Gyenesis NHƐNMU
NHƐNMU
Dzin Gyenesis a wɔdze ama nwoma yi kyerɛ abɔdze Ahyɛse. Nwoma no ka mbrɛ wosii bɔɔ wiadze na adasamba, na mbrɛ ɔyɛe a bɔn na amandzehu baa wiadze. Ɔka kwan a Nyankopɔn dze nyimpa fa do so ho asɛm. Wotum kyɛ Ahyɛse nwoma no mu ebien ma ɔyɛ yie.
1. Tsir 1-11 ka mbrɛ wosii bɔɔ wiadze na adasamba ho tsetsesɛm. Ha na wɔka Adam, Eve, Kain, Abel, Noa na nsuyirii no, na Babilɔn Abantsentsen no ho asɛm.
2. Tsir 12-50 ka tsetse Israelfo no ho asɛm. Abraham na odzi kan. Ne gyedzi na setsie a ɔyɛɛ maa Nyankopɔn no maa ɔgyee dzin kɛse. Abraham n’ekyir na ne ba Isaak na ne nana Jakob a ɔnoara so nye Israel no dzi. Jakob woo mbabanyin duebien, na hɔn na wɔhyɛɛ Israel ebusuakuw duebien no ase. Josef ka Jakob ne mbabanyin duebien no ho dze, naaso dza wɔka fa no ho no yɛ soronko. Ɔnam no do na Jakob na ne mba nkaa no na hɔn yernom na hɔn mba kefiir Egypt kɛtsenaa hɔ.
Ɔwɔ mu dɛ nwoma yi ka nyimpa ho asɛm dze, naaso dza Nyankopɔn ayɛ no tsitsir na osi do tam. Ɔdze adzebɔ hyɛ ase, na ɔdze anohoba a Nyankopɔn bɔɔ dɛ ɔbɔkɔ do araa ahwɛ nyimpa no wie. Nyankopɔn tsitsir na nwoma no ka no ho asɛm. Ɔno na obu atsɛn, na ɔtwe hɔn a wɔyɛ bɔn no aso. Ɔkyerɛkyerɛ ne mamfoo kwan a wɔmfa do, ɔdandan hɔn na ɔboa hɔn wɔ abrabɔ mu so. Wɔkyerɛɛw nwoma yi akyɛr yie. Ɔka nyimpa bi hɔn gyedzi ho asɛm dɛ mbrɛ ɔbɛyɛ a dɛm gyedzi no betsim.
Dza Ɔwɔ Mu
Wɔbɔɔ wiadze na adasamba 1.1—2.25
Bɔn na amandzehu ahyɛse 3.1-24
Ofi Adam do kesi Noa do 4.1—5.32
Noa na nsuyirii ho asɛm 6.1—10.32
Babilɔn Abantsentsen no ho asɛm 11.1-9
Ofi Sem do kesi Abram do 11.10-32
Tsetse Egyanom: Abraham, Isaak, na Jakob ho asɛm 12.1—35.29
Esau asefo 36.1-43
Josef na no nuanom ho asɛm 37.1—45.28
Israelfo kɛtsena Egypt 46.1—50.26
Obecnie wybrane:
Gyenesis NHƐNMU: MFANBRPC
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Mfantse Bible © Bible Society of Ghana, 2011.