DEDI 3
3
Na tau na-ndubaku-ya i Ala
1Na ularu bànda ma-kanjupu màhiya welingu la banda - bandaka da pa-padika-na i MIRI Ala. Na ularu na-paàra-nya nuna na kawini, “Màla tuba langatàka-manaka i Ala ba nalara-nggai panganja da wua-daka yiada da pingi ai la woka yiana?” wàna.
2Nahema na tau kawini, “Peku-mana duma la pangaa hàlanja da wuada da pingi ai - pingi aika la woka ngia pambawa yiana, 3hinggilu-na na pingi ai daa la padua woka. I Ala nalara-nggama panganja da wuana na pingi ai nuna jàka ndia la pa-jonggaru-ya; jàka mawunda-ya nuna, napa meti-manyaka,” wàna na tau kawini.
4Nahema na ularu, “Nda na-padeningu-a nuna; nda jia meti-àmi napa. 5Hi napanii tuna nu i Ala, ba napi-dunya jàka minga-njaka da wuana na pingi ai nuna, napa na-habola na kanandingu-mi; napa nyimi mihama-nya i Ala,#mihama-nya i Ala; jàka ndia: mihama-nja da pa-àlangu. bai pinya jàka nggàraya na mahàmu dàngu jàka nggàraya na ma-akatu,”#bai pinya jàka nggàraya na mahàmu dàngu jàka nggàraya na ma-akatu; jàka ndia: bai pi ndàbanya mbulu mbutana. wàna na ularu.
6Ba na-tàngaru-ya nuna na pingi ai paraïna kawini, na-manandangu ba naita-ya, tàka da wuana hada dahàmu-ma jàka nganja. Ka kanandi-nanyaka ba kanjupu mahàmu-maya jàka nalua-ya la pamàhi. Jia-duyaka hi napàpu-ya na wuana nuna na pingi ai, hi nanganya, dàngu hi nawua-mbunya na leina, tàka hi nangaa-mbunya paraïna leina. 7Ba dahàla-kika panganya nuna na wua ai, ka habola-madua-nanyaka na kanandingu-da, ka pàdangu-danyaka wikida ba kalulu-danya. Ka utu-danyaka ruu kanjilu hi da-pandàdangu wikida.
8La malingu nu darongu-ya i MIRI Ala ba nàhunya hu daa la woka, ka kapàndi-danyaka la njonga pingi ai ka àmbu naita-ta i MIRI ba wàda. 9Tàka i MIRI Ala hi nawara-nya na tau mini, “Nggikau?” wànanya.
10Nahema na tau mini, “Kurongu-makau ba ninggau la woka, mangàdatu-nggunya, hi ku-kapàndi ba kalulu-nggunya,” wàna.
11Na-paàrangu i Ala, “Ka nggamu na mapanii-nggau bau kalulu? Màla minga-nyaka na wua ai palara-nggu àmbi nganya ba wànggu?” wàna.
12Nahema na tau mini, “Na kawini na pawua-mungga ka ningu angunggu, nyuna na mawua-ngganya nuna na wua ai, hi kunganya,” wàna.
13I MIRI Ala na-paàra-nya na kawini, “Nggikina hi tumu nu?” wànanya.
Nahema na tau kawini, “Na ularu na ma-panyonga-ka, hi lupa kunganya nuna na wua ai,” wàna.
Ba napuha hukungu i Ala
14Hàlaka nu i MIRI Ala napanii-nya na ularu, “Nyumu pa-hukungu-kau rukuna nuna na pawunda-mu welingu la banda danguka nyumua ma-hambeta-ya na ràtungu yiana: Pakiringu nàhu napa nyumu bei wàngu-munyaka kambumu, dàngu kumburu tanaka pangamu la ngala lurimu. 15Nyumu dàngu yiana na kawini maràngga pa-umbingu-minyaka, da wàla wuana dàngu da wàla wuamu pa-muhungu mànu-danyaka. Na wàla wuana napa na-palàjaru-ya na katiku-mu, dàngu nyumu napa muwitu-ya na tandana,” wànanya.
16Hàla i MIRI hi napanii-nya na tau kawini, “Napa Nyungga kubonja-ya na katiu-mu ba talànga mbotu ihimu dàngu la rehi habola-mu. Tàka jiapa-kai ba tuna nu, daingu-mana nyumu bau mataru-nya na leimu, na nyuna napa mu-pawawa lai nyuna,” wànanya.
17Hàla i MIRI hi napanii-nya na tau mini, “Mu-patingi-nyaka nyumu na papaha-mu hi munganya na wua ai na palara-nggu àmbu nganya ba wanggu. Nu ba tumuka nu, pa-ràtungu-yaka na tana. Mu-mbangatu-ka bàdi paràma la ngala lurimu, ka pekuna na tana yiana ba natuu ihina na matoma bau ngangu. 18Rumba dàngu rii madàka jia-haka da pawua-na na tana lai nyumu, dàngu da ma-àtalu tumbuda jia-haka napa da pangamu. 19Dira matiki-mapa dàngu lundu wai hanggobu-mamupa nyumu napa bau ràma la pa-paloku-ya na tana hi ningu ana pangala-mu, lupa mubeli la tana, nadu ba welimu la tana-madu ba unggulu-kau. Nyumu pawulu welingu la tanakau dàngu napa mubeli la tanamai,” wànanya.
20I Andamu,#Andamu: Na tamu yiana la hilu Imbarani, “banjaru tau pinu tana,” wàna. na-patamu-nya Hawa#Hawa: na tamu yiana ba wàngu parongu-ya hama linguna dàngu na kareuku hilu Imbarani, “luri” ba wàna. na papaha-na, rukuna ba inana na nggubulu banjaru tau pinu tana-duya nuna na kawini. 21Ka pandoi-nanyaka i MIRI Ala pakida welingu la manula banda ndumada i Andamu dàngu na papaha-na, hàla hi na-pakalambu-nja.
I Andamu dàngu i Hawa ba wànggaha welingu la woka ngia pambawa la Endingu
22I MIRI Ala natuu liina, “Nahu na tau hama-nandaka Nyuta dàngu ninguka papi wàdanya rukuna na mahàmu dàngu na ma-akatu. Jia ba tuna dimbaku-yaka bàdi ka àmbu nanganya na wuana na pingi ai paluri wàngu, ka àmbu naluri lundu nu - nu,” wàna. 23Ka wàngga-nanjaka paraïna MIRI da tau welingu la woka ngia pambawa la Endingu tàka hi na-paràha-nja pa-paloku-ya na tana na ngia paweli-da. 24Tunaka nu, la tuba pahunga loduna na woka nuna la ngaru pindu tama, i MIRI Ala natuha da patau awangu#patau awangu; jiaha da kalibaru papalewa ba hama tuna dika maningu ruu kàpangu-ha ba wàda dàngu da ma-paninu maünya na ninya i Ala dàngu na mangunju-na. dàngu ba hapungu-na na hapanda kabilaku na pa-pawilikungu lai nu - lai nu, ka mangganya na ànda na ma-hanggangu la pingi ai paluri wàngu. Ba wàngu patuna numaka, ka nda ningu-mapa duna haàtu mapeku la patama jàka ndia palihi-nya nuna na pingi ai.
Obecnie wybrane:
DEDI 3: KAM
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 1995 Indonesian Bible Society (Lembaga Alkitab Indonesia)