Yos 8
8
Kũkwatwa na Kwanangwa kwa Ndũa ya Ai
1Mwĩai Ngai nĩwaneenie na Yosua amwĩa atĩĩ, “Osa asikalĩ onthe ma kaũ, na mũyambata mũthi ndũanĩ ya Ai. Ndũkakĩe kana kũkw'a ngoo. Nĩngũũnenga ũtonyi wa kũsinda mũsumbĩ wa Ai; andũ make, ndũa ĩsu, na nthĩ ĩsu ĩkeethĩwa yĩ yaku. 2Enda ũkeke ndũa ya Ai na mũsumbĩ wayo o tondũ weekanie na ndũa ya Yeliko na mũsumbĩ wayo, ĩndĩ ĩvindanĩ yĩĩ osa syĩndũ sya ndũa ĩsu na indo syayo ũmesye. Ĩyũmbany'e kũvithũkĩa andũ ma ndũa ĩsu matesĩ wĩsĩlĩte ngalĩko ya ĩtina.”
3Kwoou Yosua na asikalĩ onthe ma kaũ nĩmambatie makavithũkĩe ndũa ya Ai. Nĩwanyuvie asikalĩ ngili mĩongo ĩtatũ ala maĩ ngũmbaũ na amatũma mathi ũtukũ. 4Matanamba kũthi nĩwameaĩie atĩĩ, “Endai mwĩvithe ngalĩko ya ĩtina ya ndũa ĩsu na mũikethĩwe vaasa nayo. Ĩthĩwai mwĩyũmbanĩtye kũmĩvithũkĩa. 5Nyie na asikalĩ ala angĩ nĩ namo nĩtũũvithũkĩa ndũa ĩsu twĩsĩlĩte ngalĩko ĩla ya mbee. Andũ ma ndũa ya Ai mooka kũkita naitũ, twĩsyoka tũsembete o ũndũ tweekie ĩvindanĩ ya mbee. 6Nĩmeũtũatĩĩa nginya tũtume mauma ndũanĩ ĩsu maisũanĩa tũsembete tũkĩĩte ũndũ tweekie ĩvinda yĩla yĩngĩ. 7Nĩvo ĩndĩ nenyu mũkumĩla na kũvithũkĩa ndũa ĩsu na mũimĩkwata. Mwĩai Ngai, Ngai wenyu nũkũmũnenga ndũa ĩsu yĩthĩwe yenyu. 8Mwamina kũkwata ndũa ĩsu, mĩkwatyei mwaki ĩvye o tondũ Mwĩai Ngai weeaie. Atĩĩai ũndũ namwĩaĩa.” 9Yosua nĩwalekilye asikalĩ asu ngili mĩongo ĩtatũ mathi. Nĩmaendie kwĩvitha vandũ ngalĩko ya ũthũĩlonĩ wa syũa wa ndũa ya Ai, katĩ wa ndũa ĩsu na ndũa ya Mbethi-eli, na meeteela me vau. Ũtukũ ũsu Yosua akomele vala andũ ma Ĩsilaeli mambĩte maeema.
10Ũnĩ ũsu kwakya tene Yosua aamũka nĩweetie asikalĩ ala angĩ onthe vamwe. Nĩwamatongoeisye e na atongoi ma andũ ma Ĩsilaeli mathi ndũanĩ ya Ai. 11Asikalĩ ala waĩ namo nĩmaendie melekele mũvĩanĩ ũla mũnene wa ndũa ĩsu na mamba maeema moo ngalĩko ya ĩũlũ ya Ai. Katĩ wa vala mambĩte maeema na ndũa ya Ai vaĩ mwanda. 12Yosua nĩwoosete asikalĩ ngili itano na akamea nĩmevithe ngalĩko ya ũthũĩlonĩ wa syũa ya ndũa ya Ai, katĩ wa Mbethi-eli na ndũa ĩsu. 13Asikalĩ nĩmeevangie mokite; ala aingĩ maĩ maeemanĩ ngalĩko ya ĩũlũ ya ndũa ĩsu na ala angĩ maĩ ngalĩko ya ũthũĩlonĩ wa syũa. Ũtukũ ũsu Yosua akomele mwandanĩ. 14Yĩla mũsumbĩ wa Ai woonie asikalĩ ma Yosua, nĩwaendie e na aũme onthe ma ndũa ĩsu kwakya tene mekalaatĩte makakomanĩe na asikalĩ ma Ĩsilaeli vandũ vana kwelekela Mwanda wa Yolotani. Mũsumbĩ ũsu ndeesĩ kana asikalĩ ma Ĩsilaeli nĩmeũmũvithũkĩa kuma ngalĩko ya ĩtina. 15Yosua na asikalĩ ala waĩ namo nĩmeetw'ĩkĩthisye ta masindwa nĩ andũ ma Ai na masemba melekele weũnĩ. 16Aũme onthe ma ndũa ya Ai nĩmeetiwe maatĩĩe asikalĩ ma Ĩsilaeli na maendee na kũatĩĩa Yosua, nĩmaendie vaasa na ndũa ĩsu. 17Vai mũndũ-ũme waatiwa Ai kana Mbethi-eli; onthe nĩmaumaalile maatĩĩa asikalĩ ma Ĩsilaeli na matia ndũa ĩsu ĩte na mũndũ wa kũmĩsunga.
18Nĩvo ĩndĩ Mwĩai Ngai weeie Yosua atĩĩ, “Oneleelya ĩtumo yaku yĩla ũkwete ndũanĩ ya Ai: Nĩngũũnenga ndũa ĩsu.” Yosua nĩweekie ũndũ weeiwe, 19na aimina kũkĩlya kw'oko kwake oou, ala asikalĩ meevithĩte ĩtina wa ndũa ya Ai nĩmaumĩlile na mĩtũkĩ, masemba malika ndũanĩ ĩsu na mamĩkwata na mamĩkwatya mwaki mĩtũkĩ ĩvye. 20Yĩla aũme ma Ai masyaisye ĩtina nĩmoonie syũki yingĩ yĩtoete yĩkambata nginya matunĩ. Vayaĩ nzĩa maĩ matonya kũvonoka, nũndũ asikalĩ ma Ĩsilaeli ala makĩĩte melekele weũnĩ nĩmavĩndũkie mokite namo. 21Yĩla Yosua na asikalĩ make moonie kana asikalĩ ala meĩvithĩte nĩmalika na kũvĩvya ndũa ya Ai, nĩmavĩndũkie na mokita andũ ma ndũa ĩsu. 22Asikalĩ asu meevithĩte nĩmookie kuma ndũanĩ matetheesye ala angĩ kaũ. Aũme ma Ai nĩmeethĩie melingĩlĩtwe nĩ asikalĩ ma Ĩsilaeli na onthe mooawa. Vai ũmwe waasemba akakĩa kana kũlea kũawa 23ate o mũsumbĩ wa Ai, ũla wakwatiwe na atwawa vala ve Yosua. 24Asikalĩ ma Ĩsilaeli nĩmooaĩie amaitha moo onthe na ũvyũ isesinĩ ila syĩ weũnĩ vala amaitha asu mamaatĩĩe. Nĩvo ĩndĩ masyokie ndũanĩ ya Ai na mooaa andũ ala angĩ onthe maĩ ndũanĩ ĩsu. 25Andũ onthe ma ndũa ya Ai ngili ĩkũmi na ilĩ aũme na aka nĩmooaiwe mũthenya ũsu. 26Yosua ndaaeka kwoneleelya ndũa ya Ai ĩtumo yake yĩla wakwete nginya onthe ala matwĩe ndũanĩ ĩsu mooawa mathela. 27Andũ ma Ĩsilaeli nĩmoosie mamesya indo na syĩndũ ila matavie ndũanĩ ĩsu kwĩanana na ũndũ Mwĩai Ngai weeaĩĩte Yosua. 28Yosua nĩwavĩvisye ndũa ya Ai na amĩtia ĩilyĩ kĩvumbu tene na tene. Ndũa ĩsu ĩilyĩ ũu o na kũvika ũmũnthĩ. 29Nĩwasũisye mũsumbĩ wa Ai mũtĩnĩ na atia mwĩĩ wake vau nginya ĩa mawĩoo. Syũa yĩithũa Yosua nĩweeaie nĩ kana mwĩĩ ũsu ũvetwe na ũyĩkw'a nzĩanĩ ĩla yũkĩte kũlika mũvĩanĩ wa ndũa. Mwĩĩ ũsu nĩwavw'ĩkiwe na mbumbu ya mavia ĩla yĩ o vo kũvika ũmũnthĩ.
Mĩao ya Ngai Ĩisomewa Kĩĩmanĩ kya Evali
30 #
Kũt 27.2-8
Yosua nĩwaakĩie Mwĩai Ngai, Ngai wa Ĩsilaeli kĩthembeo Kĩĩmanĩ kya Evali. 31#Kuma 20.25 Nĩwakyakie kwĩanana na ũelesyo ũla Mwose mũthũkũmi wa Mwĩai Ngai wanengie andũ ma Ĩsilaeli o tondũ Mĩaonĩ ya Mwose kũandĩkĩtwe atĩĩ: “Kĩthembeo kyakĩtwe na mavia matasũvĩtw'e na mũio o na wĩva wa kyũma.” Nĩmathembeaa Mwĩai Ngai nthembo sya kũvĩvw'a kĩthembeonĩ kĩu. O ta ũu nĩmaumĩasya nthembo sya ngwatanĩo kĩthembeonĩ kĩu. 32Me vau, Yosua nĩwaandĩkie mavianĩ asu mĩao ĩla Mwose waandĩkĩte. Eekie ũu andũ ma Ĩsilaeli masyaĩĩsye. 33#Kũt 11.29; 27.11-14 Andũ ma Ĩsilaeli vamwe na atongoi moo, andũ me ndaĩa, asili, na aeni ala mekalanasya namo, nĩmaũngamie ngalĩko syelĩ sya Ĩsandũkũ ya Ũtianĩo ya Mwĩai Ngai, masyaĩtye athembi ma Alivai ala makuĩte ĩsandũkũ yĩu. Nyusu ya andũ asu yaũngamĩte mĩongo yoo yelekele Kĩĩma kya Ngelisimu, na nyusu ĩla ĩngĩ yelekelye mĩongo yoo Kĩĩma kya Evali. Mwose, mũthũkũmi wa Mwĩai Ngai nĩwameaĩĩte meke ũu ĩvinda yoo ya kũathimwa yavika. 34Ĩtina wa ũu Yosua nĩwasomie mĩao yonthe vamwe na ndeto sya kũathima na sya kũumanĩa na wasya mũnene, o tondũ syonthe iandĩkĩtwe Ĩvukunĩ ya Mĩao. 35Yosua nĩwasomeie ĩkomano yonthe ya andũ ma Ĩsilaeli mĩao yonthe ĩla Mwose weeaĩte. O ta ũu ĩkomanonĩ yĩu vaĩ iveti, syana, na aeni ala mekalanasya na andũ ma Ĩsilaeli.
BIBLE SOCIETY OF KENYA © 2011