ตัวแทน 26
26
เปาโล แก คะดี ออ ตัก พะเจายูฮัว อากริบปา
1เจ็นนัน อากริบปา ก็ ระ เปาโล จ็อก ออ เปาโล ก็ ญ็อก ซิห ที ตัก อัห นำ ลด จ็อก เคิบ อัห คือเน 2“เอิญ ทือ มัห ซีเละ พะเจายูฮัว อากริบปา เฮย เอิญ เน มี บุน มี วาดซนา ซีเละ ตี เอิญ กุญ แก คะดี ออ ตัก มัด มัห งิ นะ เน เอิญ ครอ เลามุน เลือง ออ อน มัห ปัง ดาย เลือง ตี ครำ ยิว จบ พอง เอิญ นัน เอิญ ก็ ครอ ไล อน ตัก มัห ปัง มด ดาย 3เอิญ เลาะใจ กุญ จ็อก เคิบ มัห เพาะวา มัห เม็จจึด ทำเนียม ครำ ยิว อิห เน เลาะ อัห เทียง นอย เลือง ซีวะ ซีเว มัห ก็ เม็จจึด มด ทาเน เอิญ ก็ ครอ ระ มัห ซอดแซ็ง ปัง เอิญ วาล ดาย
4-5เอิญ เน ก็ ทือ แบบ ครำ ยิว นัน แลว ปึง ครำ ยิว นัน อัห ก็ เม็จจึด เคิบ เอิญ เลาะ ซีเละ อัห เม็จจึด เอิญ เจ็น แย็ด เจ็น เกิด อัห ไล อน มัห ก็ กุญ กัน อัห ญอม ไล ดาย เอิญ ก็ ทือ แบบ อัห เจ็น แย็ด เจ็น เกิด จำปอ โตะ อุ ตัก เมือง เยรูซาเล็ม นัน เอิญ เน ก็ แอง มอก ฟาริซี ตี ทือ เอาซาง เน็ด ทีซุด นัน เอิญ ก็ ทือ มอก อัห นัน เลือง เน อัห ก็ เม็จจึด แลว ตัวแทน 23:6, ฟีลิบปี 3:5
6ตี เอิญ กุญ ญ็อง ระ มัห ตัดซิน ออ งิ นะ เน ก็ ญอน เอิญ แก็นใจ เจือ แญง ซันญา คอง เอาซาง เอิญ แก็นใจ เจือ แญง ตี นำ ไล อน ตัก เอา เม อิห เจ็น ตัก อิง นัน 7กรอก อิซราเอล อิห มด ตึง ซิบซอง กรอก ก็ วาง ฮับไจ เอาซาง มด งิ มด แจ็ล อิห แก็นใจ เค็ย กุญ รีด เล็ห วัล บัดนะ มอก เอาซาง เพีย ไล อน เจ็น ตัก อิง นัน เอิญ ก็ เจือ มอก อัห เน อัห ก็ เจือ มอก เอิญ เน พะเจายูฮัว เฮย อัห จบ โตด เอิญ แอง พิด ก็ ญอน เอิญ เจือ แบบ เนๆ 8ก็ ซีวะ แป กึด เค็ย เอาซาง แอง ระ ครำ เปิล ลบ วัล รีด เล็ห วัล ไอ มี กุญ ซีวะ แป ไอ มี เจือ เค็ย เอาซาง แอง กุญ
9ตัก อิง เอิญ ก็ แอง มอก ครำ ยิว ตี พอง เอิญ นัน เอิญ ก็ ดุ คมเฮง ครำ ตี ทือ เยซู ครำ นาซาเร็ด นัน เอิญ เกย กึด แอง ดก มบลึ ระ เลือง เยซู นัน ไอ มี แปร เริล ตี ซอ 10เอิญ เกย คมเฮง ครำ เยซู ตัก เมือง เยรูซาเล็ม ซีเละ ปึง มอ เอาซาง แกะ ก็ ซำ วัล ระ เอิญ มี ซิด เญ็บ ครำ ตี ทือ เยซู เติล ลุก เอิญ ก็ เญ็บ อัห ดก ล็อง ญาม อัห ตัดซิน มเบิล แอ็ม ครำ ทือ เยซู นัน เอิญ ก็ จวย ตัดซิน เลิมๆ วัล 11เอิญ ก็ กวา โละ เญ็บ อัห ตาม ฮ็อง พซุม ครำ ยิว มด จู ตี เอิญ ดุ คนาบ อัห โป ดูทูก เยซู วัล แร็ง อ็อด เอิญ อัง อัห ซีเละ เอิญ ก็ ซำ กวา โละ คมเฮง อัห แพ็ว ปะเทด ซอ วัล” เปาโล อัง ตัวแทน 8:3, 22:4-5
เลือง เปาโล เม็จ เยซู ตัก รวง
ตัวแทน 9:1-19, 22:6-16
12เจ็นนัน เปาโล ก็ ไล อัห ตอ วัล คือเน “มี มี ลบ นัน เอิญ กำลัง และ เริล เญ็บ ครำ เยซู ตัก เมือง ดามากัด ไบ อนุยาด เญ็บ อัห ตี ปึง มอ เอาซาง แกะ แอง อน เอิญ นัน เอิญ ก็ เอิด เริล เลิม 13ทาเน ก็ แปลก ซีเละ พะเจายูฮัว เฮย ญาม อิห กำลัง เริล ตาม รวง นัน ก็ บัก และ เตียง เน เอิญ ก็ เม็จ พุก ทาง ซะ เจ็น วาง ทึห แร็ง ทาง ซีเละ ทาง กวา งิ วัล ทาง ซะ นัน แกวด นัง เอิญ เคิบ เปือน ตี เริล เลิม นัน 14เอิญ เคิบ เปือน ก็ มพึง ลัง แลว ก็ มี แญง จ็อก เป็น แญง ฮีบรู ไล เอิญ คือเน วัล ‘เซาโล เซาโล มัห คมเฮง เอิญ อังวะ มัห คมเฮง เอิญ นัน ก็ มอก มัห แอง ระ นัง ออ โซะ ฮัก ดาย มัห แอง มอก งัว เตะ ซิห ลำ นแจ็ว ก็ โซะ เย็ห ฮัก’ แญง นัน อัง
15เอิญ ก็ ซ็วน คือเน ‘เอิก ซัง อีเอ นะ บ็อห งกีจ็อง เฮย’ เอิญ อัง งกีจ็อง ก็ ไล เอิญ คือเน ‘เอิญ เป็น เยซู ตัก มัห คมเฮง อุ นัน 16มัห เจ็ย ร็อห ญ็อง นทึห เตาะ เอิญ มแบละ นัง ออ ตัก มัห เน ก็ เอิญ ระ มัห ฮับไจ ออ บัดนะ ซะ ตี มัห เม็จ เคิบ มัด ออ งิ นะ เน มัห ก็ ต็อง นท็อล ไล อน ตัก อัหซอ ตอ วัล บัดนะ เอิญ ก็ ไล มัห ดก มบลึ วัล มัห ก็ ต็อง เริล ไล อน ตัก อัหซอ ตอ วัล 17เจ็นเน เอิญ ก็ ไล มัห เริล ไล ครำ กรอก ซอ ดาย กัน กรอก ซอ นัน แอง ไอ มี เลาะ ซิห มัห เอิญ ก็ จวย ระ มัห ปน แอ็ม เจ็น อัห ดาย กัน ครำ ยิว แอง ไอ มี เลาะ ซิห มัห เอิญ ก็ จวย มัห ระ ปน แอ็ม เมือนนอย 18มัห ต็อง เริล ไล อัห ระ อัห เม็จจึด เคิบ เอิญ มัห จวย ระ อัห เคาใจ เลือง นังเลาะ ระ อัห ปน แอ็ม เจ็น อำนาด ม็อญ ซะ นัน กุญ ระ อัห วัล โตะ และ ตี ทาง ซะ วัล ระ อัห ปน แอ็ม เจ็น อำนาด ปรอง ซาตาน ระ อัห กุญ โตะ และ เอิญ วัล เอิญ ก็ แก แอ็ม ลุห คอง อัห ระ อัห เป็น ครำ คอง เอิญ ญอน อัห เจือ เอิญ ฮัก’ งกีจ็อง ไล เอิญ คือนะ” เปาโล อัง
19ทาเน เปาโล ก็ ไล พะเจายูฮัว คือเน วัล “ก็ มอก นะ ดาย พะเจายูฮัว เฮย เอิญ เม็จ แญง นัน ไล เอิญ ฮุนนัน แลว เอิญ ก็ ลด ปัง แญง นัน 20เอิญ ก็ ลด นท็อล ไล อน ตัก อัห วัล เอิญ ไล ตัก เมือง ดามากัด วาล เจ็นนัน เอิญ ก็ เริล ไล ครำ เมือง เยรูซาเล็ม เอิญ ไล อัห ทัว จังวัด ยูเดีย มด พด โตะ ปะเทด ซอ วัล เอิญ ไล อน ตัก อัห ระ อัห เอิด ใจ แมะ ระ อัห โตะ และ เอาซาง ระ อัห แอง เลาะๆ ระ อัหซอ เม็จจึด เค็ย อัห เป็น ครำ ตี เอิด ใจ แมะ เป็น ครำ ตี เจือ เอาซาง เอิญ ไอ มี ไล ซีวะ พิด เตาะ ตัวแทน 9:20, 9:28-29
21ตี ครำ ยิว เญ็บ เอิญ ตัก วิฮาน นัน ก็ ญอน เลือง เน อัห และ มเบิล แอ็ม เอิญ ก็ ญอน เลือง เนๆ 22แต เอาซาง ก็ จวย เอิญ เตา มานะ เน เอิญ ก็ ลด เป็น พญาน ไล อน ตัก แป จู ล็อง จู นัง เน ตัก อิง โมเซด เคิบ ปึง ลาม เอาซาง อัห ก็ เพีย ไล อน เค็ย มี ซีวะ เกิด เล็ห บัดนะ เอิญ ก็ ไล มอก แญง โมเซด เคิบ ลาม นัน เพีย ไล อน วาล นัน เอิญ ไอ มี จ็อก เกิน แญง อัห ซัง 23ปึง ลาม ตัก อิง อัห เค็ย เมซียา นัน ต็อง เปิล อัห ก็ เค็ย นำ เป็น ล็อง แรก ตี เปิล ลบ วัล รีด เล็ห วัล นำ ก็ ลด นโจง รวง อน ตัก ครำ แอ เน ตึง ครำ ยิว ตึง ครำ กรอก ซอ” เปาโล อัง#อิซยา 42:6, 49:6, 1 โคริน 15:20
เปาโล ซีรอก ระ อากริบปา เจือ
24ญาม เปาโล ควะ จ็อก อุ นัน เฟทัด ก็ โป นำ คือเน “เปาโล พีบา มัห แลว เน เต็ห แร็ง ดก มัห นเจ็น นังซือ เกิน ลด บา อี อัง มัห” นำ อัง 25แต เปาโล ก็ ซวัล นำ คือเน “ฮีเอิห เฟทัด เฮย เอิญ ไอ มี พีบา ดาย ซีเละ นะ เลือง ตี เอิญ ไล เน กิว เป็น เลือง นังเลาะ ดาย เป็น เลือง ตี ครำ แอ เน ไอ มี เม็จ เตาะ 26พะเจายูฮัว นำ ก็ เม็จจึด เลือง เยซู เลาะ แลว เอิญ ก็ เค็ย นำ เม็จจึด มด แลว เลือง เยซู เน อีเอๆ ก็ เม็จ มด เพาะวา เลือง เน เกิด เล็ห ตัก ใน เมือง ดุห นำ เคาใจ เลือง เน เลาะ แลว เอิญ ก็ ลด ฮาน ไล อน ตัก นำ” เปาโล อัง เค็ย เฟทัด
27เปาโล ก็ ไล อากริบปา คือเน “พะเจายูฮัว เฮย แญง เอาซาง ตี ปึง ลาม เคียน ระ อน ตัก นังซือ นัน มัห ก็ เจือ แลว ก้า เอิญ เค็ย มัห เจือ ซีเละ ดาย” เปาโล อัง
28พะเจายูฮัว ก็ ซวัล เปาโล คือเน “ปาโท็ห มัห เลามุน อน เอิญ ปัง ตีดต็อง เน มัห ก็ เยา เอิญ เปียน เป็น คริซเตียน แลว ก้า ฮอน จบ เลาะ แอ เจือ เวิดๆ ฮุนเน” นำ อัง 29เปาโล ก็ เค็ย “จ็อก ดก จ็อก แย็ด ก็ ตึก เอิญ ก็ ครอ เคิบ เอาซาง จวย ระ แป เจือ มอก เอิญ เน มด จู ล็อง จู นัง ตี กุญ ปัง แญง เอิญ งิ นะ เน ดาย แต ไอ แมน เป็น นักโทด มอก เอิญ เน” เปาโล ไล พะเจายูฮัว จังนะ
อัห ไอ มี เม็จ เปาโล แอง พิด
30เจ็นนัน พะเจายูฮัว เคิบ ยัห ก็ ร็อห พูวา เคิบ ปึง อัห ตี คุด อุ เลิม นัน อัห ก็ เลอะ ร็อห วัล แอ็ม มด 31ปน อัห ทอก เจ็น ฮ็อง แลว อัห ก็ จ็อก เคิบ นอย เค็ย “เออ ล็อง เน นำ ไอ มี แอง พิด ซีวะ นอ ไอ มี จบ เลาะ มเบิล นำ ไอ มี ซมควน เติล นำ เตาะ” อัห อัง
32พะเจายูฮัว อากริบปา ก็ ไล เฟทัด คือเน “บา นอ กัน ไอ มี ซีโลด นำ ครอ ระ พะเจายูฮัว ซีซา ตัดซิน ออ แอ พระ แอ็ม นำ ก็ กุญ นอ” อากริบปา อัง
Obecnie wybrane:
ตัวแทน 26: Prai
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Global Partners
