ตัวแทน 25
25
อัห โตะ พอง เปาโล ตัก เฟทัด
1ทาเน ญาม เฟทัด โตะ เป็น พูวา ตัก เมือง ซีซารียา นัน แพะ งิ แลว เจ็นนัน นำ ก็ เริล แอว เมือง เยรูซาเล็ม งคม 2นำ โตะ ตัก เมือง เยรูซาเล็ม แลว ก็ โตะ ปึง มอ เอาซาง แกะ เคิบ ปึง ซะ แกะ ครำ ยิว อัห โตะ พอง เปาโล ตัก พูวา เฟทัด นัน อัห วาง ครอ นำ จวย ออ 3อัห ครอ ระ นำ จวย ซับ เปาโล ตัก เมือง เยรูซาเล็ม นัน อัห ซุย เกิ๊ด มเบิล แอ็ม เปาโล ตัก รวง
4-5เฟทัด ก็ ซวัล อัห คือเน “เปาโล นะ นำ อุ ตัก ลุก เมือง ซีซารียา แลว แป เริล พอง นำ ตัก นัน ก็ กุญ ไอ มี ปอ อิง เอิญ ก็ วัล ตัก เมือง ซีซารียา ดาย แป ระ ปึง พูนำ คอง ออ เริล เลิม เคิบ เอิญ ก็ กุญ กัน เปาโล แอง พิด ซีวะ แป ก็ ระ อัห เริล พอง นำ ตัก นัน ก็ กุญ” เฟทัด อัง เค็ย อัห
6ญาม นัน เฟทัด อุ ตัก เมือง เยรูซาเล็ม นัน แปด เกา งิ เน นำ ก็ วัล ออ ตัก เมือง ซีซารียา เซอะ ปึง พูนำ เคิบ ปึง ซะ แกะ ครำ ยิว ตัก เมือง เยรูซาเล็ม ก็ เริล เลิม เคิบ นำ ปัห ซะ คือ งิ กรัก นำ ก็ เริล ซาน นำ ก็ คุด ตัก ตี คุด ตัดซิน นัน นำ ก็ ไล อัห ซับ เปาโล ตัก ออ 7โตะ เปาโล แลว ครำ ยิว ตี โตะ เจ็น เมือง เยรูซาเล็ม นัน อัห ก็ เลอะ โตะ ญ็อง แกวด นัง เปาโล อัห ก็ พอง นำ อัห จบ โตด นำ แอง ไอ มี เลาะ ดก มบลึ ตี นำ ไอ มี กิว แอง ไอ มี กิว อัห เม็จ นำ แอง พิด ซีวะ เตาะ
8แลว อัห จ็อก ออ แลว เปาโล ก็ จ็อก ออ คือเน “เอิญ ไอ มี จบ แอง พิด ซีวะ ดาย กดมาย ครำ ยิว เอิญ ก็ ไอ มี แอง พิด ระเบียบ วิฮาน เอาซาง เอิญ ก็ ไอ มี แอง พิด กดมาย พะเจายูฮัว ซีซา เอิญ ก็ ไอ มี จบ แอง พิด เอิญ ไอ มี กุญ แอง พิด ซีวะ เตาะ” เปาโล อัง
9แต เฟทัด นำ ซีรอก กุญ ใจ ครำ ยิว นำ ก็ ลด ซ็วน เปาโล เค็ย “มัห ซีรอก เริล ตัก เมือง เยรูซาเล็ม อัน ระ เอิญ ตัดซิน เลือง เน ตัก นัน อัน” เฟทัด อัง 10แต เปาโล ก็ ซวัล นำ เค็ย “ไอ เตาะ มานะ เน เอิญ ญ็อง อุ ตัก ซาน พะเจายูฮัว ซีซา เน แลว มัห ตัดซิน เอิญ ตัก ซาน เน ก็ เลาะ มัห ก็ เม็จจึด แลว เอิญ ไอ มี จบ กุญ แอง พิด ซีวะ ซิห ครำ ยิว 11กัน เอิญ กุญ แอง พิด ซีวะ ตี ซมควน เปิล เอิญ ก็ ญอม เปิล ดาย ไอ งกิ เอิญ แก คะดี ออ เตาะ แต กัน อัห จบ โตด เอิญ จบ เค็ย เอิญ แอง พิด จังเน จังนัน ตี ไอ มี กิว เป็น เลือง นังเลาะ นัน ไอ มี ซีเอ มี ซิด มอบ เอิญ อน ตัก อัห ดาย ทาเน ครอ ซับ เอิญ ตัก เมือง โรม ก็ เลาะ ระ พะเจายูฮัว ซีซา ตัดซิน เอิญ ฮัก ก็ กุญ” เปาโล อัง
12แลว เฟทัด ปัง แญง เปาโล แลว นำ ก็ เลามุน เคิบ พูจวย ออ แลว อัห เลามุน เคิบ นอย แลว นำ ก็ ลด ไล เปาโล คือเน “มัห ครอ ระ พะเจายูฮัว ซีซา ตัดซิน ออ แลว นอ กัน จังนะ มัห ก็ ต็อง เริล และ พะเจายูฮัว ซีซา ตัดซิน ออ ตัก เมือง โรม ฮัก ดาย” เฟทัด อัง
อัห ซับ เปาโล ตัก มัด อากริบปา
13ดก งิ เจ็นนัน วัล ก็ โตะ พะเจายูฮัว มี ล็อง วัล ซือ นำ ตัก อากริบปา ยัห นำ ซือ ตัก เบอนิด ปาม ก็ โตะ แอว ดอม พูวา เฟทัด ตัก เมือง ซีซารียา นัน 14ปาม ลด พัก อุ ตัก เมือง ซีซารียา นัน ดก งิ เฟทัด ก็ ลด มี รวง เลามุน เลือง ครำ ยิว โตะ พอง เปาโล อน ตัก พะเจายูฮัว นัน ปัง เฟทัด ไล นำ คือเน “มี อัหคล็อง มี ล็อง ตี พูวา เฟลิก เติล ระ อน เจ็น วาง เซ็น นัน 15มี ลบ นัน เอิญ เริล ตัก เมือง เยรูซาเล็ม งคม ปึง มอ เอาซาง แกะ เคิบ ปึง ซะ แกะ ครำ ยิว อัห รูบ โตะ พอง นำ ตัก เอิญ อัห จบ ไล เอิญ ตัดซิน ลงโทด นำ 16เอิญ ก็ ไล อัห เค็ย ‘ไอ มี เลาะ ดาย ครำ โรม ไอ มี จบ แอง คือนัน ซัง อิห ไอ มี จบ งเคาะ ซง นักโทด อน ตัก ซีเอ อิห ระ นักโทด มี โอกาด แก คะดี ออ เลาะๆ เคิบ มัด อัห วาล ซัง อิห กอย มอบ อน นักโทด ตัก อัห’ เอิญ อัง
17ญาม นัน เอิญ อุ ตัก นัน แปด เกา งิ เน เอิญ ก็ วัล ออ ปึง ตี ซีรอก พอง นำ อัห ก็ โตะ ตัก เน เลิม โตะ เอิญ ตัก เจิง แลว เอิญ ก็ ไอ มี เพา ซีวะ เตาะ ปัห ซะ เอิญ ก็ ลด เริล ตัก ซาน เอิญ ก็ ไล อัห ซับ ล็อง นัน ตัก ออ 18ปึง พูนำ ครำ ยิว ก็ รูบ โตะ พอง นำ ตัก เอิญ แต เลือง ตี อัห พอง นำ นัน ก็ แปลก มี ติด ดาย เก็ย จบ แมน เลือง ตี เอิญ กะ นัน เตาะ 19แต อัห พอง นำ เลือง ฮีด อัห ฮัก เคิบ เลือง ซีเอ นะ ฮุ มี ล็อง วัล ซือ ตัก เยซู นำ เปิล แลว แต เปาโล ก็ เค็ย นำ ควะ รีด อุ วัล 20เอิญ ก็ ญ็อก งึด ไอ มี เม็จจึด ซอบซวน จังนัก วัล เอิญ ก็ ลด ซ็วน เปาโล ‘มัห ซีรอก เริล ตัดซิน เลือง เน ตัก เมือง เยรูซาเล็ม นทึห อัน’ เอิญ ซ็วน นำ จังเน 21แต เปาโล ครอ ระ พะเจายูฮัว ตัดซิน ออ ตัก เมือง โรม ฮัก มานะ เน เอิญ ก็ เติล ระ นำ ตัก ลุก เน วาล ซัง กอย ซง นำ อน ตัก พะเจายูฮัว ซีซา เมือง โรม” เฟทัด ไล อากริบปา คือนะ
22อากริบปา ก็ ไล เฟทัด คือเน “เอิญ ซีรอก ปัง ล็อง นัน จ็อก ออ ฮัก ดาย” อากริบปา อัง “เออะ ดิห งิ กรัก มัห ก็ กุญ ปัง นำ จ็อก ดาย” เฟทัด อัง
23ปัห ซะ งกร็อห พะเจายูฮัว อากริบปา เคิบ ยัห ก็ โตะ ตัก ซาน ตัดซิน นัน ปาม โตะ ยาง ครึ ซีเละ มี ปึง เจานาย เคิบ ปึง ทฮาน แกะๆ โตะ เลิม นายพัน เคิบ ครำ ซำคันๆ ใน เมือง นัน ก็ เลอะ โตะ มด แลว อัห กุด ควังใน ซาน แลว เฟทัด ก็ ไล อัห ซับ เปาโล ตัก นัน 24โตะ เปาโล แลว เฟทัด ก็ จ็อก เคิบ อัห คือเน “ซะวัดดี แป จู ล็อง ดาย พะเจายูฮัว อากริบปา เคิบ ปึง แป จู ล็อง ก็ อุ ตัก เน เลิม มด แลว นอ แป จู ล็อง ก็ เม็จ ล็อง เน แลว นอ เป็น ล็อง เนๆ ตี ครำ ยิว ทัว มด อัห ไล เอิญ มเบิล แอ็ม นำ ครำ ยิว พอง นำ ตัก เมือง เยรูซาเล็ม แลว ก็ ไอ มี ปอ อัห ก็ ลบ วัล เริล เคิบ เอิญ โตะ พอง นำ ตัก เมือง ซีซารียา เน วัล อัห วาง ไล เอิญ มเบิล แอ็ม นำ ติก 25แต เอิญ ซอบซวน นำ แลว ก็ ไอ มี เม็จ นำ แอง พิด ซีวะ ตี ซมควน เปิล แต นำ ครอ ระ พะเจายูฮัว ซีซา ตัดซิน ออ แลว เอิญ ก็ อง ซง นำ ตัก เมือง โรม 26แต เอิญ ไอ มี เม็จ นำ แอง พิด ซีวะ เอิญ ก็ ลด ไอ มี จางรู เคียน ไล เลือง นำ จังนัก อน ตัก พะเจายูฮัว ซีซา มานะ เน เอิญ ก็ ลด ซับ นำ ตัก มัด แป เน ดาย อากริบปา เฮย มัห ก็ เป็น ครำ ซำคัน ทีซุด แลว นอ กัน แลว แป ซอบซวน นำ แลว เอิญ ก็ ครอ ระ แป จวย กึด เคียน ไล เลือง นำ จังนัก อน ตัก พะเจายูฮัว ซีซา นัน 27กัน เอิญ จบ บำ ซง นักโทด อน ตัก ซีซา แต ไอ มี เลือง ซีวะ เอิญ พอง นำ ก็ ไอ มี จบ เลาะ ดาย” เฟทัด อัง
Obecnie wybrane:
ตัวแทน 25: Prai
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Global Partners
