1 Musa 3
3
Ialo jelma i Dèbata
1 #
Alm. 12:9, 20:2 Nipè ngo sibècukna ibas karina binatang sinihanaken Dèbata Jahowa. Ikuso nipè i mo daberru i, “Ti, tuhu ngo igerra Dèbata kènè kipangan buah karina kayu ni pekken èn?”
2“Ndorok ngo kupangan kami buah gennep kayu sinibagasen pekken èn,” nina daberru i, 3“laènken buah kayu sinitengah pekken èn. Igerra Dèbata ngo asa ulang kupangan kami buah kayu i barang pè menjèmaksa; mula kulausken kami nidokkenna i, matè nai ngo kami.”
4Ialoi nipè i mo, “Oda tuhu i; oda ngo matè kènè. 5Idokken Dèbata bagidi, kerna ibettoh mula ipangan kènè buah i, gabè mbuka mo pikiren ndènè; dos dekket Dèbata mo kènè mettoh kadè mendè bak kadè nggodo.”
6Merandal ngo kayu i idah daberru i, janah buahna pè merasa pengaen idahen. Tubuh mo i pikirenna, soh mo mendèna mula gabè kalak bijak ia. Kerna i ipotikken mo buah kayu i, janah ipangan. Iberèken mo dèba taba sinibalèna janah ipangan sinibalèna i ma mo. 7Ipangan kalak i kessa buah i, mèter mbuka mo pikirenna, ibettoh mo oda merrabit kalak i. Isemmet mo bulung kayu ara mahan abitna.
8Cibonna i idengkoh kalak i mo merdalan Dèbata Jahowa i pekken i, nai ciboni mo kalak i sidua i balik kayu asa ulang idah Dèbata. 9Tapi idilo Dèbata Jahowa mo anak laki i, “I dikè ngo kono?”
10Ialoi anak laki i mo, “Kudengkoh ngo kono i pekken èn, tapi mbiar ngo aku, gabè ciboni ngo aku kerna lubus ngo aku.”
11“Isè mendokken taba kono, lubus kono?” nina Dèbata. “Mada ngo ipangan kono buah siKugerra panganenmu i?”
12Ialoi anak laki i mo, “Daberru niberèkenmu bangku mahan denganku i ngo merèken buah i bangku, gabè kupangan.”
13 #
2 Kor. 11:3; 1 Tim. 2:14 Ikuso Dèbata Jahowa mo daberru i, “Kasa bagi ibaing kono?”
Ialoi mo, “Iajar-ajari nipè i ngo aku, memaing asa kupangan buah kayu i.”
Dèbata mendabuh hukum
14Enggo kessa bagi idokken Dèbata Jahowa mo mbang nipè i, “Kenna hukum mo ko kumarna ulah-ulahmi; ko mo kessa makapken hukum tarap karina binatang: Mungkah bagèndari nai menjoror mo ko, beltekmu mo mahan nènèhmu janah abu mo panganenmu sidekkah nggelluhmu. 15#Alm. 12:17 Dak mersihelemmen mo ko dekket daberru i, pinemparmu mi pinemparna dak mermusuh. Pemparenna mengelicatken takalmu, janah itebbi kono mo tukul-tukul kalak i.”
16Nai nina Dèbata mo taba daberru i, “Kutambahi mo mpiah pengakapmu tikan mengkandong ko dekket tikanmu ketaring. Tukasi pè bagi, dak sèkel ngo ko midah sinibalèmu, janah kennah tunduk ngo ko bana.”
17 #
Heb. 6:8
Nai nina Dèbata mo taba anak laki i, “Kumarna idengkohken kono rana sinibagesmu gabè ipangan kono buah siKugerra mak ndorok panganmu. Kumernaken pemaingmu i, kenna sempetta mo tanoh èn. Kennah rengngè ngo tulanmu mahan bahanen sidekkah nggelluhmu, asa iberrè tanoh i cukup panganmu. 18Ipenturahken tanoh i mo dukut bak dori bamu, janah suan-suaen rambah i mo panganmu. 19Kennah ledja mo kono mahan bahaen janah rendes panasmu lako mengula tanoh i asa merhasil bamu mèma balik ko kembali tanoh ai tanoh kin ngo asalmu ihanaken. Itempa ngo ko i tanoh nai, janah kennah balik kembali tanoh.”
20Igerari si Adam mo sinibagesna i si Hawa, kerna daberru i ngo gabè inang karina jelma manusia. 21Nai ibaing Dèbata Jahowa mo bebbak mahan oles si Adam dekket sinibagesna i, janah ipakkèken taba kalak i.
Si Adam dekket si Hawa ipuari i pekken Eden nai
22 #
Alm. 22:14
Mongkam mo Dèbata Jahowa, “Bagèndari enggo mo bagè kita jelma i memettoh mendè dekket nggodo. Jadi kennah siambati ngo ia asa ulang ipangan buah kayu kenggeluhen i, asa ulang nggelluh ia soh mi amman sumendah.” 23Nai ipuari Dèbata Jahowa mo jelma i i pekken Eden nai, janah idokken asa iula tanoh asalna i. 24Nai kan kebincaren pekken i, i jolo pèntu mbengket, ipejagaken Dèbata Jahowa mo kerubim, dekket peddang merapi merjollah mi karina lambung, menjaga dalan mi kayu kenggeluhen i. Merkitè bagidi isè poda terbaing masuk menjolmiti kayu i.
Obecnie wybrane:
1 Musa 3: LAIBTD
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)