nende vumbashi, nivumbakha inzu yu vwami ya Daudi. 12Nalwo lwa Daudi yamanya ndi Mwami Nyasaye, umali khumwamihitsa khuva Mwami wa Israeli, khandi yali ulombi vwami vwevwe khuheelwa vukhumi shichila vandu veve Israeli.
13Lwa Daudi yali niyakharula mu litaala lia Heburoni khutsia Yerusalemi, yavukula vakhali vanyishi khandi vamenyinywa nahila vakhali vandi. Yivula khuvo vaana vanyishi vi shiyayi nende vi shikhana. 14Vaana va Daudi, yivula lwa yali namenyanga mu Yerusalemi vali Shamuha, Shobabu, Natsani, Solomoni, 15Ibuhari, Elishuha, Nefegi, Yafia, 16Elishama, Eliada, nende Elifeleti.
Daudi Yakuura Vafilisti
(1 Tsiny 14:8-17)
17Lwa Vafilisti vahulila ndi Daudi umali khuvekhwa makura khuva Mwami wa Israeli, vasikali vavo vasimukha nivatsia khumukhava. Navutswa Daudi yahulila makhuva kenako, nakholomokha khutsia khwivisa mu imbinga. 18Vafilisti vatukhaho, khandi nivasalana shia havundu hosi mu Luhoongo lwa Refahimu vamenyamu. 19Daudi yareeva Mwami Nyasaye, “Nyala khutsia khukwana Vafilisti? Unyala khumba tsingulu tsiu khuvakuura?”
Mwami Nyasaye yachipa, “Simukha utsi khuvakwana, shichila ni kilikali, niitsa khukhuha tsingulu tsiu khukuura Vafilisti.”
20Daudi yasimukha natsia mu litaala lia Baali Perazimu, nakuura Vafilisti mu litaala lienelo. Yavoola, “Mwami Nyasaye umali khukhalakanyila mu vatsiku vaanje, khuli muchelelo kwa matsi.” Havundu henaho hakulikhwa lira Baali Perazimu! 21Lwa Vafilisti vilukha, valekha misambwa chiavo inyuma; ma Daudi nende vasikali veve, nivatsia ni misambwa chienecho.
22Navutswa matukhu mati nikakhavira, Vafilisti vakalukha khandi nivasalana shia havundu hosi mu Luhoongo lwa Refahimu. 23Daudi yareeva Mwami Nyasaye, nachipa Daudi, “Uvuli khuvakwanila havundu ha uli yaho; navutswa simukha utsi khuvotokhana nu khuvakwanila khuluveka lundi yolo, himbi khu misala chia balasamu. 24Lwa muliitsa khuhulila liyooko lia vasikali, nivaroonjele nilihulilikhananga mu misala ikulu, nalwo lwa muvakwana, shichila niitsa khuva nikhwimililanga imbeli wowo, khukuura mukaanda kwa vasikali va Vafilisti.” 25Daudi yakhola ku Mwami Nyasaye yali navooli akhole, khandi nava ni tsingulu tsiu khukhunga Vafilisti, khukalukha khurula mu litaala lia Gibioni, khutsia khutukha mu litaala lia Gezeri.
© The Bible Society of Kenya, 2013