2Mak 2
2
Yelemia Aivitha Ĩeema ya Kũkomanĩa na Ngai
1“Kuma mavukunĩ ala maandĩkĩtwe maũndũ, nĩtwĩsĩ kana mwathani Yelemia nĩweeaĩie andũ ala matavĩtwe matwawe nthĩ ya ũeninĩ nĩmakue mwaki kuma kĩthembeonĩ, o tondũ tũwetete vau mbeenĩ. 2O ta ũu nĩtwĩsĩ kana mwathani amina kũmanenga mĩao, nĩweeaĩie andũ asu maendete me atave kana maikatate kũlwa nĩ mĩao ya Mwĩai, kana kũluluutĩkw'a mosũanĩonĩ moo, mamina kwona mĩvw'anano ya thaavu na silĩva na syĩndũ ila syamyanakavĩtye. 3Kwa ndeto ingĩ ta isu, mwathani Yelemia nĩwamatavisye kana mayaĩlĩte kũlwa nĩ mĩao.
4“Mavuku asu o ta ũu metũmanyĩthya kana Yelemia atongoew'e nĩ Ngai, nĩweeaĩie andũ kana nĩwaĩlĩte kũendany'a na Ĩeema ĩtheu ya kũkomanĩa na Ngai na Ĩsandũkũ ya Ũtianĩo, nginya kĩĩmanĩ vala Mwose waũngamie ĩvindanĩ ya tene na oona nthĩ ĩla Ngai wathie andũ maitũ. 5Yelemia nĩwaendie na oona ngunga, na alikya vo Ĩeema ĩtheu ya kũkomanĩa na Ngai, Ĩsandũkũ ya Ũtianĩo na kĩthembeo kya kũvĩvĩsya ũvani, na avinga ũlikĩlo wa ngunga ĩsu.
6“Amwe katĩ wa andũ ala mekalaa na Yelemia nĩmamũatĩĩie mavane nzĩa ĩla wesĩle, ĩndĩ o na meeka ũu mayaaona vala ngunga ĩsu yaĩ. 7Yĩla Yelemia weewie kana nĩmekie ũu, nĩwamakanisye ayasya atĩĩ, ‘Vandũ vau vaikamanyĩka nginya yĩla Ngai ũkombany'a andũ make vamwe na kũmony'a tei wake. 8Nĩvo ĩndĩ Ngai wĩvuany'a maũndũ asu, na ũtheu wake mũtisu na yĩla ĩtu yĩyumĩla, ũndũ kweekĩkie ĩvindanĩ ya Mwose, na o tondũ Solomoni wavoyie nĩ kana Ĩkalũ yĩvathwe kwa nzĩa ya mwanya.’
Ũndũ Solomoni Watanĩie Mboka
9“O ta ũu, kuma ĩvukunĩ yĩu nĩtũkwona ũndũ Solomoni e na ũĩ mwingĩ, waumisye nthembo kwondũ wa kũvathwa kwa Ĩkalũ na kũmina kwakwa kwayo. 10O tondũ Mwose wavoyie Mwĩai na mwaki watheea kuma ĩtunĩ wavĩvya nthembo, now'o Solomoni nake wavoyie na mwaki watheea na wavĩvya nthembo ya kũvĩvw'a yonthe. 11Mwose nĩwaneenie asya atĩĩ, ‘Nthembo isu syavya nũndũ nthembo kwondũ wa ũekeo wa naĩ ndĩĩ ĩnaĩwa.’ 12O ta ũu nake Solomoni nĩwatanĩie mboka ĩsu kwa ĩvinda ya mĩthenya nyanya.
Nyũmba ĩla Neemia Woombanĩsye Mavuku
13“Maũndũ o asu nĩmaandĩkĩtwe mavukunĩ ma ũlilikany'o ma asumbĩ na ma Neemia, na kana Neemia nĩwambĩĩisye nyũmba ya kwia mavuku na oombany'a mavuku maandĩkĩtwe ĩũlũ wa asumbĩ na athani, maandĩko ma Ndeviti, na valũa ila asumbĩ maandĩkie ĩũlũ wa nthembo. 14Yuta Makambii o nake nĩwoombanisye mavuku ala maĩ mananyaĩĩkw'a nũndũ wa kaũ ũla twaĩ naw'o, na mavuku asu twĩ namo o na yu. 15Kwoou ethĩwa mwĩ na vata namo, tũmai andũ moke kũmosa mamũetee.
Andũ Maithokw'a moke Kũtanĩa Mboka
16“Nũndũ tũkilĩlye kũtanĩa Mboka ya Kũvathwa ĩngĩ kwa Ĩkalũ, twĩmũandĩkĩa tũimũkũlya o nenyu mũtanĩe mboka ĩsu. 17Ngai nĩwe ũtangĩĩte andũ make onthe na akamatũngĩa nthĩ yoo, ũsumbĩ woo, ũthembi, na kũvathwa kwoo, 18o tondũ wathanie nthĩnĩ wa mĩao. Twĩ na wĩkwatyo kana o mĩtũkĩ Ngai akatwĩw'ĩa tei na akĩtũmbany'a kuma kĩla vandũ ĩũlũ wa nthĩ atũete Ĩkalũnĩ yake ĩtheu, nũndũ Ngai nũtũtangĩĩte kuma mothũkunĩ manene na kũthesya Ĩkalũ yake.”
Ndeto sya Mbee sya Mũandĩki wa Ĩvuku Yĩĩ
19Yasoni wa Kũlene nũandĩkĩte mavukunĩ atano ũvoo wa Yuta Makambii na ana-a-ĩthe, ũvoo wa kũthew'a kwa Ĩkalũ ĩnene, na ũvoo wa kũvathwa kwa kĩthembeo kyayo. 20O ta ũu nũeleetye ĩũlũ wa makaũ ala mokitie na Andiokusi Evivanesi, na mwana wake Euvatoli, 21na mawoni ala maumie ĩtunĩ mookĩa andũ ala mokitie na ũkũmbaũ mũnene maitetea ũthaithi wa Kĩyuti. O na vala ũtalo wa asikalĩ maitũ waĩ mũnini, nĩmoosie nthĩ yonthe na malũngya asikalĩ aingĩ ma Andũ-ma-mbaĩ-ingĩ. 22Nĩmakwatie ĩngĩ Ĩkalũ yĩla yĩ nguma ĩũlũ wa nthĩ yonthe, matangĩĩa ndũa ya Yelũsalemu na malũlũmĩĩlya ĩngĩ mĩao ĩla yakilĩlye kũminwa. Meethĩiwe matonya kwĩka ũu nũndũ Mwĩai nĩwamekie nesa na amew'ĩa tei.
23Yu nĩngũtata kũandĩka kwa ũkuvĩ ĩvukunĩ yĩmwe, maũndũ asu onthe Yasoni waandĩkie mavukunĩ atano. 24Nũndũ maũndũ ala maandĩkĩtwe mavukunĩ asu nĩ maingĩ, na moelesyo maingĩ ala me vo nĩmatonya kwingĩvĩa na kũnosya mũndũ ũla ũtonya kwenda kũsoma ũvoo ũsu wa tene, 25nĩ na kĩeleelo kya kũandĩka ĩvuku yĩtonya kũsomwa nĩ andũ vate thĩna, wĩthĩe ti vinya andũ kwĩkĩa ũvoo ũsu ilĩkonĩ syoo, na nĩ kana andũ onthe ala meyĩsoma matetheke. 26Kũandĩka maũndũ asu kwa ũkuvĩ nĩ ũndũ wĩ vinya ũnoasya mũndũ na kũtuma aĩwa nĩ too. 27Nĩ ũndũ wĩ vinya ta kũseũvya mboka ĩla andũ mendete mĩsamo yĩ kĩvathũkany'o mekũka kũtanĩa. Ĩndĩ nĩ kana nĩtume andũ aingĩ methĩwa me eanĩe, nĩngũmĩĩsya na ũtanu kũtethya wĩa ũsu mũito. 28Nyie nĩngũeka moelesyo kwa ũliku methĩwe mavukunĩ ala ma mbee, nĩngũtata kũandĩka kwa ũkuvĩ maũndũ ala meekĩkie. 29Nyie ndiilyĩ ta vundi wa nyũmba nzaũ, ũla ũsiasya kĩla kĩndũ mwakonĩ, ĩndĩ nyie nĩilyĩ ta mũvaki wa langi, na wĩa wakwa nĩ kũtuma nyũmba yĩthĩwa ya kwendeesya. 30Mũndũ ũla ũeleasya maũndũ ma tene ĩvinda ya mbee, ethĩawa aĩlĩte kũmanya nesa kĩla ũkũelesya, asisye maũndũ onthe kwa ũliku, na aimaelesya nesa. 31Ĩndĩ ũla ũsyokaa kũelesya ũndũ ũsu kwa nzĩa ĩngĩ, nĩwaĩlĩte kũnengwa mwanya wa kũũkuvĩvya na kũlea kũweta maũndũ onthe. 32Kwoou yu ndekwongela ndeto ingĩ nĩngwambĩĩa ũelesyo wakwa, nũndũ nĩ ũtumanu kũandĩka ndeto mbingĩ sya mbee na ngĩkũvĩvya ũvoo ũũ wa tene.
BIBLE SOCIETY OF KENYA © 2011