2 SAMWELI 16
16
Ziba Yaha Daudi Shiukhulia
1Lwa Daudi yali namali khwisuundakhu hikulu hatititi ha vutoonje vwi shikulu shienesho, nonoho lwa Ziba, wali murumishi wa Mefiboshetsi yamwakanila. Ziba yali nali ni tsipunda nitsiachishwi mikati tsimia tsivili, vivumba imia indala vi tsikeki tsiuminywa tsialombwa khu matunda ku musabibu, vivumba imia indala wa matunda mavisi nende liseelo nilitsule idivai. 2Mwami Daudi yareeva Ziba, “Ni shina shia utsitsanga khukholela vindu yivi viosi?”
Ziba yamuchipa, “Tsipunda ni tsia vandu vi inzu yoyo vaninakhu, nivachenda. Mikati nende matunda ni via vandu valia; idivai ni yavo, ya vang'wela mwichendanyama nivakhavwa tsingulu.”
3Mwami Daudi yamureeva, “Ni hena wa Mefiboshetsi amenyanga?”
Ziba yamuchipa, “Amenyanga mu Yerusalemi, shichila akanakananga ndi Vaisraeli vatsitsanga khumwamihitsa khu shisoko shiu vwami, khuli kuuka wewe Saulu.”
4Mwami Daudi yavoolela Ziba, “Khuheele nunundi shia shindu shiosi, shiali shia Mefiboshetsi.”
Ziba yavoolela Daudi, “Sanditsi muno! Shia khase khosi nzitsanga khukhola shia shindu shiosi, shia uliitsa khumbolela khole.”
Shimei Yalaama Daudi
5Lwa Mwami Daudi yali niyakhatukha mu litaala lia Bahurimu, mulala khu viikho va Saulu, walaangwangwa Shimei mwana wa Gera; yitsa namwakanila. Yamulaama, lwa yali niyitsanga. 6Shimei yaraanga khulesa na machina Daudi nende vandu veve, khali niiva Daudi yali yali umali khuvotokhanwa na vasikali veve nende musikali wewe wamulindanga. 7Shimei yamulaamanga, navoola, “Rula hanu! Rula hanu! Yivi mulumindi! Yivi mundu uvula vukhonyi vwosi! 8Wavukula vwami vwa Saulu! Mwami Nyasaye atsitsanga khukhusalilitsa nunundi, shichila nivi wiira vandu vanyishi vi inzu ya Saulu. Mwami Nyasaye uheele mwana wowo Abisolomu vwami. Umali khutivitswa, shichila uli mulumindi!”
9Nalwo lwa Abishai, wa mama wewe yalaangwangwa Zeruya, yavoolela Mwami Daudi, “Yivi mwami, shichila shina nulekha isiimbwa yakhutsa iyi khukhulaama? Lekha nziyo khukutuula murwi kwekwe!”
10Navutswa Mwami Daudi yavoolela Abishai nende amwavo wewe Yohabu, “Munyi vaana va Zeruya, ni shina shianyala khusangakhu na munyi? Niiva Ziba, anaamanga shichila Mwami Nyasaye umuvoolele, ‘Laama Daudi,’ khu ni viina unyala khureeva, ‘Shichila shina akholanga ndio?’ ” 11Daudi yavoolela Abishai nende varumishi veve voosi, “Mwana wanje wa inzi mwene nivula achelitsanga khuli anyala khunziira. Shichila shina muchenyelanga mundu urulanga mu vandu vuluhia lwa Benyamini uyu? Mwami Nyasaye, neye umuvoolele anaame. Muleshi ave vutswa, atsililile khulaama. 12Haundi, Mwami Nyasaye aliitsa khulola vutiinyu vwanje vwambirilamu, angasitsi nunundi ni vindu vilahi, havukono hi vilaamo via ye mwene anaamanga.” 13Daudi nende vandu veve vatsililila khuchenda khu muhaanda. Shimei yatsililila khuvalonda, nali khuluveka lundi lwi shikulu. Yalaamanga navalesa na machina nende malova, lwa yachendanga natsia. 14Lwa Daudi nende vandu veve vatukha ha Muchela kwa Yorodani #16:14 Muchela kwa Yorodani: likhuva yili livula mu Luheburania., vavwa tsingulu. Navutswa vahulushilaho, nivanyola tsingulu.
Hushai Yakana na Abisolomu
15Mumatukhu kenako, Abisolomu nende Vaisraeli voosi, va yali nali navo vinjila Yerusalemu; ma Ahitsofeli nava naye. 16Lwa Hushai, wali mulina wa Daudi yali niyasuuvila, yakana na Abisolomu, yalaanjilila, navoola, “Uhindile Mwami! Uhindile Mwami!”
17Abisolomu yareeva Ahitsofeli, “Kanyala khuva nindi umanyinyanga wayaanza mulina wowo? Shichila shina nu wambakhana khutsia nu mulina wowo Daudi?”
18Hushai yamuchipa, “Shikali kario tawe! Ndi khuluveka lu mundu wu Mwami Nyasaye, vandu yava nende Vaisraeli voosi vamali khurovola, khandi neye wanzililila khuva naye. 19Khali ndio, ni viina wandumishila, nikakhali yivi mwana wu muruchi wanje? Khuli lwa narumishila tata wowo, nindio khandi nzitsanga khukhurumishila nunundi.”
20Nalwo lwa Abisolomu yavoolela Ahitsofeli, “Khukhonyekhu ninganakani yoyo. Ni shina shia khunyala khukhola?”
21Ahitsofeli yachipa Abisolomu, “Simukha utsi khukona na vakhali vamenyinywa, va tata wowo yali niyalekha khulinda inzu yu vwami. Nalwo lwa Vaisraeli voosi valiitsa khumanya ndi tata wowo akhulolanga khuli uli mutsiku wewe, khandi valondi vovo valitinyilitswa muno.” 22Nalwo lwa vumbashila Abisolomu liheemo ikulu wi inzu yu vwami. Abisolomu yinjilamu, nakona na vakhali vamenyinywa va tata wewe.
23Mumatukhu kenako, inganakani yosi ya Ahitsofeli yakhonyanga vandu yahuchililwangwa, khuli ni likhuva liatoto lia Nyasaye. Khali Daudi nende Abisolomu, valondanga inganakani yeneyo.
© The Bible Society of Kenya, 2013