2 SAMWELI 13
13
Amunoni Yanyera Tamara
1Abisolomu mwana wa Daudi yali na mbotso wewe wakaasa likoondo, wali nashili khutsia mulukhali walaangwangwa Tamara. Mwana wi shiyayi wundi wa Daudi yalaangwangwa Amunoni yamwikomba nu mwoyo kwosi muno. 2Amunoni yanyakhana mu mwoyo, khali niyikhola mwene khuva mulwale, shichila mwana wavo wi shikhana Tamara, lwa yali nashili muchima, khandi Amunoni nakhaywa kanyala khumukhola. 3Navutswa Amunoni yali nu mulina wewe walaangwangwa Yonadabu mwana wa Shimeya, wali nali amwavo wa Daudi. Yonadabu yali wamanya khuvirila mu vupele khuli anyala khunyola shia yenyanga. 4Yonadabu yavoolela Amunoni, “Mwana wu Mwami Daudi, shichila shina wamenya nu watunya khumatukhu koosi? Shichila wambakhane khumbolela?”
Amunoni yamuvoolela, “Nayaanza nu mwoyo kwosi Tamara, mbotso wa amwavo wanje Abisolomu.”
5Yonadabu yamuvoolela, “Tsia ukone khu shitali shioshio, wikhole khuli ulwalanga. Lwa tata wowo yitsa khukhulola, uvoole, ‘Nuyaanza voolela mbotso wanje Tamara yitsi khumba shiukhulia shiandia. Nyenyanga yitsi khuteshela shiukhulia, hanu hanyala khumulolela, khali ye mwene ambe shiukhulia shienesho.’ ” 6Amunoni yikhola khuli alwalanga, natsia khukona khu shitali.
Mwami Daudi yasimukha natsia khumulola, Amunoni namuvoolela, “Nuyaanza uhuchilile Tamara yitsi khunombela tsikeki hanu, hanyala khumulolela; khali ambe tsikeki tsienetso ye mwene.”
7Daudi yarumana likhuva khu Tamara, wali nali mu inzu yu vwami, navoola, “Simukha utsi mu inzu ya Amunoni, umulombele shiukhulia shialia.” 8Tamara yasimukha natsiayo namunyola nakoni khu shitali. Yavukula shinochi, nashituuvula, nalombela tsikeki havundu hanyala khumulola. Yateekha tsikeki 9namuha alii khurula khulukalayi lwa vateshelakhu, navutswa yambakhana khulia. Amunoni yavoola, “Voolela vandu voosi varuli hanu.” Ma vandu voosi nivarulaho. 10Amunoni yavoolela Tamara, “Nderela tsikeki hanu khu shitali shianje, umbe tsilii.” Tamara yavukula tsikeki tsienetso natsia ha yali nali. 11Navutswa lwa Tamara yamuhilila tsikeki tsienetso khutsilia, yamukumila navoola, “Mwana wi shikhana weru, hamba ngone nivi.”
12Tamara yamuvoolela, “Shikali kario tawe! Nuyaanza lekha khunikakhu. Shikholwa khuli shienesho, shishili khwikholekhakhu mu Israeli. Uvuli khukholakhu shindu shitamanu yishi. 13Kanakanakhu kaliitsa khwikholekha khwinzi. Niitsa khuva mu tsisoni khumatukhu koosi! Kanakanakhu kaliitsa khwikholekha khu yivi mwene. Vaisraeli voosi valiitsa khuvoola shiuli shindu tawe, navutswa mundu muyiingwa! Reeva Mwami Daudi; akhuhuchilile umbili mbe mukhali wowo.” 14Navutswa Amunoni yambakhana khuhulila makhuva ka Tamara yavoolanga. Amunoni yali ni tsingulu khumuvira, manamukuura khandi namunyera.
15Nalwo lwa Amunoni yamwambakhana muno, khuvira khuli lwa yali ni yamwikomba lukhuraanga. Amunoni yamuvoolela, “Rula munu!”
16Tamara yamuvoolela, “Lekha khukhunga! Yuvu vuliitsa khuva vutamanu muno khuvira makhuva ka umali khukhola nunundi.” Navutswa Amunoni yambakhana khuhulila ka yavoolanga. 17Amunoni yalaanga mwene murumishi wewe namuvoolela, “Khunga mukhali uyu khurula imbeli wanje! Musiuvi ilwanyi nu khwikala muliango!”
18Murumishi mwenoyo yamukhunga maniyikala muliango.
Tamara yali niyifwali ikaanzu indaambi yili ni vifungu vinyishi, inguvu ya vakhana vachima va vami vifwalanga mumatukhu kenako. 19Tamara yarandulanyinya ikaanzu yeye ya yali niyifwali, navekha likooshe khu murwi kwekwe. Yakhunikha makhono keke mu tsimoni, naraanga khulila narulaho. 20Lwa mbotso wewe Abisolomu yamulola yamureeva, “Mbotso wowo anyala khuva ukhukholi likhuva litamanu? Mwana wi shikhana weru, nuyaanza makhuva kenako kavuli khukhunyashitsa mu mwoyo kwokwo. Ni mbotso wowo; uvuli khuvoolelakhu mundu shikholwa shia khukholi shienesho.” Khali ndio, Tamara yamenya mu inzu ya Abisolomu nu vuveleli vunyishi mu mwoyo kwekwe, nu khwiyundishila.
21Lwa Mwami Daudi yahulila makhuva kali nikakholeshe, yali nu vurima vunyishi muno. 22Abisolomu yahima Amunoni vutamanu muno, shichila yali unyeri mbotso wewe Tamara; khali kachila navula khulomolomakhu naye.
Abisolomu Yiira Amunoni
23Mihika chivili nichimali khuvira, lwa vandu vakhalaakanga vwoya vwa makondi ka Abisolomu vali nivali mu litaala lia Baala Hazori himbi khu mupaka kwa Efurahimu, Abisolomu yalaangayo vaana vi shiyayi voosi vu Mwami Daudi. 24Abisolomu yasimukha natsia khu Mwami Daudi navoola, “Varumishi vaanje vakhalaakanga vwoya khurula khu makondi. Nuyaanza hamba wiyunji na khutsi!”
25Mwami Daudi yamuvoolela, “Mwana wanje, shikaliitsa khuva kario tawe. Khutsi voosi shiukhunyala khutsia tawe; navutswa khuliitsa khuva vutswa musiko mulitoho khu yivi.” Khali niiva Abisolomu yamuvoolela nayaanza atsi navo, yambakhana khutsia; navutswa yamusalila tsikhaavi.
26Navutswa Abisolomu yamuvoolela, “Niiva ulambakhana khutsia naye, nuyaanza voolela amwavo wanje Amunoni atsi na khutsi.” Mwami Daudi yamureeva, “Shichila shina atsi nivi?” 27Navutswa Abisolomu yatsililila khuvoolela Daudi, nayaanza avoolele Amunoni atsi naye. Nalwo lwa Daudi yavoolela Amunoni nende vaana veve vandi voosi vayayi vatsi na Abisolomu. 28Amunoni yavoolela varumishi veve, “Hulishitsi! Lwa Amunoni aliitsa khuva ni yakhang'wakhu idivai, niyakhatanda ma muvoolele munyi, ‘Rumuli Amunoni,’ nalwo lwa mumwiira. Muvuli khuria. Shimuheele lilako yili? Muve ni tsingulu khandi ni ikholo!” 29Varumishi va Abisolomu viira Amunoni, khuli Abisolomu yali navavoolele. Vaana vi shiyayi vandi voosi vu Mwami Daudi vanina khu tsisushili tsiavo, nivilukha.
30Lwa vali nivali khu luchendo lwavo lu khutsia ingo, Daudi yavoolelwa, “Abisolomu wiiri vaana vovo vi shiyayi voosi -- khali mulala khuvo shiali mwoyo tawe!” 31Mwami Daudi yasinjila, narandula tsinguvu tsietsie nu vuveleli mu mwoyo, niyisiuva hasi. Varumishi veve voosi vali nivaliho naye, varandula khandi tsinguvu tsiavo. 32Navutswa Yonadabu mwana wa Shimeya, wali amwavo Mwami Daudi yavoola, “Yivi mwami, vaana vovo vi shiyayi voosi vashili khwiirwa. Amunoni neye wonyene wiirwa. Nako ka Abisolomu yakanakananga khukhola, khuraanjila khulitukhu lia Amunoni yononyinya mbotso wewe Tamara. 33Khali ndio, vaana vovo voosi vashili khukhutsa; navutswa Amunoni neye wonyene wiirwa.”
34Navutswa Abisolomu yilukha.
Mulala khu vasikali valindanga havundu henaho, yalola vandu vanyishi nivakholomokhanga hasi hi shikulu, khu muhaanda kutsitsanga mu litaala lia Horonahimu. Yasimukha natsia khu Mwami Daudi, namuvoolela ndi uloli vandu valala nivali khu muhaanda kutsitsanga mu litaala lia Horonahimu. #13:34 Horonahimu: likhuva yili livula mu Mahandiko ku Luheburania. 35Yonadabu yavoolela Mwami Daudi, “Yivi mwami, lolakhu! Vaana vovo vi shiyayi navo vitsanga yavo, khuli khuvoolele.” 36Lwa yali khali nashili khumala khuvoola makhuva kenako, vaana vi shiyayi va Daudi vinjilamu; varaanga khulila, ma Daudi nende varumishi veve nivalila khandi tsikhwili.
37Navutswa Abisolomu yilukha, natsia khulola mwana wa Amihudi walaangwangwa Talamahi, wamihanga litaala lia Geshuri. Nalwo lwa Mwami Daudi yikhula mwana wewe Amunoni shia litukhu. 38Abisolomu yilukha natsia mu litaala lia Geshuri; namenyayo khumihika chivaka. 39Mwami Daudi yikomba nu mwoyo kwosi, khuli anyala khutsia khukhava Abisolomu, shichila yali umali khuleminywa mwoyo khulondokhana khu likhutsa liu mwana wewe Amunoni.
© The Bible Society of Kenya, 2013