2Ath 1
1
1 #
Meko 17.1
Kuma vala tũĩ nyie Vaũlo, Sila na Timotheo. Valũa ũũ nĩ kwenyu ĩkanisa ya andũ ma Thesalonika, ala ma Ngai Asa na Mwĩai Yesũ Klĩsto.
2Mumo na mũuo nĩsyĩthĩwe nenyu kuma kwa Ngai Asa na kwa Mwĩai Yesũ Klĩsto.
Ũsilĩlo Ĩvindanĩ ya Kũka Ĩngĩ kwa Klĩsto
3Nĩtwaĩlĩtwe nĩ kũmũtũngĩa Ngai mũvea kwondũ wenyu mbaitũ, na ũu nĩwaĩlu nĩkwĩthĩwa mũĩkĩĩo wenyu ũendee na kwĩana mbee na mbee, naw'o wendo ũla mwĩ naw'o kwa kĩla ũmwe wenyu ũendee na kwingĩva. 4Kĩu nĩkyo kĩtumi twĩkathĩĩaa nenyu makanisanĩ onthe ma Ngai. Twĩkathĩĩaa nenyu nũndũ wa wũmĩĩsyo wenyu, na mũĩkĩĩo ũla mũendee kwĩthĩwa naw'o, o na mathĩnanĩ na monyamaonĩ ala mwĩthĩĩtwe namo.
5Ũu w'onthe wĩonany'a kana Ngai asilaa w'o, na nũndũ wa ũu akamũtw'a inyw'ĩ kwĩthĩwa aĩlu kũlika ũsumbĩnĩ wake ũla mũũthĩna kwondũ waw'o. 6Ngai akeeka ũla waĩlu: Akamaĩva mathĩna andũ ala mamũthĩnasya, 7na akĩmũthũmũsya inyw'ĩ ala mũthĩnaw'a; naitũ no ta ũu. Ũu ũkeethĩwa yĩla Mwĩai Yesũ wĩumĩla kuma ĩtunĩ vamwe na alaĩka make me vinya, 8na e na mwaki wakene. Akasilĩla ala mamũleaa Ngai, na mataatĩĩaa Ũvoo Mũseo wa Mwĩai waitũ Yesũ. 9#Ĩsa 2.10 Ũsilĩlo ũla makakwata nĩwakwanangwa tene na tene, na kũvetwa vyũ methonĩ ma Mwĩai na ũkumyonĩ wa vinya wake. 10Ũũ ũkeethĩwa mũthenya ũla Mwĩai wĩũka ĩngĩ kũkathwa na kũtaĩwa nĩ andũ ala make, andũ ala mamũĩkĩĩaa. Inyw'ĩ mwĩ katĩ wa andũ asu nĩkwĩthĩwa nĩmweetĩkĩlile kĩla twamũtavisye.
11Kwondũ wa kĩtumi kĩu, nĩtũmũvoyeaa kĩla ĩvinda Ngai waitũ amũtw'e aĩlu kwĩkala mwĩkalo ũla wamwĩtie mwĩkale, na kwa ũtonyi wake aimũnenga kwĩka kĩla ũndũ ũseo mwendaa kwĩka, na kĩla mũĩkĩĩo wenyu ũmwonasya mwĩke. 12Kwa nzĩa ĩsu, ĩsyĩtwa ya Mwĩai waitũ Yesũ yĩkakumw'a nthĩnĩ wenyu, nenyu mũkakumw'a nthĩnĩ wake, kwondũ wa mumo wa Ngai waitũ na wa Mwĩai Yesũ Klĩsto.
BIBLE SOCIETY OF KENYA © 2011