2Sam 3
3
1Kaũ katĩ wa aatĩĩi ma Saũlo na ma Ndeviti nĩwaendeeie vandũ va ĩvinda ĩasa. Ndeviti nĩwaendeeie kwĩthĩwa na ũtonyi mwingĩ, ĩndĩ andũ ma nyũmba ya Saũlo nĩmaendeeie kwĩthĩwa me onzu mũno.
Ana ma Ndeviti
2Aa nĩmo ana ma Ndeviti ala masyaĩwe Eviloni: Wa mbee eetawa Aminoni ũla inyia wake weetawa Ainoamu kuma Yesileeli; 3wa kelĩ eetawa Kileavu, na inyia wake eetawa Avikaili, ũla waĩ mũka wa Navali kuma Kalimeli; wa katatũ eetawa Avisalomu ũla inyia wake weetawa Maaka, mwĩĩtu wa Talimai mũsumbĩ wa Ngesuli; 4wa kana eetawa Atoniya, ũla nyinyia wake weetawa Akithi; wa katano eetawa Sevatia, ũla inyia wake weetawa Avitali, 5na wa thanthatũ eetawa Ithileamu ũla inyia wake weetawa Ekila. Ana asu onthe ma Ndeviti masyaĩwe Eviloni.
Ngwatanĩo ya Avineli na Ndeviti
6Ĩvindanĩ yĩla kaũ katĩ wa aatĩĩi ma Saũlo na ma Ndeviti waendee, Avineli nĩwaendee kwĩthĩwa na ũtonyi katĩ wa aatĩĩi ma Saũlo.
7Saũlo aĩ na kĩveti kya ndũsyo kyeetawa Lisiva mwĩĩtu wa Aia. Nĩvo ĩndĩ Isivosethi weeie Avineli atĩĩ, “Ũmanyanie kĩ-mwĩĩ na kĩveti kya ndũsyo kya ĩthe wakwa nĩkĩ?”
8Avineli nĩwathatiw'e mũno nĩ ndeto sya Isivosethi na amũkũlya atĩĩ, “Wĩsũanĩa kana nĩndonya kũlea kwĩthĩwa nĩ ngalĩkonĩ ya Saũlo, na kana nĩthũkũma andũ ma Yuta? Kuma mwambĩlĩĩlyonĩ nĩthĩĩtwe nĩ mũĩkĩĩku kwa ĩthe waku Saũlo, ana-a-inyia make na anyanyae make, na nĩngũtetheesye ndũkasindwe nĩ Ndeviti; ĩndĩ ũu wĩ o vo ũmũnthĩ wĩona nĩ na mavĩtyo nũndũ wa mũndũ mũka ũũ! 9#1Sam 15.28 Ngai nĩambũae ethĩwa ndiĩka maũndũ ala weevĩtie kũla kwĩ Ndeviti kana akameka. 10Mwĩai Ngai nĩweevĩtie kũla kwĩ Ndeviti kana akanenga nyũmba yake ũsumbĩ vandũ va nyũmba ya Saũlo, na akasumbĩka nthĩ ya Ĩsilaeli na Yuta kuma Ndani ngalĩko ya ĩũlũ kũthi kũvika Mbeeli-sieva ngalĩko ya ĩtheo.” 11Isivosethi ndaaneena ndeto ĩngĩ o na ĩmwe nũndũ nĩwakĩaa Avineli.
12Nĩvo ĩndĩ Avineli watũmie andũ mathi vala ve Ndeviti, ũla ĩvindanĩ yĩu waĩ Eviloni,#3.12 waĩ Eviloni: Kĩthyomo kya Kĩevelania kyaĩtye vala (Avineli) waĩ. makamũkũlye atĩĩ, “Nũũ ũla ũkũsumbĩka nthĩ ĩno? Nĩtũseũvye wĩw'ano, nakwa nĩngũũtetheesya ũtũnge andũ ma Ĩsilaeli onthe ngalĩkonĩ ĩla yaku.”
13Ndeviti nĩwamũsũngĩie amwĩa atĩĩ, “Nũseo, nĩngũseũvya wĩw'ano naku ethĩwa nũkwĩka ũndũ ũũ ũmwe: No nginya wũkany'e na Mikali mwĩĩtu wa Saũlo yĩla wĩũka kũmbona.” 14#1Sam 18.27 O ta ũu Ndeviti nĩwatũmie andũ kũla kwĩ Isivosethi mwana wa Saũlo makamwĩe atĩĩ, “Ndũngĩe Mikali kĩveti kyakwa, kĩla neeyĩasĩisye kwa kũĩva ikonde#3.14 Sisya 1 Sam 18.25 ĩana sya Avilisiti ala nooaie.” 15Kwoou Isivosethi nĩwoosie Mikali kuma kwa mũũme wake Valitieli mwana wa Laisa. 16Valitieli nĩwaatĩĩie Mikali aĩĩte mathi kũvika ndũanĩ ya Mbaulimu. Ĩndĩ yĩla Avineli weeie Valitieli asyoke mũsyĩ nĩwasyokie.
17Avineli nĩwaendie kũla kwĩ atongoi ma Ĩsilaeli na amea atĩĩ, “Vandũ va ĩvinda ĩasa mwĩthĩĩtwe mũyenda Ndeviti atw'ĩke mũsumbĩ wenyu. 18Yu mwanya wenyu wĩvo, lilikanai kana Mwĩai Ngai aisye, ‘Ngatũmĩa mũthũkũmi wakwa Ndeviti kũtangĩĩa andũ makwa ma Ĩsilaeli kuma kwa Avilisiti na kuma kwa amaitha moo onthe.’ ” 19O ta ũu Avineli nĩwaneenie na andũ ma mbaĩ ya Mbengyameni. Ĩtina wa ũu nĩwaendie Eviloni kũtavya Ndeviti maũndũ onthe ala andũ ma Ĩsilaeli, na andũ onthe ma mbaĩ ya Mbengyameni mekwenda kwĩka.
20Yĩla Avineli e na aũme mĩongo ĩlĩ mavikie Eviloni vala Ndeviti waĩ, Ndeviti nĩwamaseũvĩisye mboka. 21Nĩvo ĩndĩ Avineli weeie Ndeviti atĩĩ, “Mũnene wakwa, yu nĩngũthi ngakũmbanĩsye andũ onthe ma Ĩsilaeli. Nĩmeũseũvya ũtianĩo naku, na ĩndĩ ũimasumbĩka onthe o tondũ wĩthĩĩtwe ũyenda.” Ndeviti nĩwaĩkĩĩthisye Avineli kana nũkwĩthĩwa e ũsũvĩonĩ na mataanĩsya.
Kũawa kwa Avineli
22Ĩtina wa maũndũ asu Yoavu na anini ala angĩ ma Ndeviti nĩmasyokie kuma kaũnĩ. Nĩmakuĩte syĩndũ mbingĩ ila matavĩte. Ĩndĩ ĩvindanĩ yĩu Avineli ndaĩ Eviloni vamwe na Ndeviti, nũndũ Ndeviti aĩ anamũtũma athi na akamũĩkĩĩthya kana nũkwĩthĩwa e ũsũvĩonĩ. 23Yĩla Yoavu na asikalĩ onthe ala maĩ vamwe nake mavikie, nĩwataviw'e kana Avineli mwana wa Neli aĩ anooka kũla kwĩ mũsumbĩ, nake mũsumbĩ akamũĩkĩĩthya kana nũkwĩthĩwa e ũsũvĩonĩ, na makataanĩsya. 24Kwoou Yoavu nĩwaendie vala ve mũsumbĩ na amũkũlya atĩĩ, “Wĩkie ũu nĩkĩ? Yĩla Avineli wũkie kũla ũĩ ũmũlekilye athi nĩkĩ? 25Okie ũkũkenga na kũmanya maũndũ onthe ala wĩkaa, na kũla ũendaa. Kwa w'o we mũsumbĩ no wĩsĩ ũu!”
26Yĩla Yoavu waumie vala ve Ndeviti, nĩwatũmie andũ maatĩĩe Avineli, namo mamũete kuma kĩthimanĩ kya Silaa, ĩndĩ Ndeviti ndaamanya ũndũ ũsu. 27Yĩla Avineli wasyokie Eviloni, Yoavu nĩwamwosie amũtwaa vandũ ũtee mũvĩanĩ, ta ũkwenda makaneene me elĩ. Me vau Yoavu nĩwamũtonyie ĩvu na kavyũ amũaa, nĩ kana eyĩĩvanĩsye nũndũ wa mwana-a-inyia wake Asaeli ũla wooaĩtwe nĩ Avineli. 28Ĩtina wa ũu yĩla Ndeviti weewie ũvoo ũsu nĩwaisye atĩĩ, “Ĩvindanĩ yonthe yĩla yũkĩte nyie na andũ ma ũsumbĩ wakwa, tũikatalĩlwa ĩvĩtyo mbee wa Mwĩai Ngai ĩũlũ wa kĩkw'ũ kya Avineli mwana wa Neli. 29Ũkany'o wa kĩkw'ũ kya Avineli wĩthĩwe ĩũlũ wa Yoavu na andũ ma mũsyĩ wake! Mũsyĩ wa Yoavu kĩla ĩvinda wĩthĩawe na mũndũ wĩ na ũwau wa kumwa nĩ mavia kũndũnĩ kwake kwa kĩmbithĩ, kana wĩ na ũwau wa mangũ, kana ũkũthi na ndata, kana mũndũ ũkũaĩwa kaũnĩ, kana ũte na lĩu wa kũya!” 30Kwoou Yoavu na Avisai mwana-a-inyia nĩmooaie Avineli nũndũ nĩwooaĩte mwana-a-inyia woo Asaeli kaũnĩ ũla waĩ Ngiveoni.
Kũthikwa kwa Avineli
31Nĩvo ĩndĩ Ndeviti weeaĩie Yoavu na andũ ala maĩ vamwe nake matembũange ngũa syoo, mekĩe ngũa ngaamu sya makunia, na mayĩthĩwa na kyeva nũndũ wa Avineli. Mũthenyanĩ wa mathiko Ndeviti nĩwaendie e ĩtina wa ĩsandũkũ ya Avineli. 32Avineli athikiwe Eviloni; mũsumbĩ nĩwaĩie na wasya mũnene e ũtee wa mbũa yake, na andũ ala angĩ onthe maĩa. 33Ndeviti nĩwainie wathi ũũ wa kyeva kwondũ wa kĩkw'ũ Avineli:
“Avineli nĩwaĩlĩte kũkw'a ta mũndũ mũtumanu?
34Moko maku mainaĩ move,
na o ta ũu maũũ maku mainaĩ move na mbĩngũ;
ũnakwie ta mũndũ wũaĩtwe nĩ andũ athũku!”
Andũ nĩmaĩie ĩngĩ nũndũ wa Avineli.
35Mũthenya w'onthe andũ nĩmatatie kwĩsũva Ndeviti aye kĩndũ, ĩndĩ nĩweevĩtie asya, “Ngai nĩambũae naya kĩndũ mũthenya ũtanamba kũthela!” 36Andũ onthe nĩmamanyie ũu na mendeew'a; andũ nĩmendeeaw'a nĩ maũndũ onthe ala mũsumbĩ weekaa. 37Kwoou mũthenyanĩ ũsu andũ onthe, vamwe na andũ ma Ĩsilaeli nĩmamanyie kana mũsumbĩ ndaĩ ũmwe wa andũ ala mooaie Avineli mwana wa Neli. 38Mũsumbĩ nĩwakũlilye anini make atĩĩ, “Inyw'ĩ nomwĩsĩ kana ũmũnthĩ mũtongoi wĩ nguma wa andũ ma Ĩsilaeli nĩ mũkw'ũ? 39O na kau ninyie mũsumbĩ ũla ũnyuvĩtwe nĩ Ngai, ũmũnthĩ nĩĩw'a nde na vinya. Ana aa ma Nzeluia mena vinya mbee wakwa. Mwĩai Ngai nĩakany'e andũ aa athũku kwĩanana na meko moo mathũku!”
BIBLE SOCIETY OF KENYA © 2011