ตัวแทน 16
16
เปาโล เอิด ทิโมที เริล เคิบ ออ
1เจ็นนัน เปาโล ก็ โตะ ตัก เมือง เดอบี นำ เริล เจ็น เมือง เดอบี โตะ ตัก เมือง ลิดตา ตัก เมือง ลิดตา นัน มี อัหคล็อง มี ล็อง ตี เจือ เยซู ซือ นำ ตัก ทิโมที เม นำ เป็น ครำ ยิว ตี เจือ เยซู แลว แต เอา นำ เป็น ครำ กรีก 2ปึง ควน นไจ ตัก เมือง ลิดตา เคิบ เมือง อีโคนียูม ก็ เค็ย ทิโมที เน เป็น ครำ เลาะ 3เปาโล ก็ ซีรอก เอิด ทิโมที เน เริล เลิม เคิบ ออ แต เปาโล ไอ มี ซีรอก ระ มี ปันฮา เคิบ ครำ ยิว เพาะวา มี ครำ ยิว ดก อุ พานัน อัห ก็ เม็จจึด เอา ทิโมที เป็น ครำ กรีก ไอ แมน ครำ ยิว เปาโล ก็ ลด ระ ทิโมที แอง พิที ซุนัด วาล เจ็นนัน ทิโมที ก็ เริล เลิม เคิบ เปาโล เคิบ ซีลาด 4ญาม แป เปาโล เริล แอว ตัก เมือง นเดย อัห ก็ ไล ปึง ครำ ตี เจือ เยซู จู ตี เค็ย ปึง ตัวแทน เยซู เคิบ ปึง อัหแกะ ตี ซับรวง คริซจัก เมือง เยรูซาเล็ม เคียน ไล อัห จังนัก เปาโล เคิบ ซีลาด ก็ ไล อัห แอง มอก จดมาย นัน ไล ฮัก 5ทาเน ปึง คริซจัก มด จู ตี อัห ก็ เฮง แก็นใจ เจือ เยซู เลาะ ซีเละ ครำ เจือ ก็ เฮง เคริบ ดก เล็ห จูงิๆ
เอาซาง ไล เปาโล เริล มาซีโดเนีย
6ทาเน เปาโล เคิบ เปือน ก็ บัก และ เริล ไล แญง เอาซาง ตัก จังวัด เอเซีย แต ซีมาล เอาซาง ไอ มี ระ อัห เริล ไล แญง ออ ตัก จังวัด นัน เตาะ อัห ก็ ลด มเพ็จ คาม จังวัด ฟรีเจีย เคิบ จังวัด กาลาเทีย 7เจ็นนัน อัห ก็ เริล โตะ นดิ จังวัด มิเซีย อัห บัก และ เริล จังวัด บีทีเนีย แต ซีมาล เยซู ไอ มี ระ อัห เริล ตัก นัน วัล 8อัห ก็ ลด พาน จังวัด มิเซีย โตะ ตัก เมือง โตอัด
9ทาเน ตัก แจ็ล นัน เปาโล ก็ มเพาะ เม็จ อัหคล็อง มี ล็อง เป็น ครำ มาซีโดเนีย นำ ญ็อง ครอ ระ เปาโล โตะ จวย ออ “ครอ โตะ จวย อิห ตัก มาซีโดเนีย แต็ห เน วาล กา” เอา นัน อัง 10แลว เปาโล มเพาะ เม็จ ฮุนนัน แลว นำ ก็ ไล อน ตัก อิห#ค 10 ลูกา เริล เลิม เคิบ แป เปาโล นำ เป็น ครำ เคียน นังซือ ลูกา เคิบ นังซือ ตัวแทน เยซู เน อิห ก็ ลด เคาใจ เค็ย เป็น เอาซาง ไล อิห เริล ไล คาว เลาะ คาว แลม นัน อน ตัก ครำ มาซีโดเนีย อิห ก็ ลด ตัดซินใจ เริล ตัก นัน
ลีเดีย เคิบ ครอบครัว เจือ เยซู
11ทาเน อิห ก็ เริล เจ็น เมือง โตอัด นัน อิห ลด ต็อก เฮือ เริล ตัก เกาะ ซาโมทัด คือ งิ กรัก อิห ก็ โตะ ตัก เมือง เนอาบุรี 12เจ็นนัน อิห ก็ เริล เมือง ฟีลิบปี นเซอะ เมือง ฟีลิบปี นัน เป็น เมือง จ็อง เมือง ซำคัน ตัก จังวัด มาซีโดเนีย นัน รัดทะบาน โรม ปกคอง อัห ฮัก อิห ก็ พัก อุ ตัก ฟีลิบปี นัน ดก งิ
13ทาเน เล็ห ตัก วัน เซา อิห ก็ ทอก เจ็น ปะตู เมือง เริล ตัก เปล นอก อิห กึด เค็ย มี ตี อัห ครอ วอน เอาซาง อุ เคิง นัน อิห ก็ เริล เล็ห เคิง นัน อิห ก็ คุด จ็อก เคิบ ปึง อัหเม ตี พซุม นอย อุ ตัก นัน
14ทาเน ตัก ปึง อัหเม นัน ก็ มี อัหเม มี ล็อง ซือ นำ ตัก ลีเดีย นำ โตะ เจ็น เมือง ทิยาทิรา นำ เป็น แม กา เท็จ พา ซี มวง#ค 14 พา ซี มวง นัน เป็น พา เลาะๆ ตี ครำ ฮัง มัก จึห นัน ครำ ตี เท็จ พา ซี มวง ไล ดก ก็ ฮัง เมือนนอย นำ เป็น ครำ ทือ เอาซาง อุ แลว นำ ก็ คุด ปัง แญง อิห อุ นัน งกีจ็อง ก็ จวย ระ นำ ซนใจ แญง ตี เปาโล ไล นัน 15นำ เคิบ ครอบครัว ออ เลอะ เจือ เยซู มด อัห ก็ ลด จุบ ตัก นอก เจ็นนัน นำ ก็ มพอล อิห โตะ เจิง ออ “กัน แป เค็ย เอิญ เป็น ครำ ทือ งกีจ็อง นังเลาะ ก็ ครอ เคิบ แป โตะ พัก อุ เจิง เอิญ วาล ดาย” นำ อัง อิห ก็ ปัง แญง นำ ลด เริล เลิม เคิบ นำ
อัห เติล เปาโล เคิบ ซีลาด ตัก ลุก ฟีลิบปี
16ทาเน ก็ มี มี งิ นัน อิห บัก และ เริล เคิง ตี อัห ครอ วอน เอาซาง นัน วัล ญาม อิห กำลัง และ เริล อิห ก็ ปัก เม็จ อัหเม มี ล็อง ปรอง กุด นำ ปรอง ก็ แอง ระ นำ จางรู ดอม ลืก ดอม ดวง อัห ปึง เอาเลียง คอง อัหเม ล็อง นัน ก็ กุญ เงิน ดก ญอน นำ 17อัหเม ล็อง นัน ก็ เคริบ อิห เริล นำ งกรอ แร็งๆ คือเน “ครำ ปึง เน อัห เป็น ลูกนอง คอง เอาซาง ตัก แกะ ทีซุด นัน ดาย อัห โตะ ไล เลือง เลาะ ตัก แอ ระ แอ ปน แอ็ม เจ็น ลุห เจ็น บาบ นัน ดาย” ควัน มอน นัน อัง 18ดก งิ นำ แอง จังนัน อุ เปาโล ก็ อด ไอ มี กุญ เตาะ เปาโล ก็ มบิด มัด ไล ปรอง ตี กุด อัหเม นัน คือเน “เอิญ เอิด แร็ง เอิด อำนาด คอง เยซู คริด ไล มัห ปัด แอ็ม เจ็น อัหเม ล็อง เน” เปาโล อัง ปรอง ก็ ลด ทอก แอ็ม ปัด เจ็น อัหเม ล็อง นัน ลด
19ทาเน ปึง เอาเลียง คอง อัหเม ล็อง นัน อัห เม็จจึด เค็ย ไอ มี กุญ เงิน ญอน นำ วัล อัห ก็ ไอ มี ปอใจ อัง ปา เปาโล เคิบ ซีลาด เตาะ อัห ก็ ลด เญ็บ ปาม ลาก ซับ ตัก ปึง เจานาย โรม ตัก เมือง ฟีลิบปี นัน 20ญาม อัห ซับ ปาม โตะ ตัก ปึง เจานาย นัน แลว อัห ก็ เค็ย ปาม ฮุนเน “ปา เปียะ ล็อง เน เป็น ครำ ยิว ปาม แอง ระ มี ปันฮา ดก ตัก เมือง แอ เน ดาย 21ปาม จบ ไล แอ แอง ฮีด จังนัน จังเน ตี ไอ มี แคระ วัล อัห จบ ไล แอ แอง ซะ ตี ลุห อัง กดมาย ครำ โรม แอ เน ฮอน จบ เลาะ แอ แอง ฮุน ปาม ไล อน เน เตาะ” อัห อัง
22ทาเน ปึง พซาซน ก็ รูบ โตะ คัล ปา เปาโล เคิบ ซีลาด วัล ปึง เจานาย นัน ก็ ไล อัห ซัก เด็ง แอ็ม โกบ ปาม ไล อัห เอิด ลำ มบัด ปาม วัล 23อัห มบัด ปาม ดก ลบ แลว อัห ก็ ซับ ปาม เติล ระ ตัก ลุก อัห ก็ ไล ครำ คุม ลุก เพา ปาม อุ เลาะๆ 24ครำ คุม ลุก ก็ ปัง แญง อัห นัน นำ ก็ เอิด ปาม เติล ระ ควังใน ลุก แลว ก็ เอิด เจ็ง ปาม ซุก ซิห ตัก มพุง ลำ อัห ก็ เอิด กุนแจ ล็อก ระ อน แก็นๆ วัล
เอาซาง จวย เปาโล เคิบ ซีลาด ทอก เจ็น ลุก
25ทาเน ญาม เปาโล เคิบ ซีลาด อุ ตัก ลุก นัน ปะมาน ฮก ทุม ปาม ก็ ครอ วอน เอาซาง อุ ปาม ก็ ลอง เพลง ลือ เอาซาง อุ นัน อัหซอ ตัก อุ ลุก เลิม เคิบ ปาม นัน อัห ก็ ปัง ปาม อุ 26ซิก ก็ นโจ็ห แร็ง ซีเละ ลุก ก็ นดิ มด ตึง ลัง ปะตู ลุก ก็ เลอะ พลาง ออ ฮัก มด จู ตี จู อัน กุนแจ ก็ ฮัก มพุด แอ็ม มด 27ครำ คุม ลุก ก็ คุล ร็อห ลัก นำ ก็ เม็จ ปะตู ลุก เลอะ พลาง ออ มด นำ ก็ ญ็อก ซีดุง แซ็ง มด นำ เยา ปึง นักโทด เลอะ ปัด แอ็ม มด แลว นำ ก็ โรจ เอิด ดาบ บัก และ มเบิล แอ็ม นัง ออ 28แต เปาโล เม็จ นำ บัก และ มเบิล นัง ออ เปาโล ก็ นซาก งกรอ ไล นำ แร็งๆ คือเน “อำ จบ มเบิล นัง ออ ดาย อิห ควะ อุ เน มด ดาย อิห ไอ มี จบ ปัด เตาะ” เปาโล อัง 29ครำ คุม ลุก ก็ ญ็อก ซีนเจิล นัง มด นำ ก็ ไล ลูกนอง โทจ นาล ซับ ตัก ออ นโจง รวง อัห ซับ นาล แลว นำ ก็ เล็ง โตะ กราบ ไว เจ็ง เปาโล เคิบ ซีลาด 30นำ ก็ ซับรวง ปาม ทอก แอ็ม เจ็น ลุก นำ ลด ซ็วน ปาม คือเน “ครอ เคิบ ปา เตาะ เอิญ ต็อง แอง จังนัก บ็อห ซัง เอิญ ปน แอ็ม เจ็น ลุห เจ็น บาบ เน” นำ อัง 31ปาม ก็ ไล นำ คือเน “มัห ต็อง เจือ เยซู งกีจ็อง นัน ฮัก ซัง มัห ปน แอ็ม เจ็น ลุห กุญ ดาย ครำ ตัก ครอบครัว มัห อัห ก็ ปน กุญ เมือนนอย” ปาม อัง 32ปาม ก็ ไล อน เลือง งกีจ็อง ตัก อัห ปัง มด ตึง ครอบครัว นำ นัน 33เคิง เดิก แจ็ล นัน ครำ คุม ลุก ก็ ลด ลาง แพ อน ปาม ตี อัห มบัด อัห คัล ปาม เคิน นัน เจ็นนัน อัห มด ตึง ครอบครัว ก็ ลด แอง พิที จุบ ตัก นอก อัห เลอะ จุบ มด ตึง ครอบครัว นัน 34ครำ คุม ลุก นัน ก็ มพอล ปาม กุด ควังใน เจิง ออ นำ ก็ พระ จะ พระ ซะ ป็อง อน ปาม ป็อง อัห มด ตึง เจิง นัน ก็ เลาะใจ ซีเละ ตี อัห เจือ เอาซาง นัน
อัห พระ เปาโล เคิบ ซีลาด
35คือ งิ กรัก งกร็อห วัล เจานาย ก็ ฟาก แญง เคิบ ตำรวด ไล ครำ คุม ลุก พระ ปาม ทอก เจ็น ลุก 36ปึง ตำรวด ก็ ไล ครำ คุม ลุก ครำ คุม ลุก ก็ ไล เปาโล คือเน “เจานาย ฟาก แญง ไล ปา ทอก เจ็น ลุก กุญ แลว ดาย ครอ ระ ปา ทอก เริล ออ เลาะๆ ดาย” ครำ คุม ลุก อัง
37แต เปาโล ไล ปึง ตำรวด คือเน “ไอ มี เลาะ ดาย เยอะ เน เป็น ครำ ซันซาด โรม#ค 37 ปะเทด โรม กัน เอา นเดย มี ซิด เป็น ซันซาด โรม อัห มี ซิด ดก กวา ครำ อิซราเอล ดุห เจานาย แป ไอ มี เม็จ เยอะ แอง พิด ซีวะ แต อัห จบ มบัด เยอะ ตัก มัด ครำ ดก อัห จบ เติล ระ เยอะ ตัก ลุก เน มานะ เน อัห ลบ วัล ลอด พระ แอ็ม เยอะ ก็ ฮอน จบ เลาะ แอง จังเน ดาย แป ต็อง ไล เจานาย ออ โตะ พระ เยอะ ฮัก ซัง เลาะ” เปาโล อัง 38ปึง ตำรวด นัน ก็ โตะ ไล เลือง เปาโล อน ตัก ปึง เจานาย วัล ปึง เจานาย เม็จจึด เค็ย เปาโล เคิบ ซีลาด เป็น ครำ ซันซาด โรม อัห ก็ ซีดุง แซ็ง มด#ค 38 เจานาย นเจิก เพาะวา ตี อัห เญ็บ ครำ ซันซาด โรม ก็ พิด กดมาย อัห นเจิก นัง ออ พิด กดมาย อัห ก็ ลด แอง เลาะ ซิห ปาม นเซอะ ปาม ไอ มี เอิด เลือง อัห 39อัห ก็ โตะ ครอ ซีมา ปาม อัห ลด ระ ปาม ทอก เจ็น ลุก อัห ก็ ครอ ระ ปาม ทอก เจ็น เมือง นัน เลาะๆ 40ปาม ก็ ทอก เจ็น ลุก ลด โตะ แอว เจิง ลีเดีย วาล ปาม ก็ พซุม เคิบ ควน นไจ ตัก นัน ระ อัห มี กำลัง ใจ เล็ห วัล แลว ปาม จ็อก เคิบ อัห แลว ปาม ก็ เริล ตี ซอ วัล
Obecnie wybrane:
ตัวแทน 16: Prai
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Global Partners
