2Mak 7
7
Aũme Mũonza na Inyia woo Mayũawa nũndũ wa Mũĩkĩĩo woo
1Ĩvinda yĩmwe kĩveti kĩmwe Mũyuti vamwe na ana makyo mũonza nĩmakwatiwe. Mũsumbĩ nĩwaumisye mwĩao andũ asu makũnwe na mĩsalisa nginya maye nyama sya ngũlũe ila itetĩkĩlĩtw'e nĩ mĩao ya Kĩyuti kũĩwa. 2Ũmwe wa anake asu nĩwaneenie vandũ va ala angĩ akũlya atĩĩ, “Mwĩenda kũtũkũlya na kũmanya ata kuma vala tũĩ? Nĩtwĩyũmbanĩtye kũkw'a kũte kũtũla mĩao ya aaũmae maitũ.”
3Mũsumbĩ nĩwathatie mũno na eeyĩaa ikaangi na masilia mavyũvw'e. 4Ũndũ ũsu nĩweekiwe mĩtũkĩ. Nĩvo ĩndĩ mũsumbĩ weeaĩie andũ make matile ũĩmĩ wa mwanake ũla waneenie, mamũthĩnze mamumye kĩkonde kya mũtwe, na maimũtila moko na maũũ. Meeiwe meke ũu inyia wake na ana-a-inyia masyaĩĩsye. 5Mamina kwĩka mwanake ũsu ũndũ meeaĩiwe na weethĩa ndetonya, mũsumbĩ nĩwameaĩie mamwilĩĩle kĩkaanginĩ e o thayũ na maimũkaanga. Syũki nĩyaumie kĩkaanginĩ yanyaĩĩkĩa kĩla vandũ, ĩndĩ anake asu nĩmeekĩanie vinya vamwe na inyia woo makw'e na ũkũmbaũ mayasya atĩĩ, 6“Mwĩai Ngai nũtũsyaĩĩsye na kwa w'o nũkũtwĩw'ĩa tei, o tondũ Mwose wawetie wathinĩ wake na akũsĩĩa mbee wa andũ ayasya, ‘Mwĩai nĩwĩw'ĩaa athũkũmi make tei.’ ”
7Mwanake wa mbee amina kũkw'a, nĩmoosie mwanake wa kelĩ maendee kwĩtanĩthya. Nĩmamumisye kĩkonde kya mũtwe kĩna nzw'ĩĩ na mamũkũlya atĩĩ, “Nũũya nyama ya ngũlũe kana nũkwenda tũkũtilange moko na maũũ?”
8Mwanake ũsu nĩwasũngĩie na kĩthyomo kya aaũmae make na amea atĩĩ, “Ndiya!” Nĩvo ĩndĩ asikalĩ mamũthĩnisye o ũndũ mathĩnisye mwanake wa mbee. 9Mwanake ũsu atielye vanini akw'e nĩweeie mũsumbĩ atĩĩ, “We mũaani mũumanĩe, nũtonya kũtũaa tume thayũnĩ ũũ, ĩndĩ Mũsumbĩ wa nthĩ yonthe akatũthayũũkya na kũtũnenga thayũ wa tene na tene nũndũ tũinatũla mĩao yake.”
10Ĩtina wa ũsu, asikalĩ nĩmambĩĩie kwĩtanĩthya na mwanake wa katatũ. Yĩla wakũlilw'e aumye ũĩmĩ wake, nĩweekie ũu mĩtũkĩ, na kwa ũkũmbaũ atambũũkya moko make, 11na ateũkĩa asya atĩĩ, “Nanengiwe moko aa nĩ Ngai, ĩndĩ mĩao yake yĩ vata mũno kwakwa mbee wa moko aa, na nĩnĩsĩ kana Ngai akandũngĩa mo.” 12Mũsumbĩ na ala waĩ namo nĩmaseng'iw'e mũno nĩ ũkũmbaũ wa mwanake ũsu nĩkwĩthĩwa ndaatala mathĩna asu ta kĩndũ.
13Ĩtina wa kũaa mwanake ũsu wa katatũ, nĩmathĩnisye mwanake wa kana na ũng'endu o ũsu. 14Mwanake ũsu wa kana e vakuvĩ kũkw'a nĩwaneenie asya atĩĩ, “Nĩ kavaa kũawa nĩ andũ na kũtanĩa wĩkwatyo ũla Ngai ũtũnengete wa kũtũthayũũkya ĩngĩ kuma kĩkw'ũnĩ. Ĩndĩ we Andiokusi ndũkathayũũkw'a!”
15Nĩmoosie mwanake wa katano na mambĩĩa kũmũthĩny'a. 16Ĩndĩ mwanake ũsu nĩwasyaisye mũsumbĩ na amwĩa atĩĩ, “Wĩna ũkũmũ ĩũlũ wa andũ o na vala o naku ũkakw'a. Nũtonya kwĩka ũndũ ũkwenda, ĩndĩ ndũkasũanĩe kana Ngai nũekanĩte na andũ maitũ. 17Endeea tũ na ũkoona ũndũ Ngai aitũmĩa ũtonyi wake wĩkũthĩny'a we vamwe na nzyawa syaku!”
18Ĩtina wa ũsu wa katano nĩmoosie ũla wa thanthatũ. Mwanake ũsu akilĩlye kũkw'a nĩwaneenie asya atĩĩ, “Eka kwĩkenga o mana. Ithyĩ twĩthĩna ũu nũndũ wa mavĩtyo maitũ ala tũvĩtĩsye Ngai waitũ. Nĩkyo kĩtumi maũndũ aa mathũku mekwĩkĩka. 19Ĩndĩ ndũkasũanĩe kana nũtonya kũlea kũkanw'a nĩ Ngai nũndũ wa kũleana nake!”
20Inyia wa anake asu aĩ wa kũseng'ya o na nĩwaĩlĩte kũlilikanwa kwa nzĩa ya mwanya. O na vala nĩwoonie ana asu make mũonza mayũawa mũthenya ũmwe, nĩwoosie ũndũ ũsu na ũkũmbaũ nũndũ wa wĩkwatyo ũla waĩ naw'o nthĩnĩ wa Mwĩai. 21Nĩwathangaaisye kĩla ũmwe wa ana make na kĩthyomo kya aaũmae moo. E na veva wa ũkũmbaũ, nĩwaũngamie na ũnyiau ta mũndũ-ũme na nĩweeaa kĩla ũmwe wa ana asu make atĩĩ, 22“Ndyĩsĩ ũndũ wambĩĩie kwĩthĩwa wĩ thayũ ĩvunĩ yakwa. Ti inyie nakũnengie thayũ na veva, o na ti inyie nakwatanisye mamutha ma mwĩĩ waku. 23Kwoou Mũmbi wa nthĩ, ũla wavangie kũmbwa kwa mũndũ na avanga mwambĩlĩĩlyo wa syĩndũ syonthe, kwa tei wake nũkũũnenga thayũ na aikũveveea ĩngĩ, nũndũ yu nũkwĩlea kwondũ wa mĩao yake.”
24Andiokusi nĩwamanyie nesa vyũ kana inyia wa anake asu nĩwamũvũthasya, kwoou nĩwatatie kwĩsũva mwana ũla wa ĩtina wa kĩveti kĩu, ũla ũtaĩ anamba kũawa aekane na syĩthĩo sya aaũmae make. Nĩwathie mwanake ũsu kwa kwĩvĩta kana nũkũmũnenga ũthwii mwingĩ na kũmũtw'ĩkĩthya mũndũ wĩ nguma, na o ta ũu aimũnenga wĩa wa kũũngamĩa maũndũ ma nthĩ na kũmũtw'ĩkĩthya mũnyanyae. 25Mwanake ũsu ndaaĩtĩkĩla ndeto sya mũsumbĩ, na kwoou Andiokusi atata kwĩsũva inyia wa mwanake ũsu aneene nake nĩ kana mwanake ũsu ndakoawe. 26Ĩtina wa kwĩsũvwa vandũ va ĩvinda ĩasa, inyia wa mwanake ũsu nĩweetĩkĩlile kwĩka ũu. 27Ĩndĩ aĩĩe mwana wake nĩwaneenie na kĩthyomo kyoo aivũthĩĩsya mũsumbĩ ũsu mũthũku ayasya atĩĩ, “Mwana wakwa, mbĩw'ĩe tei. Naũkuie ĩvunĩ yakwa myei kenda, na nakũea vandũ va myaka ĩtatũ. Ngũsũvĩĩte na ngaũnenga kyonthe kĩla wĩ na vata nakyo nginya ũmũnthĩ. 28Yu nĩngũkwĩsũva mwana wakwa ũsisye ĩtu na nthĩ wone syĩndũ syonthe ila syĩ nthĩnĩ wasyo, na ũimanya kana Ngai ndaaũmba syĩndũ isu aitũmĩa syĩndũ ingĩ syaĩ kw'o. Ngai oombie andũ kwa nzĩa o ĩsu. 29Ndũkakĩe mũaani ũũ. Onany'a kana ũilyĩ o ta ana-a-inyia maku. Ĩtĩkĩla ũkw'e nĩ kana kwa tei wa Ngai nĩkũtũngĩwa ĩngĩ vamwe na ana-a-inyia maku.”
30Inyia wa anake asu aendee kũneena, mwanake ũsu nĩwaneenie asya atĩĩ, “Mũsumbĩ Andiokusi, weteelete kyaũ? Nĩnalea kũatĩĩa mĩao yaku. Ĩndĩ nĩatĩĩa motw'ĩo ala me mĩaonĩ ĩla yanengiwe aaũmae maitũ kwĩsĩla vala ve Mwose. 31Ĩndĩ naku we, ũla wĩkĩte Aevelania ũthũku wa kĩla mũthemba, ndũkalea kũkanw'a nĩ Ngai. 32Kwa w'o twĩthĩna nũndũ wa naĩ sitũ. 33Ethĩwa Mwĩai waitũ ũla wĩ thayũ nũthatĩtw'e nĩ ithyĩ vandũ va ĩvinda ĩkuvĩ, na etũkany'a nĩ kana twĩthĩwe na mwĩkalo mũseo, nũkũsyoka ĩngĩ ew'ane na athũkũmi make. 34Ĩndĩ we wĩ mũndũ mũthũku na mũvuku mbee wa andũ onthe, ndũkatane mana na kwona wĩ mũnene yĩla ũũthĩny'a andũ ma Ngai. 35Ndũnamba kũvonoka ũsilĩlo wa Mwene Ũtonyi, Ngai ũla wonaa maũndũ onthe. 36Ana-a-ia makwa mathĩna o kwa ĩvinda ĩnini nũndũ wa kwĩthĩwa twĩ aĩkĩĩku ũtianĩonĩ wa Ngai, ĩndĩ yu nĩmakwata thayũ wa tene na tene. Ĩndĩ we nũũsilĩlwa nĩ Ngai na kũnengwa ũkany'o ũla ũkwaĩlĩte nũndũ wa ngathĩĩo syaku. 37Nyie o tondũ ana-a-ia makwa meeka nĩngũnengane mwĩĩ wakwa na thayũ wakwa nĩ kana ndikatũle mĩao ya aaũmae maitũ, ngĩmwĩsũva Ngai ew'ĩe nthĩ yaitũ tei mĩtũkĩ, na aikũetee matatwa na mothĩny'o nĩ kana atume wumbũla kana nĩwe Ngai e weka. 38Nyie na ana-a-ia makwa nĩtwĩthĩwe twĩ ma mũthya kũkwata ũkany'o na ũthatu wa Ngai waitũ, ũla kwa w'o nĩwanangĩte nthĩ yaitũ yonthe.”
39Mũsumbĩ Andiokusi nĩwathatie mũno nũndũ wa ndeto isu sya kĩvũthya na kwoou eeyĩaa mwanake ũsu athĩnw'e o na mbee wa ala angĩ. 40Mwanake ũsu nĩwakwie na ndaĩa yake, wĩkwatyo wake w'onthe wĩ nthĩnĩ wa Mwĩai.
41Mũthya vyũ, inyia wa anake asu mũonza o nake nĩwooaiwe.
42Ũũ nĩwĩthĩwe ũelesyo wĩanĩe ĩũlũ wa kũya nyama sya nthembo na kũthĩnw'a kwingĩ kwa andũ.
BIBLE SOCIETY OF KENYA © 2011