Yos 23
23
Ndeto sya Yosua sya Mũtaanĩsyo
1Ĩtina wa ĩvinda ĩasa, Mwĩai Ngai nĩwanengete andũ ma Ĩsilaeli mũuo kwa kũmavonokya kuma kwa amaitha moo ala mamathyũlũlũkĩte, na Yosua aĩ mũtumĩa wĩna na ũkũũ wa myaka mingĩ. 2Nĩvo ĩndĩ Yosua weetie andũ onthe ma Ĩsilaeli, atumĩa, atongoi, asili, na andũ ala angĩ onthe matongoesye andũ. Nĩwaneenie namo amea atĩĩ, “Yu nĩ mũkũũ na nĩ na myaka mingĩ. 3Nĩmwonete maũndũ onthe ala Mwĩai Ngai, Ngai wenyu wĩkĩte andũ ma mbaĩ ii syonthe nũndũ wenyu. Mwĩai Ngai, Ngai wenyu nĩwĩthĩĩtwe aimũkitĩa. 4Lilikanai ũndũ nĩnengete andũ ma mbaĩ syenyu ng'ũndũ kuma isio syonthe sya nthĩ sya mbaĩ ila itialĩte, vamwe na ila sya mbaĩ ila nasindie na nakwata. Nthĩ sya mbaĩ isu syĩ katĩ wa Ũsĩ wa Yolotani ngalĩko ya wumĩlonĩ wa syũa, na Ũkanga wa Menditelenia ngalĩko ya ũthũĩlonĩ wa syũa. 5Mwĩai Ngai, Ngai wenyu akatuma masemba mamũkĩe, na akamalũngya maume mbee wenyu o mũendee kũlika nthĩ yoo. Mũkoosa nthĩ yoo mũmesye o tondũ Mwĩai Ngai wamwathie. 6Kwoou ĩthĩwai mwĩ na vinya na kĩthito kya kwĩw'a na kwĩanĩsya maũndũ onthe ala Mwose waandĩkie Ĩvukunĩ ya Mĩao. Mũikalee kwĩanĩsya ũndũ o na ũmwe wa mĩao ĩsu. 7Mũikaaĩthĩwe na ngwatanĩo na andũ ma mbaĩ isu itialĩte katĩ wenyu, kana kũweta masyĩtwa ma ngai syoo, kana kũtũmĩa masyĩtwa ma ngai isu yĩla mũkwĩvĩta. O ta ũu mũikaathaithe ngai isu kana kũithũkũma. 8Vandũ va ũu ĩthĩwai mwĩ aĩkĩĩku kũla kwĩ Mwĩai Ngai o tondũ mwĩthĩĩtwe mũilyĩ kũvika ũmũnthĩ. 9Mwĩai Ngai nũlũngĩtye kuma mbee wenyu mbaĩ syĩ nguma na syĩ ũtonyi. Kũvika o na ũmũnthĩ vai mbaĩ o na ĩmwe yaaĩsa kwĩthĩwa ĩtonya kũmũsinda. 10#Kũt 3.22; 32.30 Mũndũ o ũmwe katĩ wenyu nĩwĩthĩawa atonya kũtuma andũ ngili makĩa, nũndũ o tondũ Mwĩai Ngai, Ngai wenyu wamwathie, nĩwe wĩthĩawa aimũkitĩa. 11Kwoou ĩsũvĩaei na kũmwendaa Mwĩai Ngai, Ngai wenyu. 12Ĩndĩ mweethĩwa mũte ewi na kwĩthĩwa na ngwatanĩo na andũ ma mbaĩ ila itialĩte katĩ wenyu, na mũitwaana namo, 13manyai nesa vyũ kana Mwĩai Ngai, Ngai wenyu ndakaendeea kũlũngya andũ ma mbaĩ isu maume mbee wenyu. Vandũ va ũu, mbaĩ isu ikeethĩawa syĩ mũisyo kwenyu ta kĩtei kana ĩima, na ta woo wa mũnzyũ ũkũnĩte mũndũ mũongo, kana mĩw'a ĩtonyete mũndũ metho. Maũndũ asu makaendeea nginya inyw'onthe mũthele kuma nthĩ ĩno nzeo ĩla Mwĩai Ngai, Ngai wenyu ũmũnengete.
14“Yu ĩvinda yakwa ya kũkw'a nĩ ĩviku. Kĩla ũmwe wenyu nĩwĩsĩ ngoonĩ na thayũnĩ wake kana Mwĩai Ngai, Ngai wenyu nũmũnengete syĩndũ nzeo ila wamwathie. Nĩwĩkĩte maũndũ onthe ala wamwathie, na vai ũmwe ũtaawĩanĩsya. 15Ĩndĩ o tondũ Mwĩai Ngai, Ngai wenyu weanĩisye maũndũ onthe maseo ala wamwathie, now'o wĩmũetee maũndũ ala mathũku nginya atie amũmina inyw'onthe mume nthĩ ĩno nzeo ĩla ũmũnengete. 16Mwalea kwĩanĩsya ũtianĩo ũla Mwĩai Ngai, Ngai wenyu wamwĩaĩe mwĩanĩsye, na ethĩwa mũkathũkũma na kũthaitha ngai ingĩ, Mwĩai Ngai akathata mũno nũndũ wenyu na kũmũkany'a. Ĩtina wa kavinda kanini inyw'onthe mũkathela vyũ na vai ũmwe wenyu wĩtiala nthĩ ĩno nzeo ĩla Mwĩai Ngai ũmũnengete.”
BIBLE SOCIETY OF KENYA © 2011