Amo 2
2
Ũsilĩlo kwa Andũ ma Moavi
1 #
Ĩsa 15.1—16.14; 25.10-12; Yel 48.1-47; Esek 25.8-11; Nzev 2.8-11 Mwĩai Ngai easya atĩĩ, “Andũ ma Moavi nĩmavĩtĩtye ĩngĩ na ĩngĩ na kwoou ndilea kũmakany'a, nũndũ nĩmavukisye mavĩndĩ ma mũsumbĩ wa Etomu yĩla mamavĩvisye matw'ĩka mũu. 2Kwoou ngaete mwaki Moavi ũvĩvye kũndũ kũlũmu kwa kwĩvitha kwa ndũa ya Keliothi. Andũ ma Moavi makooawa nĩ mawasya ma kaũ, namo asikalĩ makeethĩwa maneenete na wasya mũnene, na masoo mavuvĩtwe. 3Ngooaa mũsumbĩ wa Moavi na atongoi ma nthĩ ĩsu onthe. Nĩasya ũu nyie Mwĩai Ngai.”
Ũsilĩlo kwa Andũ ma Yuta
4Mwĩai Ngai easya atĩĩ, “Andũ ma Yuta nĩmavĩtĩtye ĩngĩ na ĩngĩ na kwoou ndilea kũmakany'a, nũndũ nĩmaleete mĩao yakwa nyie Mwĩai Ngai, na makalea kwĩanĩsya motw'ĩo makwa. Nĩmaĩtw'e nĩ ngai sya ũvũngũ ila aaũmae moo mathaithaa. 5Kwoou ngaete mwaki Yuta ũvĩvye kũndũ kũlũmu kwa kwĩvitha Yelũsalemu.”
Ũsilĩlo wa Ngai kwa Andũ ma Ĩsilaeli
6Mwĩai Ngai easya atĩĩ, “Andũ ma Ĩsilaeli nĩmavĩtĩtye ĩngĩ na ĩngĩ, na kwoou ndilea kũmakany'a. Mathooasya andũ ala alũngalu nũndũ nĩmaemetwe nĩ kũĩva mathiĩ moo, na kũthoosya ngya ila itatonya kũĩva thiĩ wa mĩkalya. 7Nĩmathĩnasya na kũvinyĩĩa ngya, na kũvata ala matetonya ũsili wa katĩ. Ĩthe na mwana nĩmamanyanaa kĩ-mwĩĩ na mwĩĩtu o ũmwe, na kwoou nĩmavukasya ĩsyĩtwa yakwa ĩtheu. 8Kũndũnĩ kwa kũthaithĩa kw'onthe andũ makomeaa ngũa syosetwe kuma kwa ngya ta ngwatĩlĩĩlyo sya mathiĩ.#2.8 Mũndũ oosa ngũa ya mũndũ ũngĩ yĩthĩwe ngwatĩlĩĩlyo, aĩ no nginya amũtũngĩe ĩa mawĩoo nĩ kana evw'ĩke ngũa ĩsu aikoma. Sisya Kuma 22.26; Kũt 24.13. Me Ĩkalũnĩ ya Ngai woo, nĩmanyusaa ndivai ĩla mosete kuma kwa andũ ala mataĩte mbesa.
9 #
Kũt 3.8-11
“Ũu wĩ o vo, andũ makwa, nĩnaminie Aamoli vyũ nũndũ wenyu. Aamoli maĩ aasa ta mĩtĩ ya mĩkũũ, na maĩ alũmu ta mĩtĩ ya myalonĩ. Nĩnaanangie mbonge na mĩi yoo. 10Nĩnamumisye nthĩ ya Misili, na namũtongoesya weũnĩ myaka mĩongo ĩna, nĩ kana nĩmũnenge nthĩ ya Aamoli. 11#Mot 6.1-8 Nĩnanyuvie amwe ma ana menyu matw'ĩke athani, na amwe ma anake menyu matw'ĩke Anasili. Nĩmũkũlya, andũ ma Ĩsilaeli ũu nĩ wa w'o? Nĩasya ũu nyie Mwĩai Ngai. 12Ĩndĩ nĩmwatumie Anasili manyw'a ndivai na mweeaĩa athani mwamea atĩĩ, ‘Mũikathane.’
13“Kwoou yu ngamũvinyĩĩa nthĩ, o tondũ ĩkasya yĩvinyĩĩaa nthĩ yusũĩtw'e ngetha ya mbaa mbeke. 14Ala masembaa mũno maikethĩwa matonya kũkĩa mathi, na ala me vinya makaasya vinya woo, o na asikalĩ maikatangĩĩa thayũ woo. 15Ũla ũtũmĩaa ũta ndakethĩwa etonya na ũla ũsembaa mũno ndakethĩwa atonya kũkĩa aketangĩĩa, o na mũsikalĩ ũlĩsĩte mbalasinĩ ndakethĩwa atonya kwĩtangĩĩa. 16Mũthenyanĩ ũsu, o na asikalĩ ala ngũmbaũ makasemba makĩe me athei. Nĩasya ũu nyie Mwĩai Ngai.”
BIBLE SOCIETY OF KENYA © 2011