Osea 14
14
Osea Ayĩsũva Andũ ma Ĩsilaeli Mamũsyokee Mwĩai Ngai
1Ame Ĩsilaeli mũsyokee Mwĩai Ngai, Ngai waku,
nũndũ naĩ yaku nĩkũluluutĩkĩtye ũkavalũka.
2Osai ndeto na mũimũsyokea Mwĩai Ngai nasyo na mũimwĩa atĩĩ,
“Tũekee naĩ sitũ syonthe na ũyĩtĩkĩla mboya sitũ,
naitũ tũkakũtaĩa ũndũ twathanie.
3Asuli ndĩkatũtangĩĩa;
tũikekwatya mbalasi sya kaũ.
Tũikatavya ĩngĩ mĩvw'anano yaitũ ĩla tũseũvĩtye tũmĩe atĩĩ,
‘Inyw'ĩ ninyw'ĩ ngai sitũ.’
We Mwĩai Ngai nĩwĩw'ĩaa syana ndiwa tei.”
Mwĩai Ngai Ayathana Kũekea Andũ ma Ĩsilaeli
4Mwĩai Ngai easya atĩĩ,
“Ngatũnga andũ makwa vala nĩĩ ĩngĩ,
ngamenda na ngoo yakwa yonthe,
nũndũ nĩnĩekete kũmathatĩa.
5Ngeethĩwa nĩilyĩ ta ĩmwe kwa andũ ma Ĩsilaeli,
makalaũka ta ĩlaa ya lili;
makeethĩwa me alũmu ta mĩi ya mĩkũũ ya Levanoni.
6Nthongoo syoo ikanyaĩĩka;
makaanakava ta mĩtĩ ya mĩthata,
na kũnyunga nesa ta mũtitũ wa Levanoni.
7Makasyoka na kwĩkala ungu wa ũsũvĩo wakwa,
makaendeea nesa ta mũũnda,
makalaũka ta mũsavivũ,
na makeethĩwa me na nguma ta ndivai ya Levanoni.
8Inyw'ĩ andũ ma Evalaimu, mwĩ na vata mwaũ ũngĩ na mĩvw'anano?
Ninyie nzũngĩaa mboya syenyu na kũmũsũvĩa.
Ninyie nĩmũeteae muunyĩ ta mũtĩ ũla ũtetaa matũ;
moathimo menyu onthe maumaa kwakwa.”
9“Nũũ ũla mũĩ? Namanye maũndũ aa.
Nũũ ũla wĩ na kĩlĩko? O nake nĩamamanye.
Nzĩa sya Mwĩai Ngai nĩ sya w'o,
ala alũngalu nĩmaiatĩĩaa,
ĩndĩ avĩtany'a nĩmaluluutĩkĩlaa nzĩanĩ isu.”
BIBLE SOCIETY OF KENYA © 2011